香港買樓故事 (上)

近排樓市活躍到不得之了，好多好多好多二手樓成交，每個星期都見到唔少人睇樓，而隊長身邊都又有人開始買樓，今日分享下第一位老朋友的換樓故事。

介紹一下背景，舊朋友做銀行，人工8皮左右，都係80后，本身兩公婆加個小朋友，老婆就做文職，收入不肯定當係2皮計，本身八年前買左間港島樓，300尾買入，因為想搬出黎就小朋友番學，所以考慮番東區大屋苑三房咁。事實上佢第一次買樓的時間都幾靚仔，時至今日佢間屋值接近1000萬，我同老友講我話你都賺都好盡下，但今次換樓都有D諗法係值得分享。

首先，換樓黎計佢地採取先賣後買，而因為個需求唔係必需，故此價錢上企得好硬開1010萬左右，而聰明的你應該都馬上意識到，問題就正正因為呢口價岩岩過左林鄭的按揭PLAN，所以買家個首期係將會大幅提升至接近六球係手先可埋到張單，所以將會趕走一批客。老友問我點搞，佢話都有好多agent打黎傾價，亦解釋過比佢聽首期的問題，但老友本身認為層樓點都值1010萬上下的價錢，唔想就買家唔夠實力而要平十萬。當然，十萬買樓又唔係好多，但生活中十萬又唔係一個小數目，所以我同老友講有兩個可能性，一就係企硬等一個實力橫強的買家，佢始終中產屋苑，總會有機會有呢個人出現，但係就要等。而另一個選擇其實可以考慮，就係傾價的時候或者可以樓價平十萬，但係買家負責佢果邊佣金，呢個方式佢落袋都係差唔多錢，但係就幫到買家可以用少D首期上會，都係一個可取的方案。老友話好似可行，最後真係99X賣鬼左間屋。

如果曾經有換過樓的你，應該都無明白由你賣左樓的一刻開始，心理上就會有馬上好忐忑的感覺，好驚個樓市短短之內大升，又或者驚搵唔到一層心儀的樓，又或者驚自己賣得平左等等，而且仲好似有條死線要係成交前搵到下一家咁。當然，實際上賣得樓就緊係有自己的盤算，朋友亦一早諗左如果要短住的其他安排，所以呢方面都唔係大問題，但加插少少個人的感覺，搬屋真係一件好鬼攞命的事情。

所以剩番落黎的下一個目的，就係開始計算下自己有幾錢身家再買下一層樓咁。就係因為計算，我同朋友講我話，雖然你都賺到好盡下，呢家套番成七球出黎，講真應該都好開心，如果你唔係要再買樓，當你中左個六合彩，你呢家戶口有七球，一定會突然感到自己好富有，真係唔知做野做幾撚耐先有呢七球。是的，不過當你楂住七球，然後又去搵下一層樓的時候，會發現原來最多都係買千三四萬樓，除非將你自己本身呢幾年儲埋的錢攞埋出黎，先叫做勉強買到千五萬左右的預算，簡單黎講，接近又再一次清袋。

每個人選擇唔同，有人中意住細小小然後有樓收租，亦有無要住番夠大的空間比番屋企人咁，每個人都唔一样，但係將一個成功的投資再投放去買多次樓，清袋再由頭供過，呢個感覺又真係幾奇怪。但無論點都好，方向定左就去碼，隔左一個月終於搵到一層心儀的樓，盛惠1350萬的大型屋苑三房，而據聞呢間屋屋主曾經堅持賣1380攞好意頭，又話曾經turn down過1380再想賣好D，然而唔知點解turn down完就再無人offer，之後又趕住移民，所以我老友就執到個平盤咁，但在樓市裡其實乜野故事都唔重要，各人都波譎雲詭，何必認真，就好似我曾經買樓都聽過我個agent話我係上車客，聲俱淚下咁叫個業主平少少當幫下D後生仔上車，聽在心裡其實都只係一場戲，所以事實如何，又或理由為何，都唔太重要，重要的係買得開心賣得賣心，咁就足夠。

呢位朋友買完無耐，樓市消息依然不斷，一方面黃竹坑新盤一房都賣成千萬，仲要入票超十倍嚇撚死人之際，另一個朋友亦傳來係某一weekend火速入左市，唔知做乜突然個市場勁郁，及至最近又有另一位朋友搵我幫手買樓上車，佢個故事又更加有趣，等下集分解。