可持續的財務自由

假使間你已經有一定程度的財務自由，而又會睇隊長的文章的話，相信你年紀都唔會係太年長，亦即係話所謂的真退休應該都有一段路，而一日未拮到人生的盡頭，老實講你的財務自由是否無堅不摧，甚至係可以自我成長的，亦係一件值得討論的事。


即是咁，假使間你的財務自由是已經能制造50000一個月的被動收入，好啦咁要睇是否可持續的係你的工具係乜野呢？無論是樓又好股又好債又好，如果一個浪打埋來，你個計劃係會收檔的話，咁都未必係一個完美方案。當然我地又明白，要有抗跌力就最好楂番一定的cash，但楂得多cash又會減低回報影響增長，所以係有限的資源下去平衡風險同回報，實在係一件好考功夫的事。


然而，隊長更想討論的係，其實50000都唔係咩大錢係香港，要養家活兒叫做OK，但要超級好的生活呢，就未必啦，所以50000唔夠就即係要增加呢個被動收入，而如何增加呢就係數字同現實的遊戲。


相信大部份人睇得呢個博客，應該都好多係支份糧的打工仔，即係要提升呢50000的收入，除左慳D洗去令50000有盈餘之外，最主要都係靠份糧吧，而又如果係靠份糧去做一個可持續增長的portfolio呢，實情又係一件好難的事，要知如何難就計一計數就知。試想想舉例你係以匯豐息口唔槓桿去做，要去到50000月入，大約你已經要1000萬的匯豐係手，約6里息即係派60萬一年，平均要50000一個月。好啦，要每增加10000的被動收入，即係要儲多約200萬的匯豐先得，而假使間你無食波幅的運又無玩期權收多小小期權金，要儲200萬要幾耐呢?當你每個月儲到50000，都要40個月左右，即三年多，而呢三年多你係唔可以無左份工去頂住開支，亦即係話咩呢？即係你有被動收入50000黎講，要增加多10000的被動收入係要多三年幾，即財務自由但不能自由，不過當中係無計股票升／跌。


人生有幾多個三年幾係一個問題，但如果你明隊長諗緊的野係，要做到個portfolio自我成長，就算有份人工頂住都係一件好難又好慢的事。之但係呢個困局只係我地呢D普通人家先會遇到的問題，因為如果我地假設一個正常人的正常family係用10萬元計，一年120萬咁講，咁要超120萬的被動收入先可以做到，而以匯豐6%息口計，即你要楂住2000萬先可以打個靚和，但就算你有一個double的匯豐，即每個月儲多10萬，其實個return of 呢10萬都係好細，仲未計其實係香港要洗10萬同20萬一個月，真係唔難。不過呢個困局，記住，只限於普通人，即如果你老豆有100億身家買晒匯豐，一年派6億比你，你個衰仔一年洗1000萬，每年都仲有5.9億剩，咁個portfolio就唔同咁講了，必要時匯豐冧價可以又溝下，個盤就會自我成長了。


但人人想有父幹唔通人人都有父幹咩，所以回歸現實，你如果仲記得隊長問過你一世人值幾錢，就知道大部份人係成世都賺係約2000-4000萬左右，而當中仲未計你人生的洗費，所以比你咁勁淨到2000萬，一來一定係有投資得利先得，但如果你係超級投資高手，咁相信你又唔會覺得呢篇文有咩幫到你因為食息呢D咁廢的野真係唔夠你做幾個trade，但係如果你無點金聖手的能耐又無超級運氣去保持長勝同倍賺，咁你就好好好大機會會跌落上面講就算有2000萬都無法再大幅提升個財務自由的境地，而個財務自由要去到自我完成化的成長篇呢，其實真係好少人可以做到。


如果都未係好明的話，隊長舉個例就係如果你有8000萬匯豐，一年執480萬息，當你洗200萬走吧，咁剩袋280萬，也許呢個就係比較容易理解個盤點样自我成長吧。不過前題，就係要有8000萬，而8000萬的匯豐唔槓桿去諗，一個普通人可能要四世先可以完成。

講咁耐的原因係隊長發現計數上，除非你買的野的面價係上升到，否則就算做唔做，都只會係停留係一個階段，亦印證左富者越富，貧者越貧的道理．原因亦好簡單，有錢人的錢賺返來係快過洗錢的速度，而非富人就無呢種煩惱。所以如果要定義有錢人，也許真係可以諗，佢地D錢係會係財務自由下自我成長，不過隊長呢，好明顯都只係一個非富人而已。