林鄭的房策

林鄭終於推出左佢的房策，包括將會將9幅私樓地轉為公營房屋，又將居屋白表的入息要求降至4萬以配合唔再以市場價作折讓的前設，又再推埋港人首置上車盤，呢家其實個畫面好清晣，林鄭將每一個收入層的人仕好清楚咁畫條線，然後再對症下藥，其實亦是一聰明之舉。


當然讚得佢聰明就係好主觀，階因其實由出政策到呢家，傳媒同網民都話私樓會升到飛天，一片叫好聲下，以前就十個煲三個蓋，無人開心，呢家將三個蓋集中係基層同中低層，起碼部份最大人數目的中下階屋都會睇到多D希望，而另一大族群的業主就亦鬆綁開心到飛天，慘的只係中間唔上唔落的人，但以政治黎講個餅係得咁大就係咁大，以前無人飽，而家有好多人會飽左，係政治上支持的人理應多左，反對的人亦會少左，是一個政治好聰明的方向。


睇番個分級黎講，第一級的應該係公屋戶，呢家林鄭基本上用劫富濟貧式咁將9幅成千億的土地撥黎起公營房屋，當然呢個隊長認為係一個非常無效率的事情，太多的偽基層都係度排隊等中獎的情形下，政府仲派多D獎品，基層或輪候公屋的人就當然會開心啦，就算可能因為加建公屋而又刮起更多人排公屋的可能下，至少政治上林鄭都叫有所交待先。


至於下一級的就係居屋戶，57000的2人家庭上限的白表合資格人仕，重點係林鄭去到呢個位就叫做係57000收入畫左條線，你超過左就係下一個組別的人仕。不過居屋的數量一直有限，呢班白表人仕見到沙煲咁大個拳頭的52折定價就好有動力去抽獎，雖然話多左地變居至，但人數一定仲多左黎抽，之但係呢個位就會累死好多長年的不幸運戶，又或者短期內好多人抽唔到的仍然會係私樓市場捱貴租，個等待成本其實真係睇你好無彩。


不過再下一級呢，就會係57001至74100呢班人，佢地將符合資格買首署上車盤。而講到首置上車，當中有兩個要點要注意就係，一呢其實要從未買過樓，即你上過車又落番車的可以say good bye la，咁呢样野其實都有小小公道，但如果你唔好彩係97年上過車03年落錯車的，就會完完全全係左一把右一把了。不過就算係咁都唔駛太失望，因為首置上車盤的首個盤係得450個，唔好以為唔駛抽，到時睇怕都係爭歺死，而且會唔會又好似CY的港人港地咁到最後又變左質呢，雖然睇落5年唔比租唔比賣又好似好合理咁，之後又要補地價芸芸。所以57001-74100收入的人，看以唔上唔落，其實一係叠埋心水搵私樓好過。


接下來的，就係無得揀唔駛諗的私樓市場，當中本身有一部份係重覆左首置上車資格收入的人即57001-74100呢一批呢，可能就又諗首置又諗私樓又諗租之類，而且林鄭仲有三個重點，一就係推出空置稅打擊發展商，呢一下係一個政治手法將未上車的人的口實塞住左，即講明政府係唔怕搞發展商的，但同時第二點就係政府又話明將D地攞多D比公營房屋，即睇怕都係升ga la，而最后一點係政府亦唔怕開聲講埋將9成按考慮提至600萬水平，咁都真心係叫做幫你諗埋點样易上車。


睇埋9成按600萬呢件事，如果真係成事，以600萬計算30年2.15%計，每月供款為20366元（未計按保），差唔多係57001起步人仕的35%，而如果唔猛咁盡的都可以跌落去30%樓下，睇黎都係有策略性咁去針對呢個階層而設計過，風險黎講基本上一定過壓測，所以要成事應該唔難，只睇政府有無心搞。


不過又有網民話嘩你睇下一出招，大角咀尚璽76伙就算400萬樓下都賣唔晒，睇黎林鄭的招有效打擊樓市咁喎。之但係你睇番其實真係唔可以作準，一來呢個尚璽實用面積先至得果158至193方呎，但係開到4球平均呎價25000左右，賣到咁Ｌ貴但缺點就真係最衰的都中晒--單幢屌腳都不得止，仲要近大酒店，實在呢口價賣唔晒都不能參考，賣得晒隊長先覺得D水魚係咪真係多成咁。


事實上，呢家個情況係政府推左更多的人落去私樓，但呢班人係下面升班上黎私樓築底的，再加上可能9成借600萬會跟尾，而撥走私樓地的情況下再搞空置稅，發展商隨時都會玩野減慢起樓同投地，就如琴日係討論區有網民講，今次政府真係好似落重藥谷高樓市。如果9成買600萬真係實施，睇怕年底大部份細價樓屋苑會衝600都不是夢。