真的得公屋得天下?

高登仔有芸，得公屋者得天下，意思即係係今日樓價高企的年代，與其要追趕脫彊般的私樓樓價，倒不如享受政府福利，入住公屋，以低成本解決住屋問題，未來就唔太需要再為住宿煩惱。


係某程度上黎講，的確入住公屋是解決左住屋的需要，聽落亦好似中左六十彩咁可以係一個仆街的現實世界下，避開同其他人競逐私樓住所，又唔駛每個月供大舊人工落去屋樓度，可相對盡情使用自己份人工，想去食就食，玩就玩，旅行就旅行，更唔駛太擔心無工開無得撈的長遠不穏。如斯美滿的人生，人生不也就完美了嗎？


以得公屋得天下黎講，隊長認為先要了解的係咩為之天下？當然我相信天下的意思唔會係全世界又或全香港吧，亦唔係離地到話可以同李嘉誠妣美吧，隊長的理解可籠統黎講應該係比一般人好吧。好啦，咁一般人又包括咩人呢？呢個又係一個好主觀的因素，即李嘉誠可能覺得全香港都有接近700萬一般人吧，亦即係話大概係同自己同級或以下的，可能都叫一般人吧。但咁講都太主觀，換個角度上得網的都應該係叫年青或中青吧，而今時今日可能一般人對於呢個年齡層黎講，都應該叫做讀過下書或者有個學歷或正職的人吧，而咁講的話，得公屋者得天下者，意思係可比起其他學位或打工者更好，呢件事又係咪成立呢？


要了解呢样野我地又要睇下公屋的政策，而相關的條文當然就係公屋的富戶政策，根據最新的房委會文件顯示，就以一人計，最高入息不能超過56,250或資產1,130,000，否則就會被DQ搬出去。好啦我地唔好計鑽空子的人仕先，就以政策談政策黎講，其實公屋的富戶政策就係講明你唔可以太有錢，有錢就會被踼走。所以，公屋的市民本身可能都無乜太大動力儲錢的時期，政策仲講明你係唔可以累積財富，簡單講你買中者騰信窩輪牛仔執一球，你都最好諗下點样散左佢，否則你真係可能唔小心中下嬴錢輸屋的伏。因此，公屋的住戶，某程度上唔計收埋D現金係自己間屋或攞晒番大陸的鑽空子行徑黎講，更傾向的咪就係食左去洗左去玩左去，慢慢陪養出一個相對肯洗錢的生活模式。呢個，其實係政府政策上係好事，因為大家有讀經濟都知saving rate越低，經濟就越好越活躍。


不過我地換個角度諗，公屋富戶洗錢洗得狠，邊個得益呢？無錯，係香港大財團所統治下，每個生活範疇只要你肯洗錢，都好容易落入大財團袋中，而大財團出糧較多的，應該都係中高層管理人員，相信佢地應該唔會有太多人住係公屋吧(有的，但比例上私樓多吧)，而大財團派息，應該又以能拥有股份越多的人派得越多吧。所以，資金的流向就好明顯係政府的公屋政策，不停將公屋戶的整体儲蓄財富的空間壓實，迫出黎的遊資就自自然然流向有錢人，而有錢人由於無公屋限制，買樓買鋪買股票，只會越買越多，越賺越多，因此貧富懸殊只會越拉越闊。


有人可能會話，喂其實如果我唔超上限，又或我根本都唔會超，因為今時今日我都係搵3皮，可見的將來都唔會越過4皮月入，資產有50-60萬已經好叻，未來十年都儲唔到超過100萬啦，所以隊長你講咁遠咁大無用喎。是的，如果你今日無，亦唔諗住將來會有，而你又覺得你自己已經比一般人好，咁都無乜所謂，無人話有問題。之但係當有人提出得公屋者得天下，呢個天下應該都有小小質數層次，而一個年青人應該都有多少夢想的話，咁真心講要不講出黎話可得天下的人的天下太細了。就以今日黎講，其實就算你搵5皮幾，有百幾萬資產現金，根本都唔係乜野了不起的事，香港求其有層樓的人都有過百萬資產，係銀行列出過百萬資金的戶口，亦相信有水蛇春咁長，甚至今日有百萬年薪其實亦非什麼高人一等之事，所以如果有人標榜話自己係百萬富翁而你又覺得佢好勁的話，那只是你自己層次太低而已，但從香港整体黎講，實在沒有什麼值得歡呼的事。


因此隊長想提出的係，得公屋的背后意義係政府迫你唔儲錢唔發達，但私樓的意義係銀行迫你儲錢迫你藏富。世界好大，就算有層私樓都無乜了不起，但如果目標只係一層公屋的話，短時間係有好多好處，但人生在世要計劃長遠的話，公屋整體黎講只會限制人的發展，除非你有奇遇並以公屋為短期住處，否則，得公屋得天下對隊長而言，不成立。