唔熟唔食?


最近隊長重歸CCTVB的懷抱,因為套公心計之心公計好似又幾好睇,而其中一場戲,謝雪心話要借機會睇下究竟身邊邊個係人,邊個係鬼,又令隊長諗起一個近期的經驗。


話說接到電話,一個算係朋友的代理打黎,好耐無聯絡當然寒暄幾句。話算係朋友的原因係因為我識佢的時候佢仲未做地產代理,而我地都係踼波識,不過之後經佢都入過一間屋,所以關係又好似係建基於朋友先然後先生意。吹完水一輪之後,終於入正題講番樓市,佢就突然代理吭上身話喂老闆,之前幫你入果間屋今個月成左單550萬破晒頂喎,隊長我諗番上個月仲係450-480左右,突然黎一個咁好消息當然開心左一下啦。


不過,接落黎的對白就有點令人失望。「你間屋,如果試下放520-530都應該走到喎」佢好似好誠懇咁同我講。然而係今時今日,大家都明白,一個破頂之後又係下一個破頂,就算唔破頂,都應該差唔多價,講真呢位朋友唔知隊長身份的,但係老實講520-530走一件岩岩成左550的野,當然走到啦,鬼唔知咩,而隊長會認為,喂一場相識,你有好野話幫我試走560-580,我都可能考慮下,呢家好似你話比我聽叫我平走益街坊,莫名其妙地我個腦只係出現一個問號?


係隊長個腦仲盤算緊其實佢係咪都好明顯想撩我放盤的短短三兩秒,「嘩呢個業主仲比左3%佣啊」呢位朋友又再補多句,係呢一刻我真心覺得有時雖然話叫朋友,不過真係利字當頭,甚至個利都未必係垂手可得的時間,真係會有人當隊長我係水魚咁撳?


為左令可能有新手唔明白以上發生緊咩事的時間,即係講番其實係今時今日個市場係好缺盤,缺到基本上有交吉要破小小頂都唔太難,特別係細價樓,因此好多時代理的工作就係無樓睇時就搵D業主吹下水睇下佢地有無盤賣,而基本上肯賣就算已經算係成功的一步,但如果搵到個傻佬賣樓得黎,佢又肯平賣的,咁就係成功的第二個層次了,不過呢個都未算高,因為如果搵到個傻佬肯平賣得黎,仲要肯比高佣,咁就係一件超級大水魚傻仔了。而通常呢D超級大水魚傻仔,都係通常唔知價的老人家或一係爭人錢唔識野趕住賣甩手咁,而一般真係當你朋友的,又點會咁做呢?


其實諗番之前,佢幫我入件貨係真心平,我亦好識做咁好多時都請下佢食飯咁,而佣亦比足無拖數。但幾年下來,一個電話的感覺,嗯,好差,或者可能係個大染缸耐左,人未必會好易變好,但要變(唔敢講話壞),但變左,就係變左,特別係久未聯絡的所謂朋友,原來都只係會變成潛在的傻仔,一個電話無啦啦睇穿一個人,幾咁可惜。



留言

  1. 此留言已被作者移除。

    回覆刪除
  2. AA 就係 AA, 做得耐六親不認唔奇的

    回覆刪除
  3. 都是隊長您聰明, 功力深厚, 沒有中伏

    回覆刪除
  4. 這是社會的現實,身邊總有是買保險或地產代理的人,前果陣試過睇過中山的樓,地產代理商真的很積極進取,基本上一星期有三天會電你買樓~~~~~~~~

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力