具中國特色的動態清零
疫情肆虐，每日幾萬幾萬宗咁上，生活係香港的你都感受到各方面的緊張，好多食肆受到打擊，停業的停業，炒人的炒人，最近連晚上24的Mcdonlad 同七仔都好多地方停埋，成個香港好似停左咁，無論在經濟以及社會層面都起左一個好負面的濃霧陰霾。
香港的疫情，由最初要張竹君日日報源頭同數字，一步一步失守失控到已經話跟踪同報黎無意思，好多香港人亦聽到身邊的人已經有陽性反應。之前有不少人去醫院要係急症室外嚴寒中留宿，亦有不少人在投訢政府無安排應有的照顧，又有家長話驚中左之後要自己同小朋友分開，但又有一堆人驗左陽性之後就係屋企等政府安排到好番先有人黎話送去隔離，又有人話衛生署電話永世打唔通，打通左都係無野可以做，真係攞命。
政府的開初方向就係不繼谷針，但谷到9成其實都無減低疫情的發展，之後呢家就安排強檢，但有部份人仕又話唔排除禁足，之後又話可能乘強檢之際小禁足，而林太又話唔會禁足，跟住梁美芬又話不滿政府安排如果搞唔掂就動議用國安法等中央直接抗疫，講到呢到等隊長都補足一句「我愛中國我愛黨」，以免講下時事都唔小心奶野，特別而家用文字寫作都係好大穫，所以我絕對係建議大家要全心致支持政府的，反正你講乜政府都是對的，你懂的。ANY肥，總之而家政策好似澄清後又會隔一陣唔清晰咁，政府官員每個人講野都好似唔同，又唔一致，搞到盛智文都出黎講話要林鄭比出一個令市民可以放心的統一口徑的方案，唔好今天的我打倒昨日的我咁話。
當然係香港生活的每一個你，都明白到今日的政策同政治係永遠都分不開，而講到政治就睇到之前一班港官由政務司司長帶領去深圳同韓正會面，之後番黎當晚就即刻開個記招多謝中央支持，然後番到黎呢家就好似各有各做咁，去到呢排又話特首選舉提名會稍微延期，但會於7月1日按期去睇下邊個攞到個王位，仲會有最偉大的領導人習大大黎香港加冕，種種跡象都說明左應該會有新人上場，所以各個高官立場都開始比較貼地（但唔代表正確，因為又唔能夠做其他野)，只係見到林鄭好似同班官員已經有少少唔在同一頁的情況下，呢個政治的情況就更加搞到成個抗疫政策唔恊調。
事實上，專家袁國勇都出聲話強檢已經過左最佳時段，而家驗到十幾廿萬人出黎又點呢？政府又有無足夠資源去應付咁多患者呢？而高永文亦指出，而家強檢配合禁足係迫在眉睫，如果禁足一兩星期，社會係負擔得起，但必需盡快，而唔係再等大家互相傳染下去先做。理論上，隊長認為商界應該都偏向同意盡快做同埋禁足要做就做的方向。
作為一個商人，其實好明白而家疫情的傷害係每日都影響到個本元的。好多公司都會有各樣的節流方案以減低傷害同虧損，而減低傷害同虧損的正解係都要蝕，不過蝕少D咁解。就好似飲食咁，其實由一月開始搞到而家已經兩個幾月，如果禁足果D就算呢家搞都三月底先完，但如果三月底先搞就四月中先完，最慘係你唔搞唔搞一間又話搞，就搞到你四五月先有機會完。當然隊長係抱住正面心態去睇呢個禁足係希望可以令到呢一波完，特別係偉大的習大大七一要黎香港，所以都算有一個死線。然而，睇番商界，你呢家搞都仲可能係硬蝕三個月左右，但你搞到四五六月，除是硬蝕四五六個月，呢個拉長左的時間，只會令一間又一間頂住頂住的公司倒下，而倒下左的每一間公司都會減慢復甦的速度，所以要做真係盡快做會好好多。
拖下去的副產品除左經濟，其實仲有好多人命同埋長期病患。隊長最近有一個近親長輩離開了，有醫護的親友係怒火中帶點唏噓咁話而家個疫情真係害死好多人，唔係講緊疫情下直接中左omicron的人，反而呢堆好多人好似袁國勇咁話食下panadol飲下水休息下就好番，跟本都無咩藥可以醫。反而，就係因為而家政府全力抗疫，好多醫院的資源都去左呢部份，令到好多其他非緊急的醫療服務大受影響，即大家可以幻想到洗腎的洗唔到洗唔切，通波仔的通唔到通唔切，這邊廂大家公佈omicron的死亡數字，又有無人在意其實有好多病患就係咁死左都無人知? 物競天澤係袁國勇講的，但係這是否我們的物競天澤，定係真係政治下搞到亂晒籠呢？
退一步講，強檢同禁足應該係最後的方案，如果都係控制唔到而成為風土病，我地又會點样自處呢？歐美各地而家奉行的「共存」政策在香港是一個禁忌用詞，呢個大家都好明白點解，我地當然作為愛國愛黨的良好市民一定會支持政府，之但係現實係如果無日無之的話，唔通真係要令所有停業的經濟變成結業先得？定係，或者我地可以考慮一下，香港也許可以效法中央的經濟命題，係兼顧現實的情況下，搞番個「具中國特色的動態清零」，令社會經濟可以回復正常呢？
Comment / Like / Share
星期一：隊長每週公開分享 
星期二：Patreon會員專屬文章 + Blogspot不定期分享
星期三：Patreon會員專屬聲音 + Blogspot不定期分享 星期四：隊長每週公開分享 星期五：Patreon會員專屬文章 + Blogspot不定期分享 星期六：Patreon會員專屬聲音 + Blogspot不定期分享
星期日：休息下
留言
發佈留言