[BK009]加息下的香港樓市

經過接近10年的低息年代，香港終於跟隨美國加P按息0.125厘，連同港樓的弱勢以及一手樓狂推，似乎呢個係一個完美風暴，睇牌面香港樓市難逃一劫？


當然從牌面上，唔難睇到發展商係以走鬼式的心態狂推貨，更吊詭的係政府同時間仲要推埋52折居屋，包括啟德啟朗苑/長沙灣凱樂苑/東涌裕泰苑，而尤以啟德啟朗苑最吸引，真係300幾萬可進駐未來啟德地帶，林鄭政府出的空置稅以及居屋連環拳，竟然可以剎下急升的樓市列車，呢個仲唔係偉大的政積？


講起政積，一個好從梁兆基作為匯豐加息事件的代言人係值得深思的，以下係節錄至毒果新聞：


「金管局總裁陳德霖、財爺陳茂波，昨早先後露面，評論美聯儲加息決定，滙豐隨即於11點召開解說會。
梁兆基在開場白及答問環節，不下四、五次提到，加息決定充份照顧了社會責任、企業負擔以至存戶感受，連該行立足本港逾150年，與香港一齊成長的歷史都派上用場，足見做龍頭行之不易為。對加息有否受政府壓力，梁亦毫不猶疑予以否認，重申加P及儲蓄利率是銀行商業決定。」


嗱老老實實，其實佢話係商業決定的同時呢，感覺上言詞間又好似唔係純商業決定，陰謀論計係政府立場當然係想銀行加息啦，點解？一方面双陳都成日話加息同買樓有風險講左好多年，次次美國加完香港都唔加，到最近半年香港又走資計，講極你都唔加，暗地一定會同比匯豐好大壓力。而且好明顯林鄭係想壓一壓樓市，但出招全部都係溫和招而唔係辣招，加息正好配合佢的樓控連環拳，從政府推手黎計，一定想加息，然後就可以同市民有個交待，講番話啦你地見到啦，終於加息啦，樓市有風險，而且仲有可能繼續加，大家睇扒啦。


點解隊長咁估，除左因為毒果的推手之外，另一個好詭異的地方係，點解美國加0.25，不過香港加0.125呢? 呢個加息的行為其實係有小小令市場意外，甚至話係think out of the box。講真，匯豐大可照加0.25，我相信作為龍頭大佬，以及背後政府的推手，應該唔會出現彈弓手情況，即匯豐加，但其他銀行唔郁的方唐鏡式跳出跳入玩野。所以係唔加同加之間，如果係一個好容易的決定，其實匯豐一加0.25可以話無乜野要考慮，但加0.125就反而反映出，其實匯豐似係唔想加，但受到壓力唔加唔得下，局住加0.125叫有個交待咁。


加0.125的意思，每100萬係要比多70蚊左右，不過最近一個月hibor係上升的，所以P升的話，封頂位係的確都升左，不過影響真係好細，係象徵式嚇下鬼咁。隊長反而認為，今次加得0.125都係一個樓市的好事，因為就算美國下次議息要加多一次息計，香港應該仲有起碼一次quota話加0.125，變相係其實加少左一次，但出年再唔再加呢，好多人有唔同睇法，聯儲自己就remove左話貨幣政策係寬鬆呢句，施老闆亦提出一個觀點隊長認同的係，成熟經濟体一年GDP增長都係2-3%，加息加到過左龍係真會影響經濟，呢個前題下，加埋特朗普要連任同埋貿易戰要駛錢，唔好講加唔加息先，就算要加都幾可肯定會係溫和派咁加，對樓市的影響係推測下加息應該唔係毀滅性的。


回歸現實，樓市弱勢係真的，散貨潮下同埋政府連環拳，購買力亦個個星期被一手樓消耗，樓市的確要抖抖整固下。下一個樓市的轉機，如果唔係股市突然又熱番的話，也許都可能要在出年新年的小陽春後先會有曙光，未來幾個月相信樓市會嘔番10個8%的升幅出黎，但二手樓只要清一清部份弱勢賣家，一手樓又開始清得咁上下，購買力如繼續累積，相信小陽春下應該會重拾升勢。現階段呢，有樓的就應該持盈保泰，保存實力。想上車的，也許可能係扑下傻瓜的好時機。


Babykingdom原文