經濟下行的香港


持續接近10週的示威,相信每一個香港人都知發生咩事,而每一次電視上的畫面,籃有籃的詮釋,黃有黃的詮釋,但無論你係政治的邊一方面,都應該睇到目前為止係無任何可以完結的跡象,今次的事件點收科真係唔知,不過亦應驗左當初隊長講過,撤回呢兩個字的重要性,如果有時光機可以番番去612講撤回,今日香港就唔會有咁的局面。


事以至此,為經濟把一把脈,其實有更加多令人擔憂的事。首先相信大家都見到旅遊零售酒店全部都死晒,基本上成個傳統暑假旺季真係無左,開始有商店頂得住的就頂,頂唔住的已經開始執,當然民生的商鋪其實還可以,但係其他的商店已經薀釀炒人結業潮,其實個問題唔係話到呢一刻仲頂唔頂得住,好多商店去諗的係,呢家仲要搞幾耐,而搞完之後個經濟係咪會轉型定係仲要捱,捱幾耐,呢D先計唔到數,當然好多仇富仇商的可能話抵死啦之前賺咁多而家睇你仆街就開心,不過商家佬有商家佬的睇法,呢家軌纜的可能唔係輸很多,但有D近呢一年可以岩岩創業的小資本家就真係輸到訓係度,可能岩岩先捱完一浸有D氣色就黎個大浪沖散晒。


當然呢個所謂的攬炒政策係一個無賴得來但已經見效的政策,因為睇黎持續下去的話,小資本家小鋪應該開始會有更多倒下,慢慢可能成個經濟都會出現失業潮,係失業潮下有幾多人會由黃轉籃,其實真係好難講。有時不得不去諗,對與錯當然每個人心中有把呎,但係要你輸身家或畢生心血去支持對的事情,有幾多人經得起考驗又係未知之數。所以,隊長明白點解咁多地產大佬同藝人都要表忠,講真係今時今日的風起下,要為左企得硬而放棄以前的努力以及將來,放在現實面前是很難不折腰,而且大家要明白一切過去之後,就會是清算的開始,真的願意迫自己走投無路,還是置身事外,有時都係現實裡不得不面對決擇的事情。


而事實上今次的事情上,有好多人話打死都唔割蓆,使兩邊要旗幟鮮明咁,其實又有點怪怪的。即係你如果係黃,就一定等於支持所有示威衝突,支持癱瘓機場癱瘓道路咁;而如果你係籃,就一定等於支持警察打人,黑社會無差別咁打市民;呢個命題係有小小怪,即係點解企係一邊時就要認同所有野,不再分對於錯呢?更難搞的係,提出呢個質疑時就更加兩面唔討好,令想做中間的人更加無處容身。


是的,無處容身其實係今次事件下其實中央的意外收獲。某程度黎講,以前在香港你會覺得係華洋共存,鬼佬總會有D say,但今次事件其實中央果套竟然大派用長,係示威者日日上街迫政府時以為多有策略,實際上隊長認為在經濟層面上如果要計政治能量就已經輸左九十幾仗了,就以匯豐同國泰黎講,兩間公司的主席都比人做低,高層亦被換血,明眼人一睇都知咩事,而下一任上台的,你估會唔會向中央獻眉就更加可以理解,相信你唔肯就範的話,基本上你唔會坐得穏,而更有可能的係黎兩個中國人的名字成為新CEO也說不定。跨國大公司如此,大地產商亦如此,中小型的更加一定要表明愛黨愛國,以前可以中間的企業而家都可能被統戰了,在經濟層面上,當一切平靜下來時,中央手裡的竟然多了一大堆染紅企業的商界在手,年青人的方向可能更加險進了。


事實上事情發展至此已經隊長認為係輸得好金,當初個初心係要反送中,大家可在香港原來的生活下繼續安居樂業這是香港人明白的,但係走到今日所謂的焦點策略,竟然開始令中央駐軍在深圳了,亦吹下風中央可頒佈緊急令黎平亂,當然到呢一刻都未到呢個位,但係如果本身你唔唔想被送中的,點解又要搞到中央有說法可以長驅直進香港呢?唔好討論中央夠唔夠薑入黎先,就等於政府提送中條例但過唔到,到最後只係一個恐懼,而呢家有人送解放軍可入黎同中央頒佈緊急令,都只係一個恐懼,大家都唔想,但點解要制造呢個借口輸左香港呢?唔站在籃同黃的線上,反送中之後又搞到要被中國接管的風險是什麼玩法?


現實裡,我認同C老闆的一句,有時現實係唔到你選擇, 講真中央今日的強大係絕對可以以強權輕而易舉咁成個香港吞左, 問題只係會唔會咁做, 我睇唔到勝算的可能, 點解2字底要去show hand呢? 有時見好就收, 等待下個機會成熟, 也許係更明智的be water之法。











留言

  1. 提出呢個質疑時就更加兩面唔討好,令想做中間的人更加無處容身

    完全感受到, 中立的不受歡迎~
    隊長對樓市有冇改變睇法

    回覆刪除
  2. 你講既前設都係建基係錢上面,但好多人唔係睇錢睇得咁重

    回覆刪除
    回覆
    1. 認同.
      "唔站在籃同黃的線上,反送中之後又搞到要被中國接管的風險是什麼玩法?"
      主要唔係响金錢利益方面,而係反送中命題直到依家成立獨立調查委員會都係公義同公平性的訴求.
      當然每個人的價值觀唔同,所追求的事物都唔同,無話誰對誰錯.
      但上街遊行或示威的主要都係為公義出來抗爭,唔介意香港前途

      刪除
    2. 而家唔系睇錢重唔重ge問題,決定香港前途ge前提系香港存在。隊長講緊經濟,再深一層講緊香港生存的前提,將之解釋為“錢”系你本身自己對於“economy”的理解太過狹隘。economy唔系錢,系人類生存社會運作的模式,偉大的經濟學家不是banker,是人類學家、社會學家。隊長講緊香港人如何生存、行唔行到ge問題,你講緊香港人生行路時揀山路定水路ge問題。

      刪除
    3. 就算你講到人類生存社會運作模式.我可以肯定係依家出抗爭既正正就係不滿香港現在社會運作模式,所以寧願玉石俱焚.對佢地嚟講佢地本來就分享唔到現在運作模式既成果,所以政府商家甚至李嘉誠叫佢地為香港前途著想都係無用.

      利申:我係現有模式既得利益者

      刪除
  3. 此留言已被作者移除。

    回覆刪除
  4. 香港對中國既功用只會愈來愈細,
    8964果時如果有今日既民氣, 可能香港都唔洗回歸...今次運動令1國2制提早玩完, 其實係理性的, 反正2047都係會咁, why not攬炒

    回覆刪除
    回覆
    1. 8964國內學生盡力了..而且當年中國思想同言論自由仍然比較現時開放,大家都對建設民主中國抱有假希望.
      今次運動同樣年青人盡力了,改變唔到只好認命.

      刪除

發佈留言

此網誌的熱門文章

香港租樓故事 -- 女B版

DSE題三: 專精一事還是多元人生

俄烏戰爭的懶人包