2046 and Beyond

對於香港人黎講，2046有一個好深層意義就係我地的50年不變將會到期，而距離呢50年不變底下，雖則香港已經有好多變，但香港人最關心的兩個重要議題，係政制發展(民主自由)及樓價，而呢個30年後及將來的世界，就讓隊長試下預測一下會變成點。


先講政制發展，相信好多人都希望民主自由，而如果係自由度上黎講，也許2046會比今天收窄左，但相信2046的香港人權又會比今日的國內自由，主因係國內的人權情況就算再緩慢發發展，也會有較開明DD的路線。然而，中國都會係一個一黨專政的國家，這是不會改變的事實，不過你話一黨專政有無咩好同唔好就一定有排討論，但係係30年後的世界，一黨專政是有極大的優勢，這是隊長第一次意識到中國在未來世界的意義（突然染到好紅）。


30年後的世界，當民主派的老鬼都退下來，楊岳橋都60幾歲時，其實可以講到時你的政治取向係乜野已經唔太緊要，因為未來的世界會突然多左一個好大塊的政治光譜或潛在危機，就係機械人發展到相當成熟，甚至變成一個威脅，所以果時的政制已經不太重要，因為人類將會面對共同的危機。三十年後的世界，科技由於AI同機械人的高度融合而且AI的超級學習速度，呢個世界每半年都變得好唔同。從日常生活中，車已經可以無私機駕駛，老麥可以接近零人手去操作時，基層的工種已經可以差唔多全被取代。估計地球上去到2046，有一半今時今日的工種將會唔見左。


人類的價值就更加變得好細小，試諗下你讀十九幾二十年書先可以叫做講到下英文知道自己做緊乜，到左公司仲要不停吸收經驗先進步，但機械人係唔駛的，佢地唔駛幾十年學習，唔駛訓練自已已經可以講晒全世界的language，亦可以24小時不眠不休咁工作，又可以唔駛食野而且理論上長生不老，估此推到100年後的全世界級，智能叛變式的terminator 或matrix之類的世界一定會出現，因為人類實在去到某一個點就會輸比機械人同AI，到時我地就會淪為豬牛羊的生物，所以討論政制係因為人在同人競爭，但當機械人可以取代我們時，政制自由已經不太重要，即你有無見過豬同牛會坐埋一齊講自由講理想？


不過係未去到終點之前，呢個世界會出現一些現象，比如可能係2046的世界下:


- 馬雲馬化騰Sundar Pichai (Google) Jeff Bezos (Amazon) Bill Gate (Microsoft)....等科技巨頭...將會成為世界最有影響力的領袖，原因係佢地拥有的AI技術已經可以控制全世界，就算總統都無佢地咁勁，或者可能佢地會融合成為領導人都說不定。

- 人類會好長命，甚至超級長命，因為本身科技帶來的好處係長壽，食物又健康左，醫療又好左。而科技的突破，有可能能攻破人類衰老的關鍵，又或者能做到將人腦同機械人結合，人可以倚靠機器續命多百幾二百年都未定。

- 人類會變左奴隸制，原因係太多工種唔見左，好多無學識的人根本無能力生存，而有學識的人就算無資產其實都無乜用，因為AI的出現令學識變得相當便宜，即你可能問你屋企的機械人管家可以上至天文下至地理甚至核彈係點整又或點样做一個手術都可能做到，你讀幾十年的心血都係唔夠機械人鬥。因此，到時搵錢的就係靠你家山有福，你有樓有股票的，每年會收租收息可以生存，但你靠出賣勞力，根本不值錢，真係除非賣屎忽，否則窮人永遠係窮人。


因此係未來的世界，樓價係肯定上升得好緊要甚至你係無可能再買到樓，一方面因為資產已經成為必需用來住及生財的唯人代替品，而另一方面人類的超長壽會導致對樓的需求不停提高，即你諗下老的人可以活到150歲200歲，後生仔卻不停成長，樓邊會夠？


不過唔駛太擔心，呢段時間唔會好耐，因為就如上文所講，當AI自我發展自我學習后，一定會有一日自我認知到可以取代人類，然後一定會智能叛變，然後就沒有然後。唔好以為會遠到我地睇唔到，因為可能到我地80歲90歲都唔死得時，竟然有技術轉我地去機械人身軀的時間，的確係有可能目睹人類的最後日子。但係呢一日之前，隊長真心建議大家，好好計劃自己的長遠退休計劃，因為你可能真係活到好長命，而長到係享受定係活受苦，真係取決有無計岩數。