4字頭的80後

回想十年前，果時隊長岩岩開始寫Blog，果時仲係三字出頭，正所謂風華正茂，人生仲係上升軌向上行，生活各方面都算順利。

那時寫Blog一心只係想分享同紀錄自己的諗法，特別係當時認定左QE下一定會引發通脹呢個概念，所以全力投身樓市，希望食盡通脹下的資產升值升勢，而呢個Blog慢慢亦成為左一種習慣，一種堅持，或一個自我的心靈空間。然而十年下來，雖然近期減產，但偶然睇番一些已遺忘的文章，有時好似睇緊一個唔熟悉的人寫作，亦好似睇緊一個人的成長，所以這個Blog可能是隊長自己送比自己的最有價值的禮物。

當時選用80后求生隊長呢個名，可能當刻有多少覺得年輕人也不是那麼不外如是，想證明一下當時的80后也不是個廢料，不過這十年大家經歷都多左好多，每代年輕人都背負左自己年代的風霜，而任何人都敵不過的，就係時間的洗禮，當時30出頭的我，現在已變成四張了。

大江東去 浪淘盡 千古風流人物，隊長其實都唔算什麼角色。過去呢十年，多少人做crypto，做創投成功左，多少內地的創業家4張野已經十億百億身家？所以隊長自知今日的我只係萬千樓蟻中的其中一隻，只係可能在蟻巢裡，活得相對輕鬆小小的一個，所以能分享的也只是分享，大家參考下就好。

不過回望呢十年，一路在財自路上都有一種領悟。似乎每段時間都有一套當時得令的黃金formula，比如最早期有專家教加按做人仔定期賺息，點知最後人仔升值搞到好多人賺息輸價；之後好多食息達人教用IB/PB買債，個理倫係揸到尾只要唔default都會連息同本攞足，中間已有乜都無所謂，但中期已有過一D起伏，應該有部分人要比人追50-100萬按金去救下倉，攞唔到就應該硬輸，但過到初一都過唔到十五，之後又黎一個債災，聽講又有一批人接近滅頂；然後又興起夾公仔機，而家似乎開到成行成市，但係中間都似乎有好大班人變苦主；跟住又有人教玩looplooploop匯豐，點知匯豐都仆晒街；再之後就黎到crypto興起，我聽到好多唔同的故事，當中有人賺到痴晒線，但亦有人輸到癲左，而最近crypto亦走入一個低谷；而接下來仲有一個元宇宙，買個login都要幾千虲美金的以太幣，結果如何就有待分曉。

上面呢堆野唔係講點樣仆街，因為總有叻仔係適當時賺錢cashout離場，即我買bitcoin可能輸，你買bitcoin可能贏，大家各有立場。不過，正正上面所有故事都講左一個重點出來，就係你經唔經得起風險食唔食得到賺錢果浸，如果食唔到，咁就損手莫怪人。而更重要的係，用左十年升升跌咗，係勝者為王，定係敗者為寇，真係好睇造化。

我記得還在之前公司時有個老闆話resilent growth係最好的，這個亦係我投資的其中一個重要原素，所以亦選擇樓市，就算再差也有實物在手，所以走到今日，回報沒有百倍千倍，但就算天氣有多少不似預期，都還叫做略有小成地財務自由，都叫做可以了。

估此隊長我認為，都是時候替這十年打開新一頁，為此隊長認為求生已經不合時宜了，所以將重新改名為80後財自隊長，並且趁呢家市況咁樣，爭取寫番多d文，等大家係疫情下都多一點精神食糧。

另外，隊長稍後會推出patreon，所有public的文都會於patreon早幾日出post，而且

每月係patreon都會有大市分析同埋一d更加圍繞我核心的投資樓市內容，希望大家到時多多支持啊。