國內的中產

對於唔同人黎講，中產的定義真係好唔同，如財爺曾經講過飲咖啡就係中產，亦有人話自己一家人搵萬零蚊收入僅超過公屋入息水平就係中產，所以中產其實並無一個客觀的定義，而且隨住個人的收入同眼界及因年長同時間經歷，主觀的中產定義亦會跟隨改變。而今日要講的，亦係一個隨時代改變的新經濟的大陸中產。


早前有同大陸的其中一親友黎香港短住傾開，未正式投入工作的佢，係短短一個月就洗左大約8皮野，消費力驚人。當然，如果佢屋企大把錢我都無得好講，因此隊長當然唔會放過嘗試去了解下佢的消費力來源啦，睇下係咪富二代。話說回來，佢阿爸阿媽，一個搵萬二，一個搵八千一個月，加埋兩皮野左右，係大陸黎講算還可以啦。但問題係你父母搵兩皮，你一炮黎香港一個月洗幾皮野（未計住宿唔洗錢）咁有米，咁我再問下佢一個月所謂的零用係幾錢呢，佢就話固定的就8000，但係碌咭或額外消費就另計。呢一刻隊長都忍唔住衝口而出問，我話你媽媽月入都係得8000，你就一個月基本消費8000，條數點計啊？


當然，係我地香港人心目中我就緊係有番香港人自己的盤算。話說講下隊長的年代，作為一個大學生左右的年紀，我記得我的所謂零用錢可能只係得3000蚊左右，我嘗試去將呢個數字引導呢位國內年輕人了解佢的財政，佢就一下KO隊長我話，呢個年代點同隊長我果個年代啊。的確，隊長認同有通漲，之但係一來通漲應該無咁大，二來，8000人仔起步未計你其他額外洗費同黎香港一個月洗50000，真係超出通漲可理解的範圍，但當然隊長唔會出聲講，始終文化背景同經濟實力不同，了解佢地的有幾錢而又肯洗幾錢，先係隊長想知的事情。


講回正題，呢位國內的小朋友就話啦，其實佢屋企當然唔係靠工作收入啦，佢講番佢老家應該有兩層樓同一間鋪收緊租，亦重點講話呢家打貪係無任何灰色收入的，咁我都聽住信住先啦，而佢就話啦佢呢D只係小兒科，連中產都唔算。「兩層樓一間鋪，係大陸連中產都唔算？」我心諗，咁我就問佢啦，我話而家係大陸點先叫中產呢？佢就話其實最少都隨便可以買一兩層樓唔需要考慮，平均資產大約8000萬至一億起，先叫中產，而佢仲特別補充左句話大陸同你地香港的中產唔同，大陸呢家有錢人有好多，像佢呢種家庭根本一點都不算什麼。


聽到呢到，唔知香港的讀者有無酸流流的感覺，但一個未出身，而佢係就算打工都係萬幾千蚊的大陸人，一下子就KO左好多香港打成世工的人。是的，你可能會話，吹吧，再吹大D。但隊長眼見的，卻真的是不得不相信有一部份大陸人已經是這種狀態，三兩層樓可能由於以前有田有地有屋，政府開發收左樓配番比原居民，以前係平地呢家三十層五十層樓派番幾層出黎有乜所謂，成個大陸過去十年以至未來幾十年都係咁制造新財富，哪怕佢地收入仲係比香港低，但財富因為資產同財富效應，好容易就變成香港的中產，甚至超越香港的中產，呢個就係大陸的中產狀態。


你可能話未必認同喎，之但係你又諗一諗係香港，好多人的定義真係有一層自住樓有份工搵三五皮已經係中產，再好小小吧，比你有一層自住兩三層細價樓收租，兩公婆月入十萬，咁算中產了吧應該？Sorry，大陸大把人有錢過呢種狀態。基本上，而家我地香港面對的唔係講緊最有錢鬥最有錢都輸，係中間對中間果批你都唔夠人有錢。而你可能又話，邊有人同佢鬥姐，鬥乜鬼姐？呢個鬥，唔係你想唔想的問題，係大陸的中產會找上門，亦即係佢地有錢的程況，除左三角型最頂果一批人外，而家中產果班的實力，都已經係有錢得好緊要，而未及所謂中產的人，都可能有錢過你香港的老中產，而呢個人口的數字係大到好緊好緊要，而人口數字越多，機會黎香港買你樓買你鋪買你資產的人就越多，你想唔鬥時，人地卻會跑上門搞你，呢個就係今日的大陸中產情況。


未來大陸的中產係可見的將來都會繼續擴闊同繼續提高，理論上香港點都會水漲船高。樓的定價，如果你退後一步睇下祖國的實力，就明白再唔可以用本港人工黎定價了。