俄羅斯想攻克烏克蘭定係？
去到今日，基本上烏克蘭嗌晒救命叫國際社會求救，而全世界都似乎係一面倒撐烏克蘭，大家見到好多歐洲國家都捐軍用物資捐錢比烏克蘭，甚至係重要地標如巴黎鉄塔啊倫敦眼咁，打上烏克蘭國旗的籃黃顏色作支持，就連現實的Ironman Elon Musk都將星鏈服務提供比烏克蘭，係眾志成城的情況下，大家又不禁問，咁會唔會真係幫到烏克蘭，而烏克蘭的命運又何去何從呢?
一個國家打仗，好現實係需要真係軍隊去打，而唔係剩係物資。好明顯，係呢一點上面就一支軍隊都無，即係大家都只能做的係You are on your own。點解會咁？一來無人想世界大戰，二來呢家亦出師無名。烏克蘭比人入侵，但係未入北約，理論上而家打都即係大家show hand講立場，即係我擺明唔妥你先派兵，但係政治舞台上如果出師無名，即如果德國派兵幫拖，一來嬴唔嬴到都係一個問題，即而家俄佬已經好快咁駐晒重要的戰略地點同優勢，派兵做戰敗國就無一個民選總統會自插選票。二來，如果引發俄佬入侵就自己攞黎賤，隨時連盟友都無埋，所以名節保身下，烏克蘭都係自己搞掂到尾。
打到今日，隊長認為俄佬釋出的訊號都好明顯。係聯合國大會上，烏克蘭代表就叫今個月安理會的俄佬主席放棄做主席唔好阻住晒，呢個當然係普京的算盤等呢個月成為聯合國的真空期無得審理呢件事。而會中，大家針鋒相對下有一點好值得講的就係，烏克蘭同全世界都用入侵(invasion)同戰爭(war)黎形容事件，但係俄羅斯代表就係話呢一次係一個特別的軍事行動。當然烏克蘭代表係記者會緊係話係咪痴線架仲係度玩咬文嚼字，但呢句說話又無有真係特別的含義呢?
好睇，睇番歷史，任何戰爭入去一個國家，都不外乎佔領或滅國。佔領就當然係除左軍隊要長期駐札之外仲會諗住點run你個政府啦？滅國就仲簡單，入到去見人就殺見野就燒，總之就變到一片焦土等你無晒歷史無得番身。呢兩個方向大家認為合今日的情況嗎? 或者可能會佔據，但就一定唔係去到滅國式。
咁普京究竟打緊乜算盤呢？如果睇番呢家戰況，可以睇到以下三個重點：
1. 有戰鬥，但無大規模不必要的轟炸同殺平民：似係準備留番個殼比「戰」後好快咁復原。
2. 呼籲軍方奪權：即係話佢都唔想俄兵同烏兵有大量死亡數字，目標明確係等烏克蘭自己人搞走個總統澤連斯基。
3. 願意和談: 俄羅斯都唔怕你的情況下仲願意和談，主要都係唔想好似火燒城咁迫到佢要係國際社會上形象盡毀咁完成任務。
如果普京係唔想傾，想玩硬，唔介意國際社會點睇同善後工作的話，入到黎見人就殺，一路搵戰機轟爆你基輔，殺左澤連斯基，應該三兩日就搞掂，但係事後個成本應該就極大，因為大家個敵意都會好強，強到俄國都要賠上更多傷害，當然而家都已經一堆制裁，而盧布都出晒事。但係如果收尾得好的話，烏克蘭有序咁交出普京想要的野，而最終亦係由烏克蘭人自己領導番話「沒事沒事」，咁應該就會好散場好多，睇怕呢個都係普京想要的exit plan，但問題係普京想要乜呢?
顯而易見，普京係想要一個聽話的門口狗，而澤連斯基應該就唔係呢一類。如前文所分析，烏克蘭如果一路搞入北約，就即係迫俄羅斯同敵人短兵相接，所以係萬萬不能的，而且隨時連北溪二號都難產，每年繼續比千億利潤你去卡住我個大計，然後下下係度搞亂普京的國際大計，傻的嗎?
但係烏克蘭本身係有佢中間人的角色係國際舞台，所以普京係唔想控制烏克蘭，亦唔想烏克蘭做北約一份子，乖乖地係中間食下油水就算，當然最好就係繼續認俄羅斯做大佬啦。如果你唔明點解咁，不防再睇一睇個地图，然後幻想一下呢個情況：
你被迫同你的十個敵人要坐埋同一張枱，你可以選擇：
A. 你隔離幾位都係你的敵人
B. 你有兩條手下坐係左右隔間位，而佢地同自己同對面都有計傾的。
好明顯，如果直接同敵人對口，你就有排煩。但你隔離有條手下幫你看住個門口，隔離想伸手搞你又有一個人係中間擋一擋，要講野又有個中間人傳下話，咁幾好啊？所以，關鍵的係呢個中間人，係幫自己，定係幫人地之嘛。
因此，就在北溪二號，入北約同頓巴斯幾個關鍵因素底下，普京不得不挖爛塊面去折服烏克蘭，以及向世界釋出一條底線就係呢條門口狗係我的，你地一搞佢，我就打柒佢，所以唔駛諗將佢收歸北約。
相信呢件事，最後都應該會係澤連斯基下台，或者澤連斯基轉投普京陣營。總之，普京就要一個傀儡政權，幫佢係歐洲大國上，繼續捉佢的如意算盤。
隊長情深說話：
如果你係我呢個Blog，求其一年比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。所以仲等咩，拿拿臨去subscribe我Patreon啦。
Comment / Like / Share
星期一：隊長每週公開分享 
星期二：Patreon會員專屬文章 + Blogspot不定期分享
星期三：Patreon會員專屬聲音 + Blogspot不定期分享 星期四：隊長每週公開分享 星期五：Patreon會員專屬文章 + Blogspot不定期分享 星期六：Patreon會員專屬聲音 + Blogspot不定期分享
星期日：休息下
留言
發佈留言