香港買樓故事 (下)

 

跟代理B行的第一間，離佢鋪頭不遠，不過代理Ｂ性格怪怪的，感覺可能因為係細A，唔係好大行果種氣勢迫人的感覺，甚至有一種異常的冷空氣在浮動，個場太冷唯有隊長問下D九唔答八的問題緩和頭先朋友已經攰到無聲出的西面氣氛。

跟代理B睇的係我地第5間屋，先叫佢做5號屋吧，47年樓，入到大堂，無看更，我地都只係跟人出入。去到樓層出電梯，一梯三伙，長走廊成Ｌ型咁，第一間門口放滿鞋，唔知係朋友黎探訪定係常態，但多多少少反映左單幢樓的其中一個問題，即係管理上係差少少。不過，講還講，代理B話呢個係正野，事實上從地理優勢黎講隊長都認同，旺中帶靜，近地鉄，呢個位應該唔憂無人租同住，但係單幢樓成交少，所以代理B話好少放盤都係岩，亦係一個問題，即成交價永世唔跟貼。

入到5號屋，一打開其實都少少喜出望愛，300呎實呎黎計，多窗方正，無走廊顯得大，仲要中間開門，都算幾實用。目前係一房設計，樓下車來車往黎講，關晒窗都好靜，但係屬低層，typical港島內街樓對樓景。睇左一輪，四四正正，應該可以即住，都無乜投訴，係隊長心目中，其實95%的樓都可以考慮買，問題係價錢問題，即就算極兇宅都唔係問題，3萬蚊賣間七屍凶宅比你都買得過架，平過買架車嘛，所以無話唔買得，係價錢問題，但呢間就當然有佢優勢啦。

落左樓，朋友個样似乎已經回復青春，唔知係佢都感到5號屋唔錯，定係佢都內心幾中意間屋，所以個样開始由西面偏番向東少少，之後一路行去6號屋之時，就問代理B 5號屋幾錢，咁代理B就答話550咁，但之前係600，岩岩業主先至降價至550咁。入到6號屋，都係差唔多的野，不過個走廊好舊，呢間都係300呎，但叫600萬，仲要58年樓，即係做按揭75-計得18年，咁唔好玩啦，異口同聲話同一條街咁样比，5號屋完勝啦。

去到7號屋，其實大家內心都仲係講緊5號，但因為約左第二個合作盤，睇埋。間屋係4樓，望樓景樓下平台，300呎上下，叫580萬，但間左兩房，不過顯得好細，原因係嘩屌佢老母有條超長的玄關走廊位（以300呎樓計，呢條走廊可以放長單人床180CM有突)，都真係個比例好有問題。而窗口就望樓下平台，其實都無乜好講，唔岩心水，所以走人。落到樓，時候不早，睇朋友個样都知中意5號屋但又嫌攰了，走人食飯。

食飯時，開始傾番話中意5號，問我應該出幾錢點點點，我話都要估下價睇下係咪凶宅D friend，順便我就篤一篤成交，睇番原來對上個成交係間屋樓上8樓成過620萬，咁呢家叫550都唔算過份，但係開價就無乜所謂無乜技巧，睇你自已中意，但why not try 下500萬先？最後，隔左一日，估價估530，估到又唔錯喎，去馬落票啦諗住，開510試下先，出埋查冊，點知又開始又新野啦。

出左查冊同埋傾落去，呢間屋有三大challenges，一就原來係遺產契，1990年已經落左落呢家業主度，相信供完。二就係，查冊有兩個order，唔知係乜，唯有又要去個管理處睇，睇完一輪應該一個係成幢大廈消防的野，另一個似乎係成幢大廈的去水有問題，即唔關室內事，但要夾錢咁。最後一個問題，業主唔係香港，又要搵授權人簽名，又係第二個時區，好煩。

睇完呢堆野，價就照出，但好似大家做Global Business咁，下下你都要等一日先有人覆野。但為保安全，隊長擔心係因為聽講個業主係新手乜都問問問，但遺產契佢一間少幾頁唔完整咁就真係仆街，再者仲有order，一間按揭唔批咪真係掘個窿比自己跳落去？於是叫代理寫明，如果因為呢堆野做唔到按揭，可以三方和解兼退返20萬訂金。但係隔兩日，個業主又話要問人，驚死好似呃佢咁，然後最尾又覆話呢個價錢呢就有其他人都出到價，但又話同代理friend乜乜乜咁所以同我地傾，我話其實間屋咁複雜，仲隨時要夾錢維修又唔知夾幾多，錢就唔加啦，仲要佢地turnaround咁耐時間，佢係有人比得高價就賣比人啦? 隊長認為，口價其實我地都合理，但點解第一口價開左即中我都唔認為係開錯價有問題的原因係，因為我知道呢個盤大代理都有做，但人地官網長期寫600萬，放左三個月都賣唔到，可能個業主開始急左，就同呢間細A friend d先講降一降價，亦因此中X同美X係唔知平左所以無推客，亦即係話業主未層太完全感覺到有十幾廿枱客爭佢間屋的嗜血感覺，因為估到530，開510都肯陪你癲，算係咁。

但時間上好鬼消耗人生，覆完呢個，業主又話驚蝕左律師費啦，所以改合約係退還19萬，心諗都是但啦，無乜所謂，因為同個阿婆新手煩呢D婆那數都係煩，而且阿婆業主仲覆話由簽約起計的所有維修的費用就由買家出啦。計一計條數，我當消防加通渠係5-10萬啦，其實疫情下D野慢左，拖到成交後大廈先話要夾錢都係買家比啦走唔甩，咁食多幾個月責任同埋律師費當還一口價，我認為都無乜大問題。不過當我地都覺得合理想話OK之時，朋友竟然突破盲點咁講返話，唔係喎，如果比左大訂之時即51萬的時間，又做唔到按揭，咁按而家條文的和解，係業主退返19萬就算喎。的確，又係喎，因為睇契同按揭又點會係14日內完成呢？咁又唔岩數喎，唯有叫代理更新番做50萬啦，但係代理B又開始抽筋啦。

代理B話咁不如你地問下律師樓，問下銀行先啦？Well，問乜？我話個point係對方如果遺產契漏野，我個律司撚知啊? 我話D文件未齊，你問銀行批唔批，問閪啊？你入晒文件問佢批唔批都未即刻答你啦？咁佢又死死氣又谷住同業主傾啦，一傾又傾左兩日，又話阿業主係新手好驚乜乜七七，我話而家其實等於買條腸仔包，你自己又唔知有無腸仔，咁我信你有仲比埋訂金你啦，咁你到時話無，退訂金如果你個前設係肯退，咁有乜問題？定係你想目標係因為你無腸仔都想食我地訂金呢？呢個唔關新唔新手事喎，係佢想點之嘛？講完又問問問，之後我再同代理講我話其實呢，可能係你條條款寫得衰姐，你寫退50萬，佢見到條數咪京京囉，你試下唔好懶寫多份，話只係退回已付訂金，然後買家承擔賣家律師費上限一萬又會唔會好D啊？屌那媽，當日就答覆OK了，有時D野咪就係睇你肯唔肯轉囉。

成件事買撚左10日，係10日，以隊長的經驗黎講，10日的過程竟然都無撻Q仲要用510萬買到個530萬的低估價成交，而樓上成過580萬的單位，係今日成日仲破緊頂的市況，同街同區全部都係嗌高呎價的比較下，呢個deal可以話都幾荀之餘又幾神蹟。我恭喜朋友之餘，但亦同佢講，呢度只係開始，因為仲有按揭之部份，有排玩，過埋按揭你先知可以安枕無鳩。