2026是否買樓的好時機呢？（一）

大家好，好耐無見，希望大家係過去崎嶇不斷的才自路上都順順利利，邁向成功。

喺2026年，市場突然間活躍起來，擺脫過去三年的跌勢，由一月份開始已經可以話癲咗咁瘋狂成交，樓價係低位反彈左15%不等，身邊開始亦都有朋友談論買樓的情況，特別有一位熟悉隊長的小朋友都開始萌生買樓的念頭，故此我特別執筆，過下筆癮，俾呢一位朋友同各位小小的意見。

係坊間有好多唔同兩邊的意見，一方面係死貓彈，另一方面就係進入上升的軌道。直接啲講，隊長認為樓市應該在2025年底的時候已經見底，而家係確認上升的軌道上。

其實過去三年，樓市一直向下走，一方面當然係經濟原因，過去幾年經濟都真係仆晒街，疫情過後成個經濟係結構性轉變，網購成為新潮流，在家辦公亦成為新常態，好多企業都需要面對經濟下行，以及需求下滑嘅情況咁不得不割肉去保留實力。當中可以睇到，好多人因為網購而失業，零售市道氣氛好差，商場街舖辦公室需求跌至冰點。大家咬緊牙關渡過咗三年，呢三年其實轉行的轉行，慢慢已經用三年時間消化了很多的負面因素，受惠新經濟的企業亦都慢慢站穩市場，結構性的下行已經慢慢完成。

生活其實係仍然要繼續，呢兩三年成交亦都低迷，好多人都唔敢置業，就算結婚生仔好，都係可能租樓行先，所以租金其實沒有太大的下調，但係亦都累積咗好多購買力，我哋講緊係大約三年的購買力，呢一股購買力其實都只係等某一個時機去爆發，引發呢一個爆發力的奇點，就係租金對於樓價的回報，以及減息的成本效益走到一個觸底的位置，即係話息率好低，樓價好平，供樓抵過租樓的多重因素下，樓市就開始變得好吸引，釋放了早着先機的購買力，投資者進入慢慢令市場氣氛便好，再連帶用家開始都入市，呢個係2025年底觸底時的表現。

當然係淡市的時候，大家都可能冇咁關注樓市，睇少咗新聞，接收少咗樓市的訊息，因為淡市的時候可能大家都唔會想聽太多，反正都係可能劈劈劈跌跌跌，因此可能自己都會有滯後的時間。隊長都係大約的情況，好話唔好聽跌到仆街的時候都眼冤，不過好彩隊長係食租所以都只係脹面的損失，實際影響唔係好大。

但係隊長的個人經歷其實係來自於本身10月到期要轉按，銀行估價當時舉例一層細價樓由最高位400萬，轉按時只估300萬，其實都好誇張，不過轉按隊長我都仲係套到現，就開始諗屎窟痕會唔會可以買多層樓，所以就開始重新熱烈關注樓市。

當時我第一層睇的，係一層油尖旺區的遺產貨，要搭𨋢上一層，當時叫價330，有500呎，其實呢個呎價真係都要開始幾吸引吓，不過始終搭𨋢上一層，同埋我未ready，因為按揭都要計我入息好撚麻煩（multi mortgage)，所以都冇比價，但我知當時嘅事況嚟講，應該可以鋤到好深，我自己心目中呢一間屋的價錢應該大約290左右，不過冇票冇錢冇得出聲，所以睇完就算，然而最後喺12月成交咗，有投資者用280萬買入，我心諗屌，錯失良機。

喺我成功轉按之後，就開始積極睇樓。由於做完轉按，當中我知道我自己收入證明不足，所以唔肯定夠唔夠計的情況下，一定要諗到好盡，故此我睇樓的方向都係大約300萬左右的貨，以當時12月黎講，其實都有一些，我認為係二線的選擇，不過反正而家都係屎窟痕諗住買多層，所以梗係等執荀貨，因為市場氣氛都唔算話極度熱烈。

一路睇咗接近一個月，其實都冇話特別去出手睇樓，但係日日都會睺住28，一有新盤，我就會即刻個腦喺度幻想轉下，計吓個回報點，荀唔荀等等。直至到有一日，我突然間見到一個我之前whatsapp過的代理，有一個新的二手盤出現，呢一間系九龍城，作價320萬，550呎，都係頂樓上一層，入到去我發現空間好大，彩光非常好，個景亦都非常靚仔，係當日我已經非常之心郁，不過有趣嘅係我同一日之後係安排咗去睇吓人哋拍賣，所以我仲未採取行動，就去睇吓個拍賣先.....

待續