科技世界下食老本

有留意開最近上市的股票，不難發現越來越多科網股上市，其中包括全城癲搶的閱文，以致電競股雷蛇，都可以睇到係新世代下科技將會是被受關注的一環，所以全世界的科網公司如Amazon / Apple / Alibaba / Tencent / Google / facebook....，全都成為當下的超級巨企。


與2000年當時的科網年代唔同的係，當然的所謂科網完全只是一個概念，老實講2000年的時候好多人連上網係乜都未知，但差唔多果時你話整個網頁比自己公司攞個Dot Com的Domain name就已經會比人炒到上天，再者果時完全係無盈利模式可言，大家都係係度9up就炒。時至今日，facebook玩收廣告，Amazon當係網上百貨，Alibaba有淘寶，都已經有自己的收費模式，而其中支付寶以及微信支付更加係令科技時代打通晒任督二脈，有左支付的渠道，好多網購同遊戲的服務如雨後春荀咁遍地開花，尤其是係大陸市場，成個文化係對於使用網上服務要支付已經非常習慣，而且電子支付亦已經超級的浸入實體層面，所以係新世代下，網上服務呢個無形資產基本上將會獨領風騷。


而要數IT呢個行業黎講，全球的龍頭仍然會係以美國和中國為主，美國就有矽谷有天使同風投基金，中國就有一個唔知點解勁中意玩APP同又肯比錢的文化去支持，所以如果呢兩個地區非常吃香，產品的爆炸性亦相當之快，要紅要賺錢，真係一年半載只要食正條水就得，呢样野對於地球內的其他國家地區係好難追到，所以身處香港的我們，老實講你只會見得一D你可能從來無見過甚至用過的APP公司突然來招股，然后唔知點解就突然一大班人狂吹至有幾勁有幾勁，之後當上市後佢就會成為香港金魚缸來其中一隻股票，繼續比股民炒炒炒。


炒的當然唔係問題，但隊長想指出的係，其實係新世代入面，其實最開初的一間科網公司的價值，可能係非常之低。攞一個例子黎講係如BITCOIN，岩岩出黎果時其實不值一文，但到今時今日以接近USD6500黎計，對比岩岩出呢個東西時係升左幾百萬倍的價值。同样，任何一個未爆的公司可能價值只係一百幾十萬，但佢爆左個勁APP出黎之後，就可以變成十億百億的生意，這是一個前所未有的投資回報，亦係一個對於老一輩的人更加覺得匪夷所思的事情。


當然好多人會認為，車，個世界轉快左，人地賺錢人地的事，我不嬲都係IT百痴，最多咪玩少個app，有乜所謂？但問題係黎緊的世界將會係異常地競爭激烈，當你仲懞然不知的時候，一個新的app就可能係一個超短時間將你賴以為生的工作打殘。又舉個例，十年前好多賣潮衫的鋪頭，肯番去東門啊虎門啊，攞批衫落黎，D潮人行下行下就總有得做，但係一個淘寶的出現就將鋪頭仔同廠的競爭拉平面了，係淘寶上面廠商可以直接對客人，你以為你有地利優勢都無用，生意即時大減，仲有得做的生意都要減價去鬥。又或者以前你叫外賣，最叻都係叫附近果幾間肯送的鋪頭，佢地亦可能做街坊生意，所以唔係太好食都會有一定客源。但而家一個food panda一個deliveroo，將成個香港又拉平面了，係合理路程的區份下的任何鋪頭都變左做競爭對手，Pizzahut/KFC/金拱門都應該少左生意，因為選擇多左平面化左，呢個正正係你唔搞人但人地搞上門的好例子。


所以係新科技世代下，其實真係好難講邊度係唔會被挑戰，所以馬雲亦提出過係IT時代人人都成為競爭者，而係強烈競爭下其實生意會好難做，因為價格同競爭變得好透明，好多人會因為競爭平面化下要被迫改行同無野撈，而如果你問隊長亦該點搞的情況下，隊長認為最好你就是一個非常強的change management的人，非常容易接受新事物而且勇於不停了解新事物，做一個潮流IT人，亦最好係IT公司裡面會更好。然而如果你認為咁样做好攰的話，個人認為一些IT不能取代的資產投資，雖然升幅可能慢，但只要係必需品就都沒關係，而呢样野，當然就係樓了，亦即係你再叻都要有個地方住，再叻都要有地先可以起到樓，所以買樓係新世代投資黎講，雖然遠遠落後IT的發展回報，但只少唔會因為IT界的挑戰而突然被淘汰。


未來的世界隊長摸不透，亦唔想太辛苦去估去摸，所以要抗科技通漲的話，買樓是一個不錯的選擇。