無限子彈

今年開初，股市好似拍左野咁不停向上，瘋狂炒到30000點完全脫離左個經濟仲係因為疫情下受影響之際，好多人都仲係樂於其中咁參與呢一個瘋炒的股市。當然有唔少人提出新經濟下可能已經慢慢在疫情人形成左new normal的經濟型態，所以一眾科技股尤以騰訊升到飛晒天，小弟不才心血少唔係好掌握到點样估值點样玩先岩，所以錯過左呢一票發左唔少人的車，然而傳統智慧告訴我們一般黎講當所有人都買股好HYPER之時就要有戒心，近日隊長我不少唔投資的朋友都開始講股票，也許係一個時候大家要開始提高警覺。

但值得討論的，係每日2-3000億成交究竟D錢由邊度黎，就以港交所數據黎講先，2020年12月平均每日成交都係1408億左右，但而家短短3個月轟到上30000點，係有每日2-3000億計，多左出黎的錢我諗大家都唔太難估應該呢個世界上只有一個國家有能力以千億的scale係香港入市，而當然背後就緊係有唔同的考量，而如果政治的動機黎講，可以睇到就係中國人係全球圍攻下，經濟不受影響之餘仲要繼續旺盛，國力每日都上升，以經濟力繼續左右世界舞台的戲路，呢個似乎是國家在打的如意算盤，所以港股升係有一定的合理性。

要成就呢一個套路的話，要先諗一下究竟點解全球可能只有中國先做到呢個動作，而當中又點解美國或其他大國做唔到呢?好簡單亦好神奇的係，歐美國家的資本帳係公開的，如呢家美國國債印幾多錢出黎，大家都會知，而如果美國試下突然印十倍的錢會發生咩事呢? 通脹一方面就幾乎肯定，但係更重要的係同全世界的匯率都會大跌，即你琴日用1蚊美金同我換1.2歐元計，假設歐洲佬無印十倍錢只有美國佬咁玩，咁美金兌歐元應該係變左1蚊美金換到0.12歐元 （大約啦)，如果吾係的話，喂你班美國大帝咪突然可能月入5000美金的人，突然咪黎到歐洲變左月入50000美金咁濟，咪成個國家變左有錢佬買晒我地D野？

所以如果有一個國家可以勁印錢而速度係大大幅咁高於本身你住的地方的話，咁好明顯知道個匯率係會變，而且緊隨其後仲有個信心危機，即我收你美金都唔知你仲會唔會又印多十倍我咪搵自己苯？所以，強如美國係呢方面都只能有限度咁循序漸進咁印錢，大約同全世界國家都差唔多速度咁印，大家有錢洗大家又唔會有匯率風險，呢個就係過去十年左右的情況，所以美國同美元都係受制於呢個機制，美國係無辦法用印錢令自己國民突然變到土豪咁然後去用經濟再主導呢個世界。

所以，如果要屈機咁係呢個世界去tricky咁玩經濟強大呢，首先一個國家呢就要係個資本帳係無人知，即可能好多非洲國家都係附合呢個條件；但之後呢，就係要有好大規模的個人同埋公司都會用到呢個家國貨幣；而呢個國家又要好似一個神話咁有著強大的經濟大家都信佢的貨幣係有價值；而同時間呢個國家有強大的外匯／盟友／手段去操縱匯率；而全世界的人都樂於同呢一個國家交易因為佢地夠有錢係咁買我的野令短視的我唔會唔賺你錢；只要你擁有以上的條件，咁你就會可以拥有無限子彈做乜都得，你可以買晒人地D野，令每一個市民都變超有錢，然後佢地出到去就算幾咁唔融入人地社會，但手握住一張又一張的錢，沒有相同超必的國家只要你想搵錢都局住跪低。

好有趣地，一直以為美國過去五十年因為美元霸權成就左唔少對美國有利的事情，但走到2021年，開始才意識到原來全世界係可以接受一個國家拥有這種無限子彈的超必而又吹唔漲抆唔長。政治上或許大家都有唔同意見，但從經濟上諗，可能大家都應該慶幸係活在香港呢個地方。當一切回復平靜之時，隊長深信未來會因為無限子彈而令全球各國都加速印錢抗衡，未來十年相信資產同通脹，將會有一個更突破性的上升趨勢。