拒絕買樓的人

喺我認識嘅人當中，不乏有好一部份人係堅持拒絕買樓，當然每個人都有唔同嘅原因，不過這些拒絕買樓的人，當中我有認為有好大部份係有一個共通點，就係基本上唔撚識。

即係買唔買樓，先唔講有冇絕對啱同錯，即係隊長我成日叫人買樓，唔會話一定要否定唔買樓的人有問題，不過前前係，你要說服到我點解喺你自己的情況唔買樓。舉例，我可以接受買過樓，但係又輸錢的人唔敢再買樓，又或者可能情況唔許可，例如屋企人好需要佢哋留住資金有個安全感之類，這些我可以理解明白，亦的確唔係人人都應該買樓。

然而，以上多數都係小部份的人嘅情況，大部份更多唔買樓嘅人佢哋嘅心態係對我嚟講只係唔識。唔識有好多方面的情況，舉例未買過樓好驚，又或者純粹係一種個人感覺香港嘅樓價離撚晒譜，完全係好似創世紀入面最經典嘅問題，就係點解香港人要用一世去供一層樓？如果純粹投資，可以做生意，可以買股票，冇必要去買樓投資咁。

一再強調，我唔係否定唔買樓就係有問題，唔買樓就係戇鳩鳩，其實某程度上我係開心，因為呢個市場就係需要唔同嘅人存在，即係我買樓都要有租客，個個都買樓咁邊個租樓？隊長我想講嘅係，其實好多人對買樓成個概念，成個投資嘅理解，係皮毛都不能再皮毛，呢一樣嘢係我覺得極度可惜的。

隊長我一再強調，呢個社會喺學校入邊教中英數，教唔同學術的學問，補習亦可以有唔同的興趣都可以學，偏偏最重要點樣去買樓投資令自己人生過得舒服少少，係冇人教，而且係網絡上的訊息都係相當狹窄。關於買樓的文字資訊，一係就只有新聞講樓價升樓價跌，邊度有新盤，一係就討論區你一言我一語，好的唱好，淡我唱淡，但係如果你想搵一個深度討論投資樓市的blogger或網站，你會發現完全搵唔到，最多都只係可能一啲投資的Blogger一年講幾十樣嘢，其中一兩篇文講吓樓等等，極少極少，甚至乎我真係搵唔到一個集中火力講樓的blogger去提供一些買樓投資的心得分享，對比起股市嚟講，買樓的學說真係好難令一般人，特別係本身已經有既定立場覺得樓價係嚟撚譜，或者結婚先至要買，或者會好撚驚而門前卻步的人去接觸。

當然其實市場上面亦都有一啲人定期會開班教買樓，有啲導師係真係有料，有啲就一睇就知吹到阿媽都唔認得，不過背後又係有個問題就係每個呢啲買樓班，都有背後嘅Agenda，就係個導師會希望學員加入佢哋嘅計劃，引致其實又唔夠中肯之餘，有啲唔識嘅人又怕俾人Sell，而更加抗拒。

不過講返唔識買樓嘅人，點解唔識，其中一個我覺得最大嘅死穴，就係佢哋前設已經block咗去吸收買樓嘅資訊。例如地產新聞，樓價升跌，甚至乎股市升跌，世界時事，全部都好似有過濾器咁多多少少都會平，除咗喺自己吸收範圍之外，每日都只係返工放工，好似覺得個世界發生乜嘢事唔關佢哋事，呢個係我覺得可笑的最大問題。

套用汪生的名言，其實「買樓有風險，唔買樓都有風險」，這句嘢其實我很認同，不過對於一啲本身有前設唔買樓的人，其實佢哋係唔會明白呢句嘢講緊乜，因為主要呢句嘢最大嘅問題就係用咗「買樓」呢兩個字，就算有講唔買樓都有風險，對於好多唔買樓嘅人嚟講其實已經唔會去消化呢句嘢點解，總之簡單嚟講就係唔關佢事，所以我認為其實如果要進化完美呢一句學說，我認為更加應該講話，「你喺呢個社會生存，你跑贏唔到個社會，就會係個社會淘汰你」。

以上呢個說法，唔一定係買樓，因為的確如果你做生意或者你打工，或者你做乜都好本身都已經係個大贏家，的確係唔需要諗太多買樓嘅問題，但係如果你只係一個打工仔，然後你永遠都係一個打工仔的話，咁你就要諗究竟你打工搵返嚟嘅錢，係可以令你跑贏其他人，定係其他人贏你。好多人就會斷章取義，話唔一定要贏，我生活到就夠，當然同一啲未瞓醒嘅人去叫佢瞓醒係好難，不過我諗喺大畫面嚟講，呢個世界好大，由上至下其實都會影響到一個打工仔的你我他。

就以近呢幾年為例，一個疫情，改變咗全世界嘅生態，網絡eCommerce電商大行其道，零售商完全陷入苦戰，如果你做零售相關的行業就更加大受影響。深港互聯互通，香港人鍾意返深圳消費，又再加深咗香港飲食業市道，如果你係打份餐飲的工，一樣可能係被大打壓。以上嘅例子係，當你埋頭苦幹打份工嘅時候，唔理呢個世界發生乜嘢事，但係呢個世界發生嘅事仍然可以影響到你。同樣，譬如特朗普打伊朗，加息減息，股市大旺之類，以致樓價，所有嘢多多少少每一樣都會係唔同層面影響到每一個人，雖然唔係話好似打仗咁一個炸彈炸落嚟你會感受到要死亡嘅邊緣，但係每一件世界大事，每一個政府決策，其實都同每一日每一個人都有那麼一點的息息相關，如果你能接收這些訊息，適當的時候去作出反應，人生會易行好多，但係對每樣事漠不關心，完全其實唔知外面世界發生乜嘢事，咁就等同於溫水煮蛙，到到真係影響到你嘅時候，你都可能仲要係唔知咩事，而係只係覺得呢個世界離撚晒譜咁，就正如樓價一樣，買樓一樣。

其實樓價喺舊年跌到落一個好低嘅位，俾咗一個好好嘅機會好多人去追返一個機會，當然情緒主導底下未必每個人都可以把握到呢個機會，但係至少作出評論嘅時候，如果你同我講，舊年樓價真係低，不過同時份工又唔穩陣，冇辦法把握而錯過咗機會，而家樓價反彈離撚晒譜，這個隊長還是可以明白。不過，往往唔買樓唔吸收唔撚識嘅人，佢哋嘅說法大概都只係香港樓價高，唔撚會買，一聽就知道佢哋「真係唔識架喎」。