文章

顯示從 1月, 2016 起發佈的文章

遍地屍骸

由一月初開始到呢家,恆指一路插未停過咁濟,比你彈一日300點咩,聽日跌番個五六百點你嘆,呢家行出街你都可以睇到人流幾少,可能你會話都係天氣凍姐,之不過就我公司的數據亦睇到,成個環球經濟真係唔係好掂,強如Apple都會有銷售的Concern,所以今次呢個中型股災,除左令到好多有股票係手的人都受重創之外,實體經濟都真係唔可以忽視。 之前隊長話如果股市係21000點似是跌定了,樓市將不受影響,而好衰唔衰呢家股市玩到19000點的時間,樓市的確衰左10幾20%了,大局係咪已經定了,其實隊長都唔係好敢講,因為股市未來如果再要下行,係的確會繼續整衰樓市的。但是,有樓的你都唔駛太擔心,因為一來今日股市係升左538點,夜期仲再高水259點,如果又好好彩今次能夠喘定的話,咁都係一個緩衝的時間。而且,今日隊長都係低位入市溝貨,拉低番之前個倉位,希望係回彈之餘亦可追番小小虧損,講真而家的股如果可以保持派息,下下都有7厘以至8厘的派息率,真係極吸引。 講番樓市的話,其實又有番些小輕微變化,如我所講一直我都等緊破底價的盤比我,但自從上一個比人捷足先登之後,我可以講話個電話好靜,而家竟然係無人報盤。而最近有代理亦講明,如馬鞍山一帶突然有大量業主封盤轉租,放租盤反而呢家多左80個,好明顯呢家個市係似是見左短暫底,騰雞業主似乎都已經走晒,要再鋤落去的話其實都好難,當然唔排除仲會有個別業主頂唔住要收皮,但睇番部份以為跌到PK的報紙成交之外的成交,其實真係唔係太得人驚的。 講到等餵盤,有網友話係呢個時候仲去搏會唔會太進取?其實老實講睇你點睇,如果你諗住儲樓的話,即你係睇好未來香港樓市終會上升,咁買得起的時候就要考慮係咪買。隊長都好後悔一年多前點解可以買多間時而無買,對比而家其實都仲有水位賺緊錢的。當然,另一個重要的問題買同唔買,除左大市的去向之外,就係你的個人能力。大市升跌,你睇乜都好,都可以錯,所以風險對於每個人黎講其實都唔一样。 舉個例,你去澳門賭錢,最低注碼300蚊一張枱,對於有D人黎講完全唔係錢,但又對於有D人黎講300蚊仲大過你的媽媽。所以,投資都係一样,你如果得兩萬蚊人工,手頭得果三四十萬,買左層樓就唔好搞咁多野了。不過如果你有廿皮一個月,手楂幾球,呢家都係做緊幾百萬mortgage而已,份工又穏定,老老賓賓買多層三百萬樓,算得乜?都係果句,無人知升定跌,但如果你

捷足先登

又過左成個星期,我個Blog繼續同大市一样靜到暈,但其實隊長並沒有停下來,反而係一個靜的市場,先至多野搞,但問題只係要小心去搞。 有好多人話跌市入貨就好似接住一把飛緊的刀,你接到刀柄就唔駛損手,但好多時好多人都係損手離場,包括隊長我十月入的貨,好彩中間都不停減持,股市都真係唔係隊長杯茶,蝕就一定有但都叫無傷大雅。而同一道理,係樓市接一把跌落黎的刀,係咪一样大穫呢? 其實如果先退後一步黎講,如果你係樓市任何一個時間你買左捱得過低潮,到今日都應該係賺的,特別係收租果D,當然如果你係98年買果堆就好痛苦,因為你發現點租都要經歷5年熊市先可以叫做好番D,呢5年對於有好大部份香港業主都極難捱。之不過,如果你捱到超過十年十五年到今日,連收租,應該都係賺的,呢條數就好容易計。 所以如果唔賭未來幾年係熊市的話,以及手頭上的錢係有足兩年的供款或以上,其實都無乜野好怕。而如果你的錢係多於兩年供款的話,甚至有更鬆閒的錢,其實都可以諗下係跌市入貨,因為儲樓的精神就係買得起的時候買,之前升到食唔落,呢家有得平入,如果又鬆動,的確可以考慮考慮。不過如果你個人係睇淡大市,包括全球放緩的經濟的話,咁就真係唔好亂黎,而且,隊長都承認呢家個環球經濟唔係好掂,甚至係好亂。隊長個本業都睇到個銷售數字下滑,認真PK。 但巴菲特教落別人恐懼時我就要貪心,所以隊長呢段時間都四出搵貨,但大前題係真係有三個考慮點,一就係要有充足的時間去上會,二就係要肯肯定借夠錢上會,三就係件貨唔夠平賤都唔入。但正正係呢幾個因素,令隊長又被捷足先登,希望賽翁失馬,煙知肥福啦。 事緣隊長一路傾緊一個放盤已狗的單位,原業主由330一路劈到320,300,再去到285。其實講真呢個單位呢口價,算唔錯,但我仲狼過華秀隻貓,開個273比人,其實一路都傾得似層層,問過我主因係我D錢未到位,都唔敢開大個價,而且仲要長成交,到最後其實人地只係想我提早小小,但果時仲係搵唔到個Banker計清條數唔敢亂黎,但我知個單位值300-320左右,老味,就係一個weekend個單位290走左,而我知如果我提前成交的話,其實應該275內食到,timing問題。 不過隊長都同自己講,可能仲都係好事,或者下一間仲平。但最近平果堆真係狂成交,稍稍平D的都沒有,大把人搶平野,相信過完年應該無平貨,希望呢排趁股市弱可以搵到個荀盤。

2016樓市展望

踏入新的一年,一番到黎股樓匯都可以用仆晒街黎形容,股市一番黎就玩個小型股災直衝20000點,匯市就人仔同埋北韓的金仔都已經搞到成個亞洲地區亂晒龍,樓市就已經係劈價聲不斷的情況下日日向下劈,不認不認須認,呢家個市真係唔係太掂。 不過,大家又唔駛太京,因為唔掂同散晒又唔係同一件事,之不過會唔會散當然就仲有360日比你去睇啦,但就隊長呢段自我休息的時間所見,其實個市又唔係差到咁。 就如我上一篇文章所講,呢段時間咁過癮,當然就係積極去睇下樓,看看有沒有機會擇肥而食,執件荀野啦。係好多人不停吹散個市的時候,其實隊長亦見到好多人係度準備入市,當然所謂的好多就無係升市時果D所謂的剛需咁多,始終好多人都未有能力就總會係度大叫買唔到。到呢家其實有好多樓已經有10-20%的下調空間時,佢地就會唔見晒。 但講番個市場先,如同聖誕報完堆盤的情況一样,到呢幾日其實都見唔到大量的減價盤,不過反而就會有少量的大空間減價盤,即個別的業主要出貨,佢地的議價空間好大,所以只要有心搵,其實都有可能搵到D平野。據同代理講番呢,近呢一兩個星期好多資深的投資者都出番黎開始搵野,特別係1月2月呢D傳統淡的時間,靜左淡左一排的樓市已經吸引到好多投資者的注目。 目前樓市其中幾個較大的陰形,包括股市的陰濕式下跌,呢幾日都仲未搵到支持位,如果唔識停的話,可能引發較大的樓市調整都講唔定。加息方面,隊長認為都只係心理因素多過實際,始終而家根本無加過按息,而匯市亂到咁,美國一定唔會再係短時間亂加去增加個風險因素。供應量方面,政府好配合咁不停吹大個供應量講今年有兩萬定三萬個單位,但個人黎講又係相信水份高於實際。三大因素當中,隊長認為股市下行係最大的風險而已。 總括黎講,實際環境個經濟條件唔係太理想係真,但如果跌左20%的樓價似乎已經反應過頭,只要唔比股市拖落去其實應該好快搵到支持位,就我所理解近期的成交都的確多左好多,大部份都係-10至15%已經瘋狂成交,應可視為初步係有支持的。所以隊長預期今年上半年可能都係會陰陰地向下,第一個反彈位可能就係三月的小陽春,唔彈都應該有支持,到下半年應該就會回升番,全年黎計因為而家已經跌左落黎基數低左,可能仲會有5-10%的升幅。