少年樓神

如同股市一样，係一個大牛市入面，人人都可以做股神。無他的，人人都有唔同的理論，有人用唔同策略去買，有人用唔同的分析去買，亦有人亂鳩咁買，說出黎自己的賺錢故事總是令人津津樂道，不過正如隊長同某D朋友講，其實我唔係樓神，因為你遇著一個大牛市，唯一你要做的就係買，that's it，其他野都可以係廢話。


不過股票同樓市點都仲有小小唔同，因為股市可以有短期的情緒調整，加上買賣成本相對低，令資金流向突然唔跟大環境去走，所以股市係過去幾年都可以有突然一星期跌你二三千點的情況，令不少股神突然捱價被鞭。反而樓市係呢D股市向下走的時間，都沒有大幅度的調整，所以要係樓市搵食變樓神，只要有資本，係一件相對容易的事。


寫Blog咁耐，進入左一個買樓投資的Blogger世界，有不少讀者都寫信或PM我，可能有一部份人都會肯定左我在樓市投資的一些能力。不過，亦因為寫Blog的原因才發現，原來高手何奇多，所以有某些攻擊隊長的教壞人的人稱我為少年樓神時，我不得不拒絕呢個名，始終少年呢兩個字早已經當之有愧，再加埋樓神呢兩個字，更顯得我井底之蛙。


買樓收租風雲人物，香港實在有太多，出名的如倫伯剛剛離開，而呢家仲係好有實力的，當然有湯文亮，以及大鴻輝的梁紹鴻，鋪王鄧成波.....etc (太多太多不能盡錄），而上呢堆人的身家應該最少用十億計，級數之高我諗隊長呢一世都可能拍馬都追唔上。而Blogger或新一輩方面，比較傳奇的當然有YC同財叔，相信如果你有追開blog的，或多或少都應該有睇過兩位前輩的文章。


講真寫得個Blog比你睇的人，如YC同財叔都上晒岸得黎，不過又唔會係頭先幾十億果堆人的級數，所以如果講到樓神黎講，可能一眾Bloggers都未必夠班，最多都只係話大家分享一下心得而已，始終比你楂住十間屋廿間屋好，都未必過到1億貨仔，但今時今日如果你再想更上一層樓，難度已經比起以前難好多，始終正面信貸資料庫出左，無晒灰色按揭位，再加埋三辣招，以及樓價上到呢個水平，要一開二二開三咁，真係好難。


不過，如果少年樓神的定義，係定係80后有幾層樓的人，其實都仲有有一班水尾的人仕做到的，當然隊長亦係其中一個。而芸芸讀者中，我認知的，有80后女仕有十層樓以上，亦有好幾位80后左右的讀者，都有3-4層樓。然而大家都概嘆，要再玩落去都真係好難。


點都好，當我發現原來呢個Blog的人都好多忍世高手時，一方面當然我文章的內容都要謹慎少少，始終太多高手在看，廢事顯得太拙劣。而更重要的係，當你知道呢條財務自由的路原來有咁多人一齊行時，從大畫面黎睇，究竟要幾多樓先夠我地呢班人買，換句話說，越多財務自由行者，樓市越難跌，因為貨源只會歸邊，呢個可能亦係樓市不跌之謎的答案。