2021年樓市回顧

 

2021年好懶好懶,又或者話因為本身好鬼好鬼忙,所以真係無心力去寫文章,斷左無數咁多時間,不少網友都叫我快D出文,一拖再拖實在唔好意思。


過去一年政局慢慢平穏下來,疫情亦開始正常化,經濟同樓市亦開始走返上一個可以比較可預測的路途上,是一件在無奈中還可以慶幸的事情。2021年其實上半年樓市走勢都相當之唔錯,不過過左8月開始,雖然美國通脹如狼似虎式咁開始話失控,然而樓市走到第四季明顯的係漸趨淡靜的,第四季唔知點解好似突然好兩極化咁,破頂的有破頂,劈價的又有劈價,在淡市中好似反反覆覆咁,低的成交有,高的成交亦有。


睇番身邊的朋友,在樓市都有不少消息,比如朋友A又走返出黎睇樓,在同佢睇樓期間,其實十一月份左右的代理全行都講明個市淡到癲左,不過淡得黎又唔係完全無承接,只要夠平一样即時有人報荀野,比如我地睇的第一間靚景高層房,原叫438,最后418成交左,呢口價如果以隊長認為好市時可能430走,而家418叫做兌現算係有左個傾價空間。另一間隊長好心儀,一直叫朋友A落注,下午三點睇,本身個業主叫420萬連天台,但睇之前三日自已劈自己落黎到370,到我地睇果時我話都好好喎,但朋友A都係唔明唔識唔知點搞,到大約五點左右代理覆返,328最后成交!嘩我話呢間真心荀到痴線。代理話業主放左兩個月等錢洗,最后局賣。而隊長估計,呢間一開波叫420就係離罩架啦,但370成交到的話都叫做market price,但328就真係平左一成,我初時以為傾到350都已經好荀,點知真係原來低處未算低。


朋友B方面,最近係元朗入左間三房,然後就放左佢一層太子的樓仔成交價455萬。我同佢講我話呢口價低左少少,佢間有裝修點都做到465 - 468 左右,不過佢成日話自已知自己天台漏水,我話其實個天台漏水係塵世間最易整的漏水,大量倒下防漏自己搞都得(因為管理處係廢無王管得個阿伯)。佢話算啦無睇屎乾淨盲,而佢更加話因為佢買左間元朗三房所以要套現埋單,所以谷賣,我明。不過好搞野的係,佢話呢家搞完一輪到佢老婆有名,所以準備係沙田又諗住搵番間5-6球的樓,我話,咁你做乜屎忽痕賣太子?佢話因為原來本身同佢老婆一人一層樓,要是但賣一層先有錢埋單,然后太子係細價的,而老婆果間就大價D,所以最尾佢選擇兩間都賣,然后二合一后又發現有錢剩。我問朋友B我話如果你賣老婆層樓先,你仲會唔會賣太子,佢話都會,因為層樓漏水。Well.....都係果句,頂層單位,對上天台,我去過,基本上真係絕對有得整,無啦啦一賣再一買又打稅,屎忽痕發咩。


呢段時間進出代理行,搵盤過程中就避免唔到一個大家身邊都一定聽過的主題:移民盤。的確好多代理話呢家出貨的人多過入貨好多,好多人移民放盤咁話,呢個現象我都見到,唔計係地產鋪入面,身邊總會聽到移民的故事,而且仲係未完咁話,個人估計起碼去到下年上半年先至會叫做要走的都可能走到比較水尾少少,但目前我都認同係有唔少人走緊,但無論有幾多人走幾時先見頂都唔係我想討論的野,之但係一個對樓市影響事情就係租務市場又係好差,多多少少租的市場係反映埋比較前線的需求,然而係目前唔知有無關係的移民潮下,比如我的一個親人的收租樓,12000的細單位,以前放一兩個月點都租得出,之但係呢家由8月到而家都仲係未租到,唯一一個肯承接的肯比11000的又比佢拒絕左因為養寵物咁嘩。唔理佢背后原因點,但呢家租客好似一客難求咁,可能也是因為傳統第四季因素吧。


作為樓市大好友,見到隊長上面放淡消息,係咪可能覺得隊長轉呔呢? 咁又未必! 不過樓市有旺有靜係在所難免,而如果你屎忽痕靜小小就賣樓等跌的話,可能就會做錯好大的決定,特別係呢家要出貨可能要平5%左右走人,可能就算當樓市走弱小小都無數圍。而攞返隊長同朋友A老豆睇樓時講,隊長話睇樓買樓,從來都應該淡市出擊,而家有張票你就係老闆,何不試試執下荀野呢? 今日淡姐,或者聽日回暖呢? Who knows?


睇番今年香港股市衰到貼地,香港全球股市排名最尾,當然同政策都係有巨大關係,而當股市咁弱的時間,樓市陪埋一齊衰都係在所難免。不過每段時間有危就會有機,今年其實都有D野係賺到下錢,呢個又賣下關子先,留待下一篇2022年展望再揭曉。







留言

此網誌的熱門文章

被退休的CEO

DSE題三: 專精一事還是多元人生

大圍車位的潛力