兄弟拍住上!

  

係英國畢業的表弟回到香港，問及隊長發展的前景，就在今日移民潮的大方向下，表弟幾乎肯定咁講話經過幾年係英國，肯肯定唔會留英發展，而面對回來香港的安排，佢只係諗緊有個一齊英國讀書的有錢富二代室友的大灣區計劃，或者自己搵份工行自已條路，看看隊長的意見咁話。

今時今日個個都走的時間，表弟的睇法係英國就算讀書再好，都難以同當地的鬼仔鬼妹比拼，同樣的工種同樣的工作，係香港的發展機會以及收入都會比起英國要好，所以如果要用一世發展的話，香港始終食住大陸條水，點都會係多好多機會咁話。當然好多人講呢一部份都就好多好多野好講同比較，相信只會係無止境的debate，但表弟決定回來係一件主觀的事，所以都係睇番番黎可以發展的機會吧。

表弟目前有兩個方向，一就係佢個富二代室友有條水係大灣區的創科基地搞Start Up，而呢件事已經line up埋佢另外兩個朋友做前期的研究工作同埋酙茶灌水，當中因為富二的關係，仲Line Up埋某香港大習團的富二代女條水喉啡落去。講到咁大，但又要睇番一個事實就係富二代屋企可能有百億身家，佢老豆有成盤生意第時點都要交比佢，所以呢個Start Up搞成點，無人知亦無人會太Care。另外阿太子女比錢，都係可能玩300-500萬左右的預算，作為一個大灣區的Start Up可以話夠晒起步，但玩落去呢個燒錢遊戲係點就無人知。

隊長嘗試去了解個所謂的生意Idea，同大部份Start Up一樣都係無短期盈利，所以會搞成點真係無人知，所以簡單講隊長問表弟你係咪一個現實的人，定係追夢的人。事實上，係呢個Start Up入面你個Role只係一個follower，無乜大的價值係由你投資入去，即你又唔係某方面專家，亦唔係掟錢入去，純粹預埋你的原因可能係信得過同埋友誼，兄弟拍住上咁解。然而，呢個兄弟拍住上又值唔值人地塞錢比你賺呢?我唔知，因為我判斷唔到你地的友誼有幾深厚。

Worst case係，隊長話其實Start Up搞到一穫屎有幾出奇，你個friend有錢係一件事，可能玩耐D，但同時佢老豆又成盤生意比佢，可能出現兩個情況就係一係你地搞得OK，佢番去主公司，留呢度比你打庄。又或者，你地搞到一穫粥，佢老豆關水喉，你個Friend番去打庄，你就仲有兩個可能性，一係就跟埋走睇下佢會唔會帶你，一係就你自己搵你條路，但睇黎佢in the end都係要番去接管生意就唔駛諗。

換句話說，你如果跟佢玩大灣區，之後發生的野就會係由朋友變成partner再變成老闆同埋員工的關係。好啦，咁去到僱員呢部份，你有無諗過你個friend會出幾錢糧比你，定係唔講呢D，大家創業玩浪漫呢? 接落黎的問題係，你自我判斷的價值，同埋你朋友睇你的價值，如果係有出入時，你會唔會變得好尷尬或好失落？ 即係你覺得你值得搵3萬，佢就覺得你其實無乜經驗，可能仲差過佢公司的某個搵2萬的員工時，你會唔會辭職呢? 辭職又會唔會影響到你地的朋友關係呢?

簡單一問，你地咁好朋友，叫你朋友比1皮野你得唔得? 應該借就會，比就唔會，但借得係一兩次？ 衰Ｄ講，唔好話一皮，一千幾百比都未必比你，咁憑乜野工作時突然間要孭住你做一個義務呢?  老實講，隊長話其實我人生入面真係好少聽過有同學所謂拍住上，係我咁多同學當中，幾好朋友都好，都係各有各行自已條路，我就未見過話有人所謂照住D兄弟同學一路上的，反而唔知點解呢個好似係香港特有的特色就係比較現實，而對比國內，隊長又真係見過國內有不少朋友／兄弟會一齊做生意，唔理做得幾大都會一齊做，但香港就好似唔係好Work咁。

諗返一班識的兄弟，工作上無乜邊個點样話幫大家，而私生活就可能會叫做幫下手都會，例如有見過溝女借車用，結婚借車做花車，都係等閒事，但係一講到生意就總係諗唔起咩例子好過，最多叫做有朋友開酒吧係幫襯下。還記得以前係大陸做生意，有所謂的同學line up少少野已經講到好似皇恩浩蕩咁，然而佢單生意其實一來細到仆街，二來亦難做到仆街，其實隊長都係打份工，如果易食的話幫公司開下單有乜所謂，無話邊個開邊個，但實際上所謂朋友Line Up完就行左去，但佢係有Say的Role但無話幫下手，最後其實係做唔成生意但又好似唔小心欠左人情咁，可能或者呢個就係香港人大家最怕的ending，兩邊都尷尬。

所以都係果句，如果諗住兄弟拍住上，真係要諗下只係一時的一廂情願，定係真係一件熱血的奮鬥故事。呢個世界無話一定無可能，總有絕對好的朋友會幫人，之不過如果只係諗住畢業返黎跟住個兄弟行的話，倒不如好好地自己搵份工自已行自己條路，好過過幾年大家要分道揚鑣之時的尷尬，自己行自己的路先至可以拥有果個世界。真心最怕消耗幾年春青後由頭黎過，唔知為乜。

*********************  彩蛋 ********************

 

本文章都有彩蛋，請加入Patreon解鎖

 

*********************************************** 

睇完啦喎，幫幫手請係我facebook 度Comment / Like / Share啦！

https://www.facebook.com/CaptainHK80

*********************************************** 

隊長Blog價值:

如果你係我呢個Blog，求其比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。

所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。

仲等咩，拿拿臨去subscribe我Patreon啦。

***********************************************