有沒有財商?

最近聽到有朋友兩公婆上車，買左間1500萬的500呎新樓樓花，首先然嚇一跳，咁鬼有錢，但之後就再嚇多跳，原因可能係我唔太了解佢的實力，但就以普通人黎睇，呢個故事又可以分享下財商的玩法。


首先每個人條路點行呢，隊長我認為都應該尊重，即你中意撘的士我中意撘巴士，無話岩定錯，尤其是你可能坐的士去屯門，我撘巴士去將軍澳，目的地唔一樣就更加無得比無可比性。因此，如果老是套財務自由去任何人度，隊長認為未必適合，之不過當呢個故事係一個case study黎睇去研究下，又以設定目標為財務自由咁行一轉，咁隊長認為亦有其討論的重點可發掘一下。


好啦，講番一層1500萬樓，隊長我睇過發展商無比二按，即走唔甩要750萬首期同埋56萬厘印，為方便計就當齊頭800萬首期咁講。而呢兩公婆，大約38歲左右，半專業人仕，買得咁上下樓當兩個加埋12萬左右收入，計番要月供750萬的按揭即約28300元左右，絕對有足夠能力咁劑。而如果，即如果成舊首期係靠佢兩個儲出黎的話，咁用左過去十幾年左右的工作生涯都儲到800萬，咁未30年兩個人一條心要供甩呢750萬，可以話絕對無問題，對吧。


但係回想起黎咁講，當佢地工作15年，要儲800萬即每年要儲約53萬元左右，即每月儲4萬4千元，二人分灘就即係每人要儲2萬2千元，仲要係響兩個人岩岩畢業，收入應該未如今日的情況下，仲要十五年好有紀律咁每個月儲2萬2而又無任何原因洗左去咁計，大家認為得嗎？計番15年前，即2003正值沙屎時期，起薪點真係都幾差下，就算04/05都好唔到邊到，好話唔好聽搵萬二三蚊係當時已經算高的情況下，我唔知點样可以儲2萬2一個月仲要兩個人都遇到咁好景？又或者，可能佢頭幾年搵得少后幾年搵得多d接上補下呢? 但個人認為，更傾向的應該係家中有父母幹吧。


咁有父母幹其實都無乜問題，係今日呢個畸型社會有父母幹跟本已經係一件好普通的事。但問題係如果係要有父母幹的話，咁條數其實係咪又完全唔同諗法呢？換個角度睇先，當然每個人都唔一样，始終每人成長背景都唔同，但試想想你老豆老母外父外母加埋話比600萬你，然後你自己加埋手裡面有兩球幾咁講，首期有足800幾萬，最多可買1500萬，你係咪會買足1500萬呢?


當然又可以話，挑可能人地老豆老母比成千萬佢呢？當然都有可能，但補充一下資料就係呢兩公婆都只係租22000蚊左右的400呎樓係奧運站，本身屋企就係美孚的中產樓啦，所以我地唔好考慮太extreme的幻想，即假使間去番呢個CASE 黎睇，用1500萬買大約500呎的樓花，是什麼一回事先？


好老實講，以選擇計要住500呎樓，兩公婆新婚年輕人當上車，就講買番美孚500呎左右，700萬已經任篤。比大小小去到800萬，已經可以去到屋苑的600-700呎。當然，如果你用盡budget計，1500萬係美孚已經可以買過千呎的巨積，三四房兩廁走唔甩，即住大一個double喎大佬。當然我明的，年輕人住要新要靚，住慣奧運站又方便又靚又較新，咁好難住番轉頭，所以就以奧運較新的海桃灣計，900萬應該都搵到500呎左右，買到1200—1300萬，起碼有3房600呎左右仲即住，不過如果你咁睇呢個距離，都比得1300萬啦，咁筆直到，點解唔住好D住新D，心多三兩百萬就買到層全新樓仲慳裝修喎，咪又係差唔多？


無錯，如果你問隊長，1500同1400，唔係我比錢其實又真係差唔多喎，而1400同1300，咪又係差唔多，反正供多100萬計，拉30年都係3700蚊左右，對比十二萬家庭收入，真係好鬼濕碎，未來30年一定賺得番夠比有突的。所以如果用想住好D住豪D，要買全新樓要最豪華的野，又有父母科水都唔知駛唔駛還錢，咁真心，無所謂。但如果你問隊長我呢，就當然未必會咁搞啦。


好明顯，作為一個財務自由的人，真係要買樓計，攞住1500萬筆直，咁倒不如分兩舊錢買啦。一舊咪用單名買個900萬海桃灣500呎左右，首期440萬左右啦，月供18858元30年還，而剩番仲有360左右的，買間450萬的乜鬼細價樓收租，借多100萬左右每月供3700蚊，但收租收番14000咁計，剩袋番約莫10000蚊補貼個海桃灣個供款，咁即係自已兩個婆每個月只係供10000左右，輕鬆到暈左，但住的質素都唔係太差啦，總資產又差唔多，但成件事就安全左幾倍咁制，好話唔好聽第時有咩工作生活唔順境，又可以賣左收租樓頂一頂套現，又或可以供少D壓力細D回氣快D啦，認真真係完勝（係隊長主觀的睇法而言）。


當然每個人的決定都唔一样，又或者佢地有佢地的原因或實力，即唔通人地有十億現金又要同我講咩？所以隊長帶番個頭盔，係隊長我自己cheap人計屎忽數姐，但然而如果你屋企唔係幾百萬未開頭，真係要識計一計D數，否則你一供就30年，唔識唔識就係唔識，咁無話錯，只係行左冤枉路時唔好太後悔就好了。