持續接近10週的示威，相信每一個香港人都知發生咩事，而每一次電視上的畫面，籃有籃的詮釋，黃有黃的詮釋，但無論你係政治的邊一方面，都應該睇到目前為止係無任何可以完結的跡象，今次的事件點收科真係唔知，不過亦應驗左當初隊長講過，撤回呢兩個字的重要性，如果有時光機可以番番去612講撤回，今日香港就唔會有咁的局面。 事以至此，為經濟把一把脈，其實有更加多令人擔憂的事。首先相信大家都見到旅遊零售酒店全部都死晒，基本上成個傳統暑假旺季真係無左，開始有商店頂得住的就頂，頂唔住的已經開始執，當然民生的商鋪其實還可以，但係其他的商店已經薀釀炒人結業潮，其實個問題唔係話到呢一刻仲頂唔頂得住，好多商店去諗的係，呢家仲要搞幾耐，而搞完之後個經濟係咪會轉型定係仲要捱，捱幾耐，呢D先計唔到數，當然好多仇富仇商的可能話抵死啦之前賺咁多而家睇你仆街就開心，不過商家佬有商家佬的睇法，呢家軌纜的可能唔係輸很多，但有D近呢一年可以岩岩創業的小資本家就真係輸到訓係度,可能岩岩先捱完一浸有D氣色就黎個大浪沖散晒。 當然呢個所謂的攬炒政策係一個無賴得來但已經見效的政策，因為睇黎持續下去的話，小資本家小鋪應該開始會有更多倒下，慢慢可能成個經濟都會出現失業潮，係失業潮下有幾多人會由黃轉籃，其實真係好難講。有時不得不去諗，對與錯當然每個人心中有把呎，但係要你輸身家或畢生心血去支持對的事情，有幾多人經得起考驗又係未知之數。所以，隊長明白點解咁多地產大佬同藝人都要表忠，講真係今時今日的風起下，要為左企得硬而放棄以前的努力以及將來，放在現實面前是很難不折腰，而且大家要明白一切過去之後，就會是清算的開始，真的願意迫自己走投無路，還是置身事外，有時都係現實裡不得不面對決擇的事情。 而事實上今次的事情上，有好多人話打死都唔割蓆，使兩邊要旗幟鮮明咁，其實又有點怪怪的。即係你如果係黃，就一定等於支持所有示威衝突，支持癱瘓機場癱瘓道路咁；而如果你係籃，就一定等於支持警察打人，黑社會無差別咁打市民；呢個命題係有小小怪，即係點解企係一邊時就要認同所有野，不再分對於錯呢？更難搞的係，提出呢個質疑時就更加兩面唔討好，令想做中間的人更加無處容身。 是的，無處容身其實係今次事件下其實中央的意外收獲。某程度黎講，以前在香港你會覺得係華洋共存，鬼佬總會有D say，但今次事件其實中央果套竟然大派用長，係示威者日日上街迫政府時...

隨著政府宣佈送中條例「暫緩」同埋「壽終正寢」，青年人同一派民主派人仕仍然堅持上街在各區推動分區的遊行同連儂牆，政府仍堅持唔回應市民訴求，而置市民，尤其青年人在前線不停磨擦，基本上其實林鄭就算唔下台，只要行出黎話肯撤回，都已經可以大幅減低民怨，但而家係選擇龜縮政策，期望市民自己消耗意志，又或者大量的警民衝突擦槍走火後民意逆轉，其實真心作為特首實在係難辭其究，簡單的兩個字可滅火都唔願意，實在不智。 然而，點解青年人咁上心咁積極咁去上街呢？有好多老一輩的人總係話佢地扭計乜乜柒柒，隊長見到有時都真心覺得離地得要緊，問心真係叫你個個星期大熱天時遊行後再出黎長久戰仲要比人打，係個個星期，真係咁中意打？唔係話無呢D人，但斷估香港都無咁多武將掛，但先唔好講政治野，只談民生經濟同青年人的將來，也許可以明白點解今次收唔到科。 係我地香港人的思路下黎講，其實一個人生的路大約都係讀書，入大學，畢業搵份好工，再結婚買樓生仔，然後安居樂業等死，基本上都係離唔開呢條路。不過而家的問題係，係 溝淡 的呢個大勢下，基本上香港的年青人的出路係越來越窄同埋越來越難競爭。舉個例，就咁講近呢五年你行入任何一間大學，你聽到的普通話的機率係已經多左好多好多，而對比以前只係響銅鑼灣旺角海港城先聽到超過一半的普通話，今時今日係學校區都已經有好普遍的普通話出現左，而呢個現象並非一個新的現象，反而係其實當你開始才意識到真正全方位360度溝淡時,才再看一看好多中資企業, 西方企業, 都早就已經係開始傾向請國內的學生在港工作。而要解釋呢個原因，亦除左因為中資影響力已經好大的時間，更因為好多企業都已經係之前五至十年都請左國內的同學，佢地部份都做到中層或中高層，開始有影響力，慢慢再發現過去香港學生因為有廣東話語言的優勢下較易搵工的情形開始倒轉，而家反而係有國內背景和操流利普通話成為一種優勢，甚至趨勢，即係話不得不承認連入場的工作都感覺被搶走了，而呢個政府仲日日夜夜都係招待北面的同胞而無任何惠及本地人的政策，從政府的大方向當然無問題因為何能GDP都仍然一样, 但係本地青年人就不停擠進狹窄的通道, 呢個亦係一個事實。 好多離地的老一輩人就會話其實佢地年代都係點點點，又或者講話香港係外向型經濟而青年人更應該自己裝備自己去應對挑戰，然而一個好大的問題係而家單純教育根本唔足以可以令整體的青年人有更多機會，換個角度即係...

當你回看從前，應該也會有這種感覺： ------------------------------------------------------------------------------------------------------- 當你在中學食個午飯要三四十蚊時，對於開始做part time搵幾千蚊的你, 慢慢又覺得那幾十蚊不是什麼錢, 又不是什麼大數。 當你搵幾千蚊part time時,一千幾百都係血汗錢, 但慢慢開始踏入社會搵13000蚊月入的你，開始又覺得一千幾百唔是咩錢。 當你搵萬零蚊時,一萬幾千蚊的需求,比如一部幾千蚊的手機，想買都要儲下錢先有, 不過當對於慢慢開始工作左三四年野,有十萬八萬積蓄又搵兩三萬月入的你黎講，又可能覺得買部手機都唔駛諗咁多。 而當你有十萬八萬又搵三幾皮時,買車買樓好像還是很遙遠的目標，不過如果你唔小心儲下儲下人都到三張野開始有一百幾十萬積蓄又搵五六萬月入的時間，開始又會覺得買樓買車唔是夢。 ------------------------------------------------------------------------------------------------------- 一步步向前行咁成長，當你小時候好像很大的價值，而家回頭睇番其實可能好細，不過個問題係，你今日的回頭，是已經到達了一個瓶頸了嗎？ 事實上，好多人在工作後，慢慢走入社會，慢慢就會跟住個大方向走然後就迷失。迷失的意思，唔係代表唔進步，不過就好似一條船入左迷霧入面，架船可能係向前行緊，都有可能會到目的地，不過，你唔知一路行下去其實係咪真係大幅向住目的地行，定還是其實可能打斜走。隊長我聽過好多人講「我有計劃」「我有計劃」「我有計劃」，呢個其實我覺得本身係有得相確，因為邏輯上，其實單「我有計劃」係唔足夠的，更重要的係你要先有目標，才會有計劃，亦即係你要知你去美國，先會計劃撘飛機；而如果你有計劃飛，但未知目的地，感覺總是怪怪的？ 回頭看的這個動作，其實幾有趣，因為也許今天的你，可能是在人生目前的高位看回去，也可能是在過了黃金歲月時看回以前的自己。不過係香港黎講，其實只要順住行而又托賴無乜大波折的話，四十歲前的你應該每年多多少少都會有進步，然而人過中年就開始難講，可能更上一層樓，也有可能會見頂。不過，隊...

今日,講政治。港豬或唔同意見的人，請跳過呢一篇。 首先，今日講一句就係，香港人真係好叻，今次連續2個百萬遊行大combo，重重將民意反映比呢個政府同埋全世界聽，的確係一個非常高質素的公民展現，尤其是咁大量的人民遊行都無任何撲擊，有緊急車輛行過時都會禮貌讓路，這個在中國國土上的特別城市展現出極高的公民水平，相信全世界都會睇到，香港人是真的和平理性的在爭取我們心中的價值，撤回惡法。 而今日，其實亦睇到一样野政府學精左，就係警方無再係遊行上面企得太過敵對，遊行人仕不停擴闊遊行路線，警方都盡量配合，這是一個進步同智慧，當然呢篇文落筆之時，未到需要清場的一刻，到聽朝睇事態發展先知再會點。 講番成個大局分析，首先今日香港人，尤其是民主派系，係板回左一個自2014年佔中的弱勢。事實上2014年佔中搞到大大穫都好,都沒有爭取到任可一個政府的讓步,市民集會同遊行都顯得不重要之時,泛民其實之後就潰不成軍, 政府更追打落水狗, DQ議員，攞埋立會大部份議席，再告爆你班佔中帶頭人物，理論上建制陣營早就可以話勝券在握，所以就算一地兩檢，拉布都無乜用，吹雞上街都係有限人數，相信在好多香港人的心目中，果團火都已經半熄。 但係今次林鄭搞一搞呢個送中條例，誤打誤撞卻將咁L多唔同利益的人連埋一齊,就簡單講地產商同市民本身都在對立層面黎講,今日竟然都視林鄭為敵人,視送中為惡法。而呢個星期，其實好多官都壓力山大，當然林鄭本人最慘，比加超反而喱埋左係後面佢就真係爽，而另一個就係一哥盧偉聰。必需強調，每一個建制同官的支持度都會令風向有變，就如行政會議轉態，立法會有部份議員有微言，都會將件事風向改變。 事性發展至令，其實林鄭連續已經犯下太多錯，就比如舉個例比加超呢個人，係呢件事上面我講出黎大家都知佢有份，不過如果講遊行同埋傳媒焦點，就全部落晒係林鄭一個人身上，點解呢？一方面，佢本身自負，所以如隊長昨天分享所講，政府係離左地，市民講明不撤不退，但林鄭就以暫緩黎諗住搏大霧，雖然隊長都講過林鄭都未必咁係任內再重推，所以基本意義不大，不過用暫緩就好似冠冕堂皇咁收兵，對政府同建制以至中央同自己形象都有個交代，但係佢真係離地唔明其實市民係可以唔收兵，所以黎到今日的大遊行佢就尷尬了，明顯地大幅低估了民情，所以一早講只係用字上，林鄭唔肯退大步小小，就令自己更加進退失據。 然而，更加係自我謀...

呢個月，又懶，又忙，所以唔係成日寫文章，而個樓市就神奇地硬淨，講的就係貿易戰下，股市就插到HIHI，但係樓市就繼續硬淨，當然有人又話劈價成交，但亦有報導指出好多樓都係破頂中，而CCL亦準備再闖歷史高位。 股樓唔同步，可以解釋為一係就股市先行一步，樓市遲早跟住跌埋一份，又或者樓市其實真係反映到供求的狀態，不被短期的信心打擊。當然，貿易戰呢家只係開頭，無人知打幾耐，所以實体經濟並未影響到浮現個問題。係貿易戰下，其實有兩個動力係對抗緊，一個就係中美兩大國都會繼續實行低息同寬鬆的貨幣政策，以助企業對抗未來六至十二個月後貿易戰所帶來的影響。而呢個政府政策，其實會極有利樓市，因為龐大的遊資並唔係話會全部流入實體經濟裡的實業，部份的係會攞左黎炒作，而呢D炒作的資金就會對樓市繼續有強大的正面作用。 負面的因素係呢家打貿易戰只係開始，好多商家都未硬食個衝擊，就以華為黎講，基本上唔好意為死就死華為，而其實華為的供應商都好頭痕，幻想一下你出開貨比華為的呢家點算？美資的唔比出貨，全年業績好多都大有影響，無計，大啊嘛。你係中資以為無事照出貨咩？太天真啦，呢家正所謂出又死唔出又死。就比如講華為手機黎講，你出幾個月貨比佢，但都仲要賭華為做唔做到一部手機出黎賣！如果佢賣唔到手機，或者半年一年後先做到，咁你可能壓住三四個月的資金係大量的貨上面，分分鐘上億元以華花的量，咁呢家華為會唔會執呢？我唔知，但我只知如果一間公司突然停產再賣唔出部手機，個現金流一定係仆晒街，係仆到應一應，而如果華為搞唔掂Ｄ芯片，咁好大機會都會逐個業務破產，咁搞法就火燒連環船，一個華為倒下可能就有幾十個大企業陪葬（唔死都要大栽員），然后就係大企業的供應商都出事，一個燒一個，當然內銀亦會好大穫。最大問題係，你就當肯借錢，係邊度搵番個華為咁大間的企業去填補番個鎖售渠道，即係點搞都會燒一穫金的，而燒金的一定會大炒人，呢下對從未遇過任何金融大災難的祖國黎講，可能係一個trigger大爆的源頭, 到時誇行業咁爆煲的話, 香港首先一定難獨善其身, 而祖國落黎的買家除左大幅減少之外, 仲可能會要賣樓班師回朝, 所以都真係唔可以睇少呢單野。 所以就以上一正一負的力量黎講，呢家因負面力量未蒲出黎，所以樓市短期內仲可以幸免於難，不過再之後係點呢，就要睇阿爺點捉呢盤棋。然而，以祖國一貫要面的作風以為仲係一個未開放資本的社會黎講，救華...

香港股市係星期五重拾3萬點水平，星期五晚ADR就繼續上揚，新聞亦引述中美貿易戰將達成恊議，星期六的新盤成交暢旺到不得了，股樓係各方面都旺場下相當相當之有料到，二手都一样暢旺之餘，破頂成交開始已經不停出現，問題係呢一輪旺市會去到咩水位呢？ 如果以對上一個頂黎計，唔好理中原指數因為隊長一直都關注成個升市的起點，即係細價樓的樓價，上次黎講細價樓屋苑的入場價大約係去到530萬左右就停工，頂位就當然破晒600，而如果大家有聽過汪生提及過的龍市理論，即浪頂高於浪頂，浪底亦高於之前浪底的話，其實今次的旺市將極有可能將細價樓的入場費推升至530萬之上，而高牆就係600萬，所以好大機會今次升市就會挑戰全香港所有大屋苑細樓都600起跳為第一站。呢個係隊長的個人睇法，亦和汪生的龍市理論不謀而合。 然而，600萬的確係一面高牆，如果當真全面到呢個價位之時，香港樓市會係要回落，定係一下攻破，定係要拉鋸，真係好睇當時的氣氛環境。係呢一下黎睇，相信只有神先知到時會點，又或者政府會唔會出招搞D乜，之但係到時就會真係好考驗樓市的承托力，一方面就係睇資金係咪真係咁充裕，二來就係租金回報會唔會變得極不合理，即係如果600萬樓的租金回報都係極低時，極大的買樓成本會否令大量資金流向其他投資就真係唔敢講，不過如上一篇文章所講，車位將會受惠，而其他投資就可能連股票都會受惠，無他的，都係因為買樓成本高得離譜而導致其他投資相對變得吸引。 個人認為係呢段時間，自住要追上車的就真係要趕尾班車，而有樓係手的，其實亦該轉向其他資產，車位工廈都好都唔係問題。股市都係一個選擇，因為如果樓市個樽唔能夠裝住溢滿的水，可能會谷爆港股都未定，之前33000左右點數的頂總有一天要破，也許今個升浪在樓市見全面600時就會係over shoot破頂之時。 基本上，以上的論點隊長唔係話樓值得投資或股值得投資，反而車位目前還是稍稍偏落後左小小咁多但都唔係極吸引。但要了解個問題係大勢所趨你都無辦法，資金多，資產價值就會上升，甚至over shoot到唔知去左邊，全都係歸咎係個升勢上面。呢個升勢唔駛多，升到8-9月已經可以去到600之地，到時個市係點就再評估，但而家問我的話，我只係見到乜春都準備升升升。

首先利申，隊長我有車位，而如果你係話我主觀唱好車位的，呢篇文章唔好再閱讀落去。 然而，睇番今日的樓價，破頂破頂再破頂的新聞開始出現，以隊長呢幾年都有講開的主要細價屋苑，好多都已經反彈番去到舊年4月同期的高位，當然未去到話平均已經達致歷史最高的水平，不過離開舊年普遍屋苑過晒五球起跳計，已經慢慢湧晒上黎，而亦見偶有破600的成交了。 重提一下，係今時今日的按揭成數下，600萬一係面高牆，因為以上車客黎講，599萬同601萬的樓的首期，係差約120萬。當然，對於部份投資者黎講，無8成按揭黎計，如果唔係靠發展商的資助下，呢面牆就其實更高，因為除左你只可能借到一半按揭之外，有樓的投資者買多間就要比多15%稅，當你500萬樓，起碼攞250萬首期或以上再打你75萬稅，即係攞住3球幾野先好諗買多層樓收租，呢個係目前的情況，所以好多投資者都係人頭上動腦筋，而用盡人頭後應有好多中小型的投資者係唔會再考慮買樓收租的了。 如果你係淡友，一定會話喂咁樓咪跌囉無人買。錯啦，不過呢度可以拉到好闊咁討論，所以簡單講供應不足，幾個上車客，每人推高十零廿萬，500萬的樓推上600萬，其實幾個成交就夠。市場上面平均可能幾百個唔同區份的成交，已經可以將500萬的樓推600呢個位。到時隊長預期的情況係好多樓估價會好易就650 / 700萬咁，但係成交就會大幅再減少，因為真係買得起的人又唔會好多，但係谷買的人又會有，而賣樓的人當然無樓的你係唔會明白，乜野叫賣左買唔番，所以一样會卡住係呢個位，形成一種拉鋸，成交減少，但財富就會不斷累積，累積的購買力就會流向可購買的資產的方向。 一直以黎，香港普羅大眾黎講，入門一定買樓，之後可能都係諗多間樓，或者車位。買工廈商廈鋪位，會係進階投資者的天下，果個世界比較上係強者同機構投資者為主打，散客一般都係買到一兩個已經好叻，但一定唔係主打，往往可能因為小生意要個工場要個鋪先諗。所以，以普通人黎講，買實物資產的主要出路得兩個，一係買樓，一係車位。 然而，政府係不停出台去打擊樓市下，樓市開始已經有左抗藥性，對過往的招數大家都已經明白，最多咪就係一句唔玩囉，但係樓仍然隨需求同通漲而升，就算假跌後都係升，而隊長想指出的係當樓市升到全部都要過600萬之後，將會出現一個好奇怪又尷尬的情況，就係真係好多好多好多好多人都買唔起樓。點解？即如果你要買601萬，你要...

其實經濟係一個週期大家都知，不過往往係週期的底部，真係無乜人會有心入市，但係週期的中段尾段，就會好多人一窩峰咁入市，推高個市，因此巴菲特講的別人貪婪的時候你要小心，別人小心的時候你就貪婪，係直接指出週期上的操作方式。 由舊年10月隊長寫過一篇 收息股價值投資 叫大家入市，當時全城吹淡風，股樓一片死寂，不過就係呢個25000點的水平，隊長就將所有基木同MPF全攻型進攻，而且股票楂到呢家都叫有D斬獲，換碼樓同車位全部都跑嬴大市，雖然當中換碼其實有成本，之不過以減債計再制造更好的現金流，今次呢一輪的換碼大行動，以今日睇番真係好成功，至少全部車位都係屋苑最低的一兩個成交，而目前帳面已經有明顯的賺幅，又大幅減債。 上個星期股市突破左30000點就回落，其實每次攻呢D大位都係要D時間，不過呢個長假期的ADR亦已經成功一下破左30000點，睇黎大市上番30000呢個水平都唔會係咩大問題，而處於上升軌的大市，應該唔會咁快就大調整，估計起碼上到32000先會有比較大的調整，而時間上可能仲會拉長多三兩個月，理論上香港的樓市將會係未來呢兩三個月持續升溫。 現階段仲有好多朋友問我呢样買唔買得果样買唔買得，隊長好多時會用射龍門黎做比喻，之之隊長認為舊年底係有2仔Q仔的格局，理論上大大注都值搏，嬴面好大。但而家呢，大約可能係4仔10仔咁吧，買樓買車位買資產長線唔會有錯，但比如股票咁，係要短線回調你又吹佢唔漲，所以都仲有機會比你搏，但係個值搏率就好因人而異，隊長個人就又係成手貨啦，而家的策略就只係楂貨楂多三兩個月就減持一下，但係未來非常短線下應該會再升一輪，但呢一輪可能比如話係5-10%咁講，如果純為短炒，成本上可能都太高了只睇呢個升幅就唔值，但係如果手持有貨的，相信等多2-3個月就可以睇到呢個升幅。 好多時好多人都係手痕痕為買而買為炒而炒，不過睇番能夠長嬴的巴菲持同埋索羅斯，每年都係做20幾%回報，就成就左今日的佢地，關鍵唔係你貼中邊一隻股王，當然可能股王會令你賺得好勁，然而要長勝的話，如果你無咁大的投資團隊同資金，唯一剩下來的，就係要有冷靜的投資心態，學賭俠話頭，你想悶悶地咁嬴，定係轟轟烈烈咁輸，都係好在乎你平時係咪一聽到投資就會興奮到跳起。其實相反，投資／投機都好，簡簡單單，人地唱到淡到PK的時間，你就入貨，個個都吹到4萬點5萬點時，有得執就止賺，唔嬴到盡，咁一年...

最近如果有去開地產鋪，應該會發現一個好明顯的現象就係好旺好旺。唔係講笑，我近期試過去中原星期日係竟然有短時間係無人係鋪頭咁誇張，而個市的反彈力都幾驚人，呢家有部份成交已經貼位舊年的高位，當然唔係全面去到果個水平，但係真係三五個成交已經由年底的底位跳番上好多。 有代理朋友話嘩呢排真係旺到不得了，咁样真係好難搵食，因為可能勁多人去搶三幾個盤，而果三幾個盤好易跳好大口價成交，即你跟緊果個客，可能都係諗住仲要傾十萬廿萬的上車客仔，但係稍一不留神個業主可能已經比人食左個盤，又或者反一口價，大家都係爭果一兩個最貼價的盤，非常難搞，好容易跟跟下自己個客唔夠實力就會收工，兩下玩完。 樓市旺，車位都一样上番D，不過車位就無樓市跳得咁快，但係高成交都開始見現。政府呢家首次回應咩一地多用的政策，係長沙灣整個咩智能停車場，講真其實真係唔好玩啦，起得黎都三幾年，先提供二百幾個車位，得啖笑啦，如果要解決就提供誘因比發展商好過啦，不過無，所以車位市場其實都係缺市。 股市方面去到29000就好反覆，呢種反覆好煩人，升下跌下咁都無方向，你以為佢破頂，佢就又跌番落黎，你以為佢要插了，佢又升番上去，呢種悶市就係隊長多年唔踏足股市的原因，最怕呢種唔上唔落但要你慢輸的市況。 呢排寫少左文章，主要原因其實個市都無乜好講，勢頭其實係早已形成，由舊底十二月隊長已經講要買，呢家呢，已經又去番一個買唔落的位，不過換左碼去車位度，就有得冧比多三幾個月個市升下煲下就出番一件補充下資金。理論上如果個市唔再亂插，相信資產勢頭仍然會上升至起碼六七月，到時食一件糊都未遲。 唯一的係呢家其實討論區有時見D年輕人點點點，其實都可以話無得諗，最後的上車機會係舊年底出現過，呢家買又要貴一球起，再有無下一個比年輕人上車的時機，老實真係唔敢講了，但如果呢一刻叫隊長諗買層樓比120萬首期供480萬30年，真係攞命都似。

樓市回暖，雖然未講話熾熱，但已經有不少高位成交，而且入市進取。係呢個時候，隊長繼續回顧自己的資產配置，其實咁多間屋之中有一間一直租金回報唔太理想，最近有一個連租約的買家Offer，出價其實好唔錯，算係近期的極高位，不過隊長要罰息，減佣減罰息下，算叫做OK，但諗諗下由於入左咁多車位，最後決定賣！ 賣的原因很簡單，套現。套現黎做乜？本來唔知的，但其實隊長係睇樓升的，而且賣埋呢間，其他的都算係核心資產唔會賣，所以賣的時間都係好掙扎。然而，就算呢層樓舊年最高位都係同呢家差大約40萬，又係計番果條數，如果賣出套現買到個車位係落後40萬的，就可以大幅減債又平得番個升幅。 有讀者話，喂你賣左如果想買番又要比15%條數點計? 呢條數可以話你聽其實係唔會咁計，首先如果你諗住要買的話咁就唔應該賣，手痕嗎？而如果你又諗緊要買番層樓的話，估計你手上都未必有好多層樓，所以你會諗增加更多樓的資產。然而，隊長的資產配置係大量的樓，呢家反而見到有水位轉移資產配置至車位，又減債唔駛供樓又有租金又有值搏的升幅，點解唔做？ 如是者，賣完當日，隊長即刻又尋下寶睇下有乜好野，代理A就話呢家無晒貨啦有都唔值買唔推比我。代理B就話無，要搵下，而第二日就有一個，我睇番佢呢家叫價都仲係12月底一月頭的水位，心郁的，但個水位唔夠深。傾左一陣，開價，最後平多5%入，代理話其實佢同一個停車場之前做左一單刁已經係我呢個價的15%之上，所以某程度上等成交一出都已經當贏左一半，咁都幾好，執番十幾皮。 所以賣完樓之後，呢家長債將會大減，短債就仲有D P-LOAN要等到期清，好彩車位全部唔駛上會無野怕，仲有淨的Cash都係養住個Cashflow。預期其實呢家個市係岩岩起火，估計到七八月又會升番一浸，如果到時可以去番舊年高位，咁就出番一個車位又套下現先。 可能你會問，喂隊長你係咪唱好車位啊係度以後唔買樓啦？錯了，隊長一样睇好樓的前景，但呢一刻的情況係，似係樓市彈得快個車位小小，所以制造左一個短線的樓市先升而車位後跟的情況，可以做到較高的賣樓較低的入車位。有朋友亦問我，無咁多資金可以做乜，我而家都係推介買車位，唔係話車位有乜好，但個市升，就當車位跟住升都已經夠，唔駛特別標青。不過，我又介紹左朋友去搵我代理搵盤，點知係我買完果個車位之後，代理覆我朋友，唔好意思，呢家真係無荀盤推介住，最後的荀盤比隊長買了。...