香港買樓故事 (中)

 



近日有個舊同學想買樓,一個女仔感覺自己好似都係時候要番層樓有個地方住,所以就搵我幫手,特別係佢真係對樓可以話完全無概念。於是隊長就搵左兩個代理去介紹,諗住約一堆樓比佢睇下,行一轉等佢有個概念,幾錢可以買到咩貨咁。


由於佢係上車想近佢公司,預算係大約450-600萬左右,實際上係港島黎講都真係比較難買到好野同埋屋苑,因此都會係響單枝方面埋手。而且佢的能力其實都有少少勉強,估計佢自己份糧同首期大約都係買到450左右,如果買突左仲要加屋企人做擔保,之不過如果真係限制左呢個樓價的話估計都應該只可買開放式或小一房的單枝樓,仲要要就番75年-樓齡去計,即係估計50年以上的樓更加唔駛諗,所以我估都係好大機會要加擔保去諗,但點都好,行左先講。


出發當日先跟代理A先生行,約左4間樓,而事實上每次睇呢D單枝樓都好有趣,因為平時無事無輸你唔會入到去,但入到個大堂入到個電梯你先真心會有個感覺。第一間屋,一入大堂要上十幾層樓梯先到電梯大堂,即係所謂無平地Lift,扣分。入到架Lift,好有趣的係有少少似工廠大廈咁,好長好深,係一個長方型的Lift,幾搞笑。去到個單位樓層,出左電梯要上半層,其實唔太明白個設計點解要咁,可能50年前係咪覺得好型?但係我剩係知搬屋買傢私同送貨,都會比人屌晒鬼,所以唔太中意。去到個單位,一位老先生開門,單位內籠都尚算別緻,實用400呎左右,嗌520萬理論上唔過份,之不過,我行黎行去都好似唔覺係400呎實用咁,但佢又無窗台,D地方唔知去左邊,可能夾硬話佢玄關有條走廊仔咁,而且就算係極高層,三面都係比樓包住,間屋比較黑,對我黎講都幾多唔岩心水的位,So Next。


第二間屋,都係要上十級樓梯左右,但有趣的係因為係合作盤,突如其來多左個代理,竟然又係我朋友的Auntie,咁細的世界都有,大家打個招呼就繼續睇樓。一入到間屋,朋友話,嘩個廳都幾大幾好喎,然後我就同佢講,其實呢個單位應該就係呢度睇晒架啦,無房架師傅,佢即時呆左,無錯如果有間房就唔錯,但呢間野嗌480萬,送天台,但內籠得180呎左右,而又有個玄關走廊位都無左20呎,心諗我就真係頂唔緊。睇左一輪,個天台幾靚,讚完之後,屌原來因為係交叉樓梯,個天台係人地的,笑了,講完,走人啦。


再轉戰第三間屋,都係有六七級樓梯,朋友好似學到野話如果再無平地Lift就唔睇,似乎好似有D得著咁喎。入到去,一梯兩伙,間屋有企理裝修,一房感覺都唔錯,對流窗干干淨淨,不過呢間屋叫588萬,有少少佢筆值上限,而且我個人認為創造性甚低,感覺都係一般。出番門口,朋友話嘩對面有架摺的單車放係門口喎,根住我話唔撚係囉,但廢事講咁多,落到街先講,屌果架輪椅黎架師傅。有架輪椅係門口,背後當然表示入面有住客需要用啦,咁諗多層,再諗下成日有架輪椅係公共地方自己門口,再扣少少分,再諗吧。


最後一間,出番大街,車來車往,但對正地鉄站都算方便,大堂番新果算唔錯,一層成十幾戶的舊樓,一入屋就感覺空間好大,呢間先似番間400呎的屋,問一問代理佢話原來係380呎,我話嘩有無搞錯點解大咁多。然而,大還大,間屋係長方型,入門口去到窗邊係最長的線,眼鏡房,即係廳無窗咁制。咁就有個問題,因為當日無開窗,其實好靜,但係原來全屋得果排窗開得,一開,佢仲要低層,一定嘈到飛天,所以好話唔好聽,呢個筆直想買好野真心難的baby。


睇完四間,都唔太滿意,就再去同約左的代理B去睇,但去到呢度朋友已經有少少氣力不繼,坐左係度死灰咁西面太郎,我就問代理B你安排左幾多間比我地睇啊,代理B淡淡然咁答有7間,其實我無乜所謂,但係朋友聽完好似感覺阿老闆捉完佢食晚飯後仲同佢講要去唱K直落唔比番屋企咁,忍唔住就話可否減晒D無平地Lift的盤咁呢? 代理B話好啊,咁我地都可以睇6間,無錯係6間,然後朋友個樣已經係好似windows出左籃畫面咁死機的狀態,我話唔緊要啦行到攰就停,順其自然,事不宜遲馬撚上出發吧。

留言

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力