2018總結

相信對於好多有投資的人黎講，2018年應該會係一個幾困難的一年，股市當然首當其衝，由2月跌到12月咁濟，雖然10月底叫做話彈番小小，但係貿戰的陰影下都係衰的為主。股樓債某程度上都係同一情況，只係調整幅度同時間唔同，呢次慢熊亦令到Blog界靜了下來，股神債神樓神劏神都少了出文，連之前玩Bcoin公仔機的，都失了蹤，唯一最高調的可能得番派錢果個。


黎到2018年12月31日，當然亦係時候總結一下，今年其實都十分感慨，但理性的檢討黎計，今年初設立的三個目標ABC，都竟然神奇地相繼全數做到，之但係個數字就有所偏差，目標A的話就少了約20萬，目標B的話就少了約50萬，而特別係目標C，其實呢個都值得講下，因為隊長為了慳銀行的罰息，一直唔想賣一層回報低而又佔隊長樓之中最大比重的樓，當時的罰息數字約8萬，要11月先過罰息期，所以本來係4-5月就想出呢件貨之時，當時高位至少比而家高出50萬，所以為左慳8萬而平左約42萬，當然呢其實收多半年租部份都拉近左個差額至約30萬左右，問題只係一額汗，因為大家都知個市係差，成交極少，但都好彩叫做甩到，所以C都係叫做完成。總括黎講，ABC都達成了，但差額距離目標約100萬，但係現金流就上升番好多。不過感性的係其實呢層C樓都住過三年，無奈都係要分手。


分手的唔止樓C，還有的是隊長的工作。磨劍十年，行左呢條財務自由的路咁耐，就係知道工作的道路並唔係永遠的順境。好彩隊長在好境時就知應該點行，一路鋪住後後路，到今年已經聞到陣燶味時，托頼仲係樓市套到現金出黎，所以就算要同工作分手，財政上都還可以。然而感性上，就好似一隊軍隊一樣，曾經領軍十載，立下不少汗馬功勞，曾經如何風光也好，一個改朝換代，一朝天子一朝臣，成隊軍隊都可以唔見左。當然無野係永垂不朽，但偶然諗番過去，特別係呢三年的時光，有時真係一夜之間就會成個局勢倒退，失速是一個事實，懷愐過去常陶醉........


其實回想番其實隊長的人生都好幸運，曾聽講過上帝就算關左隻門，都會開番隻窗比你，呢個都好似係一個幾托頼的事實，問題只係要走出個低谷，而係人生的唔同情況下，感性的低谷面對住逆境都係投資者永遠的心魔，而隊長係人唔係笛子魔君，就算再理性再有魔性，有時亦都相當沉重，只是投資路上永遠都係孤獨的，所以亦只好自己面對。但財政投資上，事實上隊長自十一月中底後都好積極咁重返市場，及至而家已經又買番小小谷底貨，唔敢講話已經賺左，但所有入貨的野對比番市場高位時的成交，絕對係可以追番晒今年的ABC目標差額，但係槓桿少了，流動性大了，債務少了，都係非常健康的指標。


去到呢度，可能你又會諗，咁隊長你又買左D咩可否開心分享下啊? 目前黎講由於都係未完成交易所以都真係怕小氣，有機會會再分享。但2018年總括黎講，感性上可能經歷唔同的低谷，但財政上其實反而仲好過之前，當然整体樓價有所調整，係總資產上係打左個折，但從現金流方向以及現金量黎講，都係持續提升中，始終好明顯的係，租金真係無跌過。


2019年的忠告，簡單的講，醒目的投資者係12月已經出動，隊長都搵野都搵到R野先搵到小小荀野，所以見左個短期底係真的，要買野上車的，真係要趁市靚要快手，呢家有票可以慢慢揼多兩口價，但當市場一有回流的動力，可以好肯定咁講呢家無乜荀盤更無乜實盤，動力回流之時可能會係以跳價形式流動。


點都好，2018快將過去，如果今年對你或妳唔係一個好的年份，希望你/妳有美好的2019，隊長亦係2019將會訂立更多目標，希望遲D可以和大家分享，祝大家新年快樂。