香港租樓故事 -- 女B外傳

 

睇黎大家都好關心咁睇女B個故事，搞到周圍都係花生殼，咁隊長都唔會令大家失望，漏夜搵左同學仔了解下女B的故事比大家繼續享用。睇埋落去之前請大家唔好唔記得Comment / Like / Share啊。

先講近況，入住左Studio的佢呢，就買左張雙人大床入去住，個感覺就好似你去左日本的迷你酒店咁，一入屋幾乎就係得張床咁款。由於無辦法放低呢個雙人床的慾望，呢間屋的空間呢只能夠再放下一個衣櫃就沒有然後了。隊長同學有幸去參觀過，佢話去到都幾難搞，因為呢位女子有潔癖，所以床的範圍係未沖涼就連佢自己都唔會掂，咁上到去好彩都係三個親戚，大家就連女B本人都唔能夠坐床的情況下，佢地就企左係玄關位＋廁所門口＋開放式廚房的爐頭咁三個人係一張細過乒乓波枱的空間下傾計，閒談中女B就不停投訴話邊有可能咁細，細到連梳化都放唔到，搞到大家都要企係度咁喎，Well....同學話心諗其實買張單人床就乜事都無，甚至買張上床下枱都無問題，但你偏偏要戀上你的雙人床，食撚晒D位做乜鳩姐。

閒聊間女B亦分享左佢的生活，女B話本身佢的朋友好多都係空姐，咁well係佢口中話其實空姐都無乜野特別姐咁样，然後佢話佢本身都係做過一輪地勤咁，之後先轉番出去做office之嘛。不過無乜特別其中一個空姐呢，有次就叫佢地去佢男朋友屋企度玩咁話啦，咁就要去到筲箕灣站等咁樣，本來都無乜野，點知一班仔仔女女到齊啦，就有一架Bentley同一架七人車係地鐵站等佢地咁喎，然後一班人浩浩蕩蕩去到唔知係咪石澳定係邊度的一間獨立屋度玩，佢話間屋有樓梯，張長枱可以坐十幾人咁話，如果你係一個鬼佬可能未必會明，但生活係香港的我地當然明白到能夠係自己間屋有一條樓梯係幾L咁巴閉的事。老友話，嘩個男主角咪成個果D上流家族韓星咁？女B就話一般啦，好似係外國番黎唔駛做野但傻傻地咁囉，佢話空姐朋友講佢D Friends全部剩係講英文架喎，好大壓力咁話，哦。

係呢個聚會中呢，其中就有一個年近40歲的阿叔（利申，一來唔係我，二來40歲唔係阿叔....屌，情感傷害），就對其中一個空姐Z有興趣。個阿叔就係朋友帶來的，好似話普通都係打份工搵三兩萬咁，但問題係編肥同埋地中海，不過就好似話有一層樓仔咁。然後呢，成晚呢個阿叔就當然大顯欣勤啦對住果位空姐Z，咁空姐Z都好識做，有講有笑咁保持八呎距離啦，離開的時候呢阿叔仲話一齊坐地鉄送空姐Z番家喎，就係呢個時候當然佢地架TESLA專車就到啦（UBER)，咁就當然走先啦，係咁先啦，下次.....（唔知仲有無下次)，然後佢地就事後得出一個結論係「哪來的自信」。

講番女B，佢又分享左講番佢搵樓時的情況，佢話都考慮過睇睇下樓不如買層樓好過啦咁樣，所以佢同D代理睇樓時係買盤租盤都一齊睇的，而代理當然都係持開放態度啦。買樓黎講呢，女B同搵租樓一樣的方向係乜都可以諗下的，比如話村屋又得，半新樓又得，甚至勉強舊樓都得，主要只要一樣野岩就得架啦，係咩呢? 無錯啦，就係價錢....價錢唔重要，主要係中意就得。WOW，鬼唔知你阿媽係男人咩。

咁佢就話睇過一堆屯門樓啦，佢就話佢都知自己收入唔高所以只能夠睇屯門，咁佢都幾貼地喎。村屋佢就無乜品評，反而我同學問佢有無睇錦華時代屯中果堆市中心啊，夠方便嘛，咁女B就話有啊，不過好討壓樓下好多人，一落樓就人多車多好忟憎咁喎，OK，都合理的，反正呢D野係主觀嘛，唔中意就唔中意。之後代理再帶左佢去睇屯門泳池一帶啦，佢就話半新樓果D都唔錯，但好似唔係好實用。之後佢又去睇過吉之島附近的樓喎，佢就話其實都無話唔好，不過就真係太舊同太細啦咁樣（hmm......咁即係好唔好，我唔明）。

然後當然主菜就係佢而家最後租果度啦，我同學問佢咁你呢度又點睇啊，你揀得呢度都應該中意先揀啦? 咁女B就話啦，呢度好貴啊，要七球八球起跳啊咁。咁我同學就話，咁你咪買你呢個Studio果D呎碼囉，lump sum細D啊嘛。「咁Ｌ細都要5球起啊」，女B好快咁回應。「咁你又岩」我朋友語作同意咁答佢老味。「有無考慮過其他區啊，比如深井黃金海岸果堆」我朋友問。「好L隔涉喎，唔駛番工就話姐」女B答。

咁講完一輪啦，一場親戚我同學話你比個預算黎，幫你留意下咁話啦。咁女B亦無乜所謂，佢話佢都唔係好知啊其實，然後我朋友話咁你有幾錢首期啊好易計姐，咁女B就計一計篤一篤手指，佢就話大約有十零萬喎。係，無錯，係十零萬。搵兩萬零蚊的佢，有儲蓄十零萬，無乜問題，問題係，你唔好走去玩D代理陪你行之餘仲講到好似D野唔駛錢咁啊大佬，唔知以為你朋友圈咁有貨，你又咁貼地識得係屯門搵樓，都估你有番三五七十萬先講買樓掛。「好啊，幫你留意下，都夜了，不如食飯啦」同學話成晚最有意義就係食左佢一餐癲拿。

睇到呢度好多人花生食完，隊長會話如果你情況比女B好好多固之然好，但如果你係新手上路廿零歲，咁你就真係要問下自己你幾年後會點十幾年後又會點？好多人只係諗下炒股炒呢炒路，但有無一條長線的人生投資主軸其實好重要，如果唔明唔緊要，記得follow我同埋subscibe我patreon，日日洗你腦保證你會明白乜野叫穩打穩紮。

*************************  彩蛋 ************************

 

本文章都有彩蛋，請加入Patreon解鎖

******************************************************* 

睇完啦喎，幫幫手請係我facebook 度Comment / Like / Share啦！

https://www.facebook.com/CaptainHK80

******************************************************* 

隊長Blog價值:

如果你係我呢個Blog，求其比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。

所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。

仲等咩，拿拿臨去subscribe我Patreon啦。

*******************************************************