連續插的恆指谷底

 

琴日出文，隊長話19000邊可以開始買貨，之後記得掉撚左個密碼去然後等坐，點知琴日一開市就一路向下沉，最後係無買到，順便睇下印度神童係咪咁堅揪? 不過出文之時，ADR升緊380點，黑期就升緊460點，唔知今日神童係咪預期到有咩大上大落，定係其實佢已經預計左呢兩日的跌幅，但今日隊長會入市。

好多人琴日都私聊隊長買乜好，老老實實，同其他KOL不一樣，我唔係要靠股票去達致財自，呢個只係其中一個短線的操作，所以有賺而又唔駛諗就最好，再者如果你問得我我又要答你孭責任的話，最好就緊係買盈富基金咁就完全跟大市行，唔駛一間彈又落後，跌又跌多過人果D衰野。而家呢個市，咩都有可能，打仗制裁又有關，科技股又可以打，銀行又隨時食蕉，一間升一升又唔知點解自閹就真係無趣，賺到賺左就收工走人算。

講起自閹，其實唔知點解香港好似成為左一個自閹之都咁。唔講政治立場，純粹而家個市況其實真係自己出政策去硬閹經濟，自己制造失業結業，然後再隊死個恆指咁，老實講隊長明白果種屍橫遍野，吋草不生的感覺，所以琴日同友人傾起之時都話呢排實有人跳樓燒炭，始終諗下幾容易就可能一個生意人無晒生意之後再可能輸股票然後仲可以確疹，遇上多重逆境的人應該會慢慢浮現，唔想講中，不過大家出街真係小心唔好靠牆行。

正面去睇，其實有時香港人的阿Q精神真係好可以攞出黎用下，幻想下其實你唔係最仆街果個，可能心底會舒服D，就好似波叔個仔又係一個慘到HIHI的例子。2017年想做酒店大亨狂買酒店，到中間鋪市都要加壓轉差，到呢家不停沽貨沽鋪沽商場都唔知搞唔搞掂，可謂掂乜衰乜，佢真係玩到可以吋草不生。睇埋佢2020年入隻松齡護老 (1989)，以7.7億元入主松齡護老4.69億股股份，每股作價1.647元，琴日收市價係得番0.265，又輸5億幾，基本上今次疫情下你要Hi的野佢都Hi到，而且仲要應一應大大單，所以大家如果想搵個慘慘豬係令自己感覺良好一點，不妨諗下波仔點样敗晒幾百億身家好過？實情係佢地咁賣發，我唔知有幾厚，不過一定係元氣大重傷甚至要破產都未定。

股市見底未真係唔知，但隊長試為你19000左右入市點都有D野睇坐得舒服，問題只係睇下呢個政府點樣處理接下黎的疫情。不過學羅傑承話頭，政府真係不妨唔好搞咩接貴賓唔好開記者會，花半日小小時間出黎行下，就會發現其實香港的市況真係好差好差，經濟的苗頭越來越弱，如果真熄晒的時時候，要復甦就會舉步維艱了。

*********************************************** 

睇完啦喎，幫幫手請係我facebook 度Comment / Like / Share啦！

https://www.facebook.com/CaptainHK80

*********************************************** 

隊長Blog價值:

如果你係我呢個Blog，求其比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。

所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。

仲等咩，拿拿臨去subscribe我Patreon啦。

***********************************************