我的傻西租客 - 003 全村人租樓（上）

  

呢件事發生都可能係七八年前，果時有位廣州的女仔話黎睇樓，佢黎的時候仲話特別係廣州落黎，咁你講到咁有誠意，我當然都陪你癲下。但事實上，跳出傻西的問題先，通常隊長話呢D特別黎睇的都好有戒心，即係如果大家去英國買樓同人講特別係為左佢間屋而去英國的，都只係客氣說話，老實講你唔約定一百幾十間屋去睇，都對唔住自己啦，點會只係睇一間屋呢?

Any肥，黎到睇樓當日，睇樓的唔止呢位女仔，仲有佢大約80歲的婆婆一齊黎。我心諗係咪你兩位住啊? 佢話唔係，婆婆係順便黎幫下手睇，住就係個女仔同佢朋友咁話。好啦，無所謂，而呢個女仔又好似好中意咁，唯獨是好concern點解無電器。

「雪櫃洗衣機會唔會有架，可否包埋微波爐啊?」租客女仔問。

「呢度岩岩簡單裝修完，電器你講的都可以包，全新的」隊長都打算買，當然樂意整好少少比人。

「老闆，我個孫唔識野架，你要關照下佢啊」個婆婆開始發功。

「好啦，無問題」隊長答。

「老闆，你平少少比佢啦，細路仔黎架JA」個婆婆繼續發功。

「你地想要幾錢啊」隊長問。

當時隊長開13000，還價無所謂，預左平少少，但都要有個蒲，始終要買番D電器都係錢。

「老闆，我個孫好中意，不如你7500租比佢啦」個婆婆開始用阿婆的老人家語氣半推半求半迫的感覺出招。

隊長無諗過開13000有人會夠膽當場還7500，仲要係個廣州女仔租但又推個80歲阿婆出黎玩老人家牌咁高章？隊長眼神略帶面色咁望住廣州女仔以示意好似唔係好對路，但廣州女仔不為所動，好似好置身事外咁，好撚瀟洒咁食花生睇我大戰佢阿婆。

「婆婆，7500就唔可能啦，我開13000你比口7500價我，我真係好難做啊，呢度衰極都過萬啦，點可能7500啊」隊長嘗試禮貌回應。

「咁就10000啦老闆，你好人事租比個孫啦，佢好細個架JA」阿婆婆繼續係果D對白，佢講唔悶我打番出黎都悶。

「婆婆，其實呢個質素呢，呢D價真係好難做比你啊」隊長我略為帶點難色咁繼續解釋。

「我地好中意啊老闆，你咁好人事你就平D比我地啦」個阿婆應該連續講左5-10次唔同用字但同样意思的對白，隊長欠缺創意，就算坐定比我諗返黎寫都諗唔起，但好記得當刻感覺係講黎講去都係三篤屁。經歷左好多次repeatedly的對白，隊長我放棄了，由於都算差唔多即刻起租，最終10800租左比佢地，收左10800訂金先，亦順便交低鎖匙比佢地。

由於應承左要買電器，佢地又下星期就黎，時間上差唔多，所以隊長安排左岩岩佢地入住前一日送晒貨，等第二日成交。但由於送貨當日時間緊迫，所以無拆開電器就走左，諗住到租客黎交收面談時拆都仲有時間。

黎到第二日交收日，本來約下午，但廣州女仔話佢Ｄ親戚都想黎香港食下野，所以佢地坐早車黎擺低野先，自己入屋等咁話。心諗咁搞野但OK啦走得去邊，突然隔左一個鐘後有個訊息再入黎。

「房東你個鎖壞左啊，入唔到去，條鎖匙開唔到門」個女仔訊息我。

「點會啊，我記得試過可以架喎果日，點壞啊? 」心諗無理由條鎖匙或鎖會壞過凱婷，明明送貨時都好地地。

「條鎖匙斷左係入面啊」個廣洲女仔話。

............................待續

*********************  彩蛋 ********************

 

本文章都有彩蛋，請加入Patreon解鎖

 

*********************************************** 

睇完啦喎，幫幫手請係我facebook 度Comment / Like / Share啦！

https://www.facebook.com/CaptainHK80

*********************************************** 

隊長Blog價值:

如果你係我呢個Blog，求其比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。

所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。

仲等咩，拿拿臨去subscribe我Patreon啦。

***********************************************