香港租樓故事 -- 女B版

 

最近有個同學問我有無樓放租,話佢有個表妹搵樓,然後講左呢個幾有趣的女仔分享比我聽。呢個搵樓的女仔,完全比我意識到,原來一個人對錢無感覺無觸角係幾咁恐怖,簡單講你話佢離地又得,你話佢貼地又得,你話佢港女都得。


化佢名叫BOBO,大約30歲,工作穏定,大約搵28000左右,唔係咩叻人,但要養下屋企咁,實際幾多我唔知,但我估佢約莫比屋企10000左右吧。背景係屋企住居屋,之前因為某D原因就要搬出黎,所以積極搵樓。當時聽講佢話佢都捱左「咁耐」,搬出黎一定要住得比較舒服,所以唔會考慮劏房咁話。佢本身住港島東,但有屋企人係屯門,所以港島同埋屯門都係佢的選擇範圍。


咁既然要搬出黎,手頭應該都鬆,據知佢有約二十萬,咁都無乜問題租樓都夠,但預算係幾多呢?佢無講實,所以都係估,可能佢都係隨心,睇岩先租。佢搵樓就有搵港島的細單位,一房的可能10000左右,不過聽講全部樓對佢來講都得出一個字「舊」。「太舊了」成為左佢搵唔岩樓的最主要原因。於是,聽講佢又去過屯門搵樓租。又話說係屯門佢睇左兩日村屋,唔知點解好多女仔都好中意村屋,聽講話夠大咁話,但隊長用投資角度所以怕怕唔會考慮,呢個係主觀代入左的完全同個故事無關。


對於BOBO黎講呢,村屋空間感一流,而咁多間村屋當中,又有一個係新裝又係村口,所以佢係睇中左呢一間,開價8000,但呢間有個問題係地下果層,一來佢話驚治安問題,二來佢話怕蛇蟲鼠蟻喎。同一段時間,佢又去左睇一堆半新樓,半新樓黎講係屯門都有一堆,入場費係10000起。佢睇完一輪就話,太細了,佢的東西起碼要兩房先夠住。不過,兩房呢,就要15000,佢又超左筆直。


聽講中間佢問我朋友意見,朋友話女仔就揀番D半新樓好D啦,始終安全D啊嘛,你搵間村屋8000,不如搵個企企理理的半新樓入場好過啦。呢個時候個女仔就話啦,D半新樓係完全唔人性化架,一來細到痴線,某間屋個盛盤係洗唔到野架淺到仆街,點住啊咁嘩喎。而且,佢仲話,其實佢係由細到大都訓開雙人床,呢D樓全部都唔知放唔放得落雙人床,放得落的話間屋就已經無地方行啦,點住人啊?咁我朋友就話,不如你租間大小小架啦。BOBO就話,鬼唔知咩,但一房要去到13000,兩房去到15000,一個人住點住得起啊。之後,佢再繼續搵樓,然後叫埋佢阿媽一齊睇,跟住睇完番黎,我朋友問佢睇成點,跟住BOBO話,佢阿媽呢就同佢講話咁細你點住啊,捱唔捱得慣架咁喎........。


是的,唔知仲意為係一個富家女落難的感覺,一個人住成間屋都住唔慣真係係香港黎講好鬼貼地。故事係點我之後緊係八卦再追問睇下有無花生啦,又話說原來搵左一個月到限期來臨,死死氣就租最平的半新樓開放式 Studio囉,但係簽約果日,佢又問係應該比cheque定可唔可以碌卡,如果比cheque幾時過數。咁代理話業主收訂收FPS或現金,始終2皮野好細數,撳機都撳到,點知佢即時要call我朋友度住錢先,因為佢話原來岩岩找左咭數再加埋一堆蟹貨股票,就咁岩果一刻無錢喎,What?


成件事問題都好明顯,就係佢覺得D樓太細太舊,但係適合的就係太貴。呢個睇法,如果對於後生的一群應該就會話地產霸權同埋香港的樓太貴。但對於年長的,也許就會覺得呢個女仔眼高手低,自己搵唔得多但就要求多多咁。隊長聽完當然係會心微笑,但你聽完,又有咩睇法呢,不妨留言分享討論。


*************************  彩蛋 ************************

 

本文章都有彩蛋,請加入Patreon解鎖

 

******************************************************* 

睇完啦喎,幫幫手請係我facebook Comment / Like / Share啦!

https://www.facebook.com/CaptainHK80

******************************************************* 

隊長Blog價值:

如果你係我呢個Blog,求其比你執到一兩個點子,都起碼慳你一萬幾千,如果你叻的話,隨時幾舊水一年就令你成世受惠,唔好慳果少少錢就賺唔多大錢啊。

所以請大家subscribe我的Patreon,睇埋隊長的買樓秘笈,當請我飲杯咖啡,又幫下你自己,令你可以縱橫樓市,以一個「百萬租金」投資者的心態去睇市,其實相當超值。

仲等咩,拿拿臨去subscribePatreon啦。

******************************************************* 


留言

  1. 多謝分享!成件事都紀花生窩,宜家生活係香港都無咩野辦法,要跟佢個遊戲規則,有 budget 既人先可以有要求吧!

    回覆刪除
    回覆
    1. 係,但呢個世界,有好多人就係會離地,唔知點解的。

      刪除

發佈留言

此網誌的熱門文章

2021上車 - 新樓 VS 二手樓

2021年樓市回顧