永遠的貧富線


兩年前隊長我寫過一篇貧富懸殊,那時候的細價樓大約在350萬向上望400,時至今日呢,好多都已經跨過400向450甚至500萬邁進了,假使間再往下走而又唔爆的話,600萬的上車盤將會係下一站。


之前講過,600萬的上車界線係會由120萬的首期突然一跳變成240萬。240萬係一個乜野概念呢? 即係話你就算每個月儲10000,都要240個月,即20年的時間。而如果兩個人就好小小,即每人頂10年左右,而如果要你呢家畢業的同學同佢講要每個月儲10000,但佢人工可能都係13000-14000,講真點儲?而且擇偶條件係你要搵一個同你一样會咁儲的人,先有機會係10年後,即可能約莫33-34歲有望買樓。而途中,你如果手痕搞埋生意買咩窩輪輸左就更加大穫,特別係後生仔有錢身痕的話就多數會撞下板計,稍一不慎就只會連一個機會都無埋。


當然,比你用十年好二十年好儲到240萬時又係一個乜世界就真係無人知,可能樓市大跌你掃兩間又唔定,但又或者佢真係痴左線唔跌,唔跌的話十年就一定升架啦,到時會唔會變左你唔止要240萬,甚至更多呢更加無人知。所以如果你係一個無父幹的年輕人,比你睇到咁样的畫面你會點呢?會好努力儲錢嗎,定還是算撚數了都係吃喝玩樂今晚有酒今朝醉呢?我答你唔到邊样好d,因為的確如果你唔係有父幹,又或係專業人仕一出黎五萬八萬咁,否則樓價去到600或之後,就肯肯定會出現一條永遠的貧富線,以後將會好少人可越過。


其實呢一條線係400萬時都開始發生,只係話目前黎講你有所準備的人,又或者就以今日樓市的底部黎講都仲有300-400萬的樓比你買,但如果真心再升多幾年,無啦,真係普通人無父幹唔駛買。所以再向下走,就會變成有父幹的人會可以繼續買,無父幹的人就永遠買唔到,要記住人係要住,好一部份人之後就會係永遠局住交租,現金流就只會永永遠遠咁由下而上咁交款,你可能會話唔公平,我都認同,但呢個係同美國佬同年長一輩的人洗大左而QE印錢埋單的後遺症,係一個美國佬帶頭向無產同年輕人抽的全球稅,唔公平係唔公平,但同時係一個現實。


所以如果你問我你無樓是否應該上車時,係今時今日呢個price discovery的過程中急速轉變下,我都會話呢家係高位,但高還高,係咪會跌,係咪唔會升,又或係咪一定升,真心講短期的我唔估,但十年廿年後一定係升,今日買唔買的決定,交比你自己,睇番你自己有幾錢,鬆唔鬆動有無需要仲好。然而,有朋友同我講,佢話佢買左樓就唔怕了,其實我唔太認同,因為係今日呢個時代,得一層樓,最多最多只可以話係唔比個大市拋甩太多,講真你就睇下呢家股市發左幾多人,Bitcoin同樓又發左幾多人,再望番你一層幾百萬樓仔,其實有乜咁把閉?


隊長個Blog係寫向上流,所以隊長想指出的係,如果物價樓價都係咁升時,你係乜都無的話,你唔輸錢都係向緊下流。同样,當人人都賺大錢時,你買層樓仔執小小錢,美其名都只係比無賺錢的人好,但對整體而言其實都係向緊下流。而至於要楂幾多野先算向上流,隊長答你唔到,但面對住十幾萬億的港樓,過百萬億的大陸樓市美國樓市以致全球經濟,十億八億其實都唔係咩錢,所以隊長都知自己只係世界入面的一粒麈,然而隊長更睇到,好多人將會連想做麈都無望,呢一個可能將會係未來的世界。







留言

  1. 陳茂波死都話唔想放寬

    回覆刪除
  2. 此留言已被作者移除。

    回覆刪除
  3. 此留言已被作者移除。

    回覆刪除
  4. 香港樓市越升,年青人怨氣越大,社會越動盪不安,打擊中國就越容易,美國就越開心.... 其實所有問題源頭都是美國佬QE做成的,啲黃絲青年到底明唔明?

    回覆刪除

發佈留言

此網誌的熱門文章

香港租樓故事 -- 女B版

DSE題三: 專精一事還是多元人生

俄烏戰爭的懶人包