文章

顯示從 十二月, 2018 起發佈的文章

2018總結

相信對於好多有投資的人黎講,2018年應該會係一個幾困難的一年,股市當然首當其衝,由2月跌到12月咁濟,雖然10月底叫做話彈番小小,但係貿戰的陰影下都係衰的為主。股樓債某程度上都係同一情況,只係調整幅度同時間唔同,呢次慢熊亦令到Blog界靜了下來,股神債神樓神劏神都少了出文,連之前玩Bcoin公仔機的,都失了蹤,唯一最高調的可能得番派錢果個。 黎到2018年12月31日,當然亦係時候總結一下,今年其實都十分感慨,但理性的檢討黎計,今年初設立的三個目標ABC,都竟然神奇地相繼全數做到,之但係個數字就有所偏差,目標A的話就少了約20萬,目標B的話就少了約50萬,而特別係目標C,其實呢個都值得講下,因為隊長為了慳銀行的罰息,一直唔想賣一層回報低而又佔隊長樓之中最大比重的樓,當時的罰息數字約8萬,要11月先過罰息期,所以本來係4-5月就想出呢件貨之時,當時高位至少比而家高出50萬,所以為左慳8萬而平左約42萬,當然呢其實收多半年租部份都拉近左個差額至約30萬左右,問題只係一額汗,因為大家都知個市係差,成交極少,但都好彩叫做甩到,所以C都係叫做完成。總括黎講,ABC都達成了,但差額距離目標約100萬,但係現金流就上升番好多。不過感性的係其實呢層C樓都住過三年,無奈都係要分手。 分手的唔止樓C,還有的是隊長的工作。磨劍十年,行左呢條財務自由的路咁耐,就係知道工作的道路並唔係永遠的順境。好彩隊長在好境時就知應該點行,一路鋪住後後路,到今年已經聞到陣燶味時,托頼仲係樓市套到現金出黎,所以就算要同工作分手,財政上都還可以。然而感性上,就好似一隊軍隊一樣,曾經領軍十載,立下不少汗馬功勞,曾經如何風光也好,一個改朝換代,一朝天子一朝臣,成隊軍隊都可以唔見左。當然無野係永垂不朽,但偶然諗番過去,特別係呢三年的時光,有時真係一夜之間就會成個局勢倒退,失速是一個事實,懷愐過去常陶醉........ 其實回想番其實隊長的人生都好幸運,曾聽講過上帝就算關左隻門,都會開番隻窗比你,呢個都好似係一個幾托頼的事實,問題只係要走出個低谷,而係人生的唔同情況下,感性的低谷面對住逆境都係投資者永遠的心魔,而隊長係人唔係笛子魔君,就算再理性再有魔性,有時亦都相當沉重,只是投資路上永遠都係孤獨的,所以亦只好自己面對。但財政投資上,事實上隊長自十一月中底後都好積極咁重返市場,及至而家已經又買番小

一河之隔

過左深圳河,隊長又踏進久違了的羅湖口岸,再步行至熟悉的酒店,回想十年前隊長都算係一個深圳通係國內打滾,心頭都湧起一陣感慨。古語有云十年人事幾番新,的確回想老東家以至整個行業的龍頭,不單止景物都不再依舊,人物也更已人面全非,特別係中國過去的神奇十年,那時候的小將,十年后的成就都已經超越香港人。 去深圳的原因係有生意的伙伴想同隊長我傾談,而呢個伙伴十年前只係一間幾個人的公司,發展至今有起有跌,但個老闆應該都有過億身家。閒談中,回想到有好多舊同事的去向,有的自己開廠賺過千萬;有的炒股賺幾百萬再係舊鋪月入6-7萬人仔;有的兩口子開間貿易公司年賺二百萬;有的楂住某老闆的黑材料所以可以月入10萬唔駛做;呢一班都係同期的大陸同事,肯摶的幾乎都唔會太差,三幾萬月入基本都唔係咩錢,創業亦係一個常態,但一個好可悲的事實係,當時領軍的二老闆,而家人過五十仍然係二老闆,不過做到隻貓咁都係搵唔到10萬港幣一個月,仲要成日擔心摺左間公司失業,對比番十年前二老闆同呢班小將的收入,呢十年真係完美解釋到大陸對比香港的發展速度。 現實的情況係,係大陸的一天,沒有諗太多樓的事情,反而一個傾談合作的飯局,回想種種的可能,人的思維連同氛圍都係引領你去諗創業,而一個又一個身邊的人係大陸做生意都成功,的確係感到機會處處。不過當又一次過番羅湖橋返回香港,人又會自然清醒番,整個思想的確會變狹窄左,創業兩字亦回到隊長一貫的人生宗旨---嘥L氣啦,的確係香港創業生存率極低,租金同人工都唔駛旨意會合理,而且客路又少機會又少,思前想後同早幾粒鐘係一河之隔的羅湖根本係兩回事,香港,的確只係一個炒炒炒的地方,創業唔係唔諗得,不過最緊要你輸得起,而隊長我呢家可以講,輸唔起,又或者講,搏黎做乜,夠食就算啦。 思路繼續飄移,其實睇番過去呢十年普遍的大陸同事雖然能力上其實係無乜進步,但實際上都有超大的轉變同進步。唔係話乜野,有D能力普通的人其實都係能力普通,但呢個世界呢,真係唔係話同你講能力,有時好運又好緊要,有機會又係好緊要。成個行頭巨變,水鬼又會升城隍,明明係廢料的,唔知點解又會被委以重任,然後其實搞到一穫粥咁咩,都無乜所謂,大公司仍然會出糧比你,而且有個組織有個架構,就算然會有領導人有職銜的人,外人唔知一睇個職銜都真係會嚇親。然而,坐係香港office的一班老員工,雖有過半的人已經唔識,但係做得耐仍然係度的,

[BK018] 樓市拉鋸戰

由上次發文開始,又過左兩三星期,股市樓市都非常波動,一來無諗過係貿易戰停火後馬上黎一單加拿大捉華為公主事件,而中國又捉番幾個加拿大人做人質,係呢個國際環境氛圍下,美股就即時急速調整,港股其實都相對幾硬,美股跌500的日子都好幾個,但港股都係25500-26500徘徊,叫做無話比美國拉下之前的24800左右的底位。 樓市係咁的情況下,其實理應好差。之前屯門個超級納米盤銷情之差雖然可見係十年難得一遇的差,平心而論如果市況真係會唔小心一Q清,但可惜生不逢時。二手樓方面,隨住居屋抽籤完結,其實都有好多成交回流,成交量的確上升,但係亦不得不承認力度上升不足,但減價盤似係遇著回流的購買力對上而有回暖的成交,呢個係一個好事,但係要破頂重拾升軌,可能係咁样的市況下都要多點時間等突破點先得。 本來的一個突破點就係加息,聯儲局昨日加息0.25厘,本來侵侵同市場人仕都勁啡聯儲話股市跌到咁唔應該加,不過獨立自主的聯儲局仲要全部贊成加息,美股又一似跣低,本來呢個壞消息理應都係要繼續挫下樓市,不過今日匯豐中銀同渣打都講明維持P不變,即係話香港資金仍然充裕,而且實際上美國加香港又再一次唔加,都算係壞消息中的好消息,至少無進一步再挫一挫香港樓市。而且,根據利率期貨,市場亦仍為出年聯儲局會減慢加息步伐甚至唔加,都係一個少令樓市多一重忍憂的預期。 而另一個突破點就可以參考凱匯,夾起動九龍東,地鉄上蓋同新CBD的prime location概念下,信置以先低後高的唧牙膏式開賣,隨即收幾千票沽清首批樓花,然後第二張價單稍稍賣貴D都一样照清,隨後的價單其實都再貴左,就目前而言應該銷情都係好正面,呢個盤係新盤市場下一枝獨秀,食盡一二手的購買力,其實都可以睇到係18000蚊一呎的水平下港樓係絕對有支持,呢個盤咁賣法雖然唔能夠帶起全港樓市,但為香港樓做探熱針把把脈都睇到香港樓市係有動力有心跳,只係目前唔爆發出黎住。 雖然隊長預期新年前後有小陽春,但以目前的情況睇黎,小陽春應該好難係年前出現,始終政治野呢家遇著中美兩國成日磨拳擦掌,就當無乜實際打擊,但日日一報有乜新動態個股市就痾拔甩,的確要更多時間睇到有實際進展先可能會有突破。不過,大家睇到一样野就係呢家中國有錢佬同官應該都唔敢再積極投資美國加拿大等地,好話唔好聽一間錢去左但人去唔到,除時變失匙夾萬。就呢個情況下,香港仍然係有吸引大陸資金

[BK017] 樓市將準備回升

圖片
經歷左一大輪的淡消息後,十一月隊長其實視為谷底,於十一月底居屋的購買力釋放,整個十一月股市都由低位反彈左2000點左右,再加上貿易戰休戰90日,未來似乎係一個可以比市場喘息一下的時間,而下一個關鍵位將會係十二月中,聯儲局係咪會一如預期咁加息,定係又因為如之前有官員放鴿話可能已達至中性水平而唔加息,都會再比大市一個推動力,不過當然係推上定推落就見仁見智。 之但係隊長認為十二月加息本來係市場確認左好耐,如果突然間話唔加,背後的意義可能就會同侵侵成功用口技壓制聯儲有效,而如果朝呢個方向的話,意味著明年的加息速度都會大幅減慢,呢個就會係一個非常正面的市場訊號。所以就隊長個人睇法,加的話市場本身都會接納,唔加就可能會開P慶祝,所以都應該會係一個比較容易托一托市,順便係年底粉飾一下廚窗數字的機會。 股市方面,其實係 10月31日隊長都出左一篇文 叫大家可以入下D收息股,如果當時有入的話,呢家都應該有8-10%的回報,雖然未到年底唔敢講仲會唔會炒大穫,始終美股都試過無啦啦痾拔甩跌800累香港慘跌,然而如果你認為個市唔係咁差的話,隊長出文果一兩日其實都係本年最低最低位,真係唔係話講笑,我亦有係果段時間叫身邊朋友入市,唔買樓都應該買下股,如果有跟買下正股的話,應該都有所斬獲。 通常D人都話股市行先樓市半年左右,呢個立論雖然隊長唔係太同意,畢竟時間差同埋幅度都唔一定一致而且亦有多次背馳,之但係用呢一個坊間都好多人講的立論黎講的話,股市都已經回升,其實樓市亦都會回升。係過去一週,汪總都指出無論成交量同埋成交價都係回升的,實際上其實呢三個月至半年的成交量係好低,表示的係執到荀野的人其實係少數,而且大家不防比小小心機去做下功課,睇下各區大屋苑的成交,你會發現同報紙講的野數據上係有極大出入。 就以隊長跟蹤的幾個細價屋苑計,減價盤有無呢?有的。荀盤有無呢?有的。但係極荀的量多唔多呢?唔多。可以簡單咁講,最近幾個月的價錢平均一定平左是對的,但大家都明白有唔同座向唔同質素的數,就算創新高時都會有低3-5%的成交,而普遍係呢段時間成交的,亦大約係低3-10%不等吧,就呢一個層面黎講,可以係話議價空間大左,但係咪話樓市大冧市呢?咁就太天真。 另一方面,有無平高位10-20%的盤成交過呢? 答案都係有的,不過要搵就要細心D去搵佢出黎,即唔係話個個成交都係跌得咁金,但的確有