中國教條

中國的十九大會議，習大大描繪出未來中國幾十年的心願景，之前隊長都寫過唔少篇幅，中國的崛起已經係勢不可擋，而同日係德國，華為推出mate同mate pro手機，市場反應相當理想，睇番而家手機界的大哥大，以萍果同三星仲係領先，但之後就係國產的華為 / OPPO同埋小米，呢兩個事情，令隊長亦對中國崛起有新的感觸。


係十年廿年前，你可以視中國崛起為一個過程，而係過程當中，我地不期然都會攞外國的經驗同做法去閱讀中國，舉個例我地會話中國手機點點點，但應該要學萍果等等。而背後如果你唔係行業的內行人，你可能未必睇到個變化，而隊長作為睇住成個產業鏈變遷的人，我可以話你聽我覺得好恐怖，因為中國式的商業營運操作，係無良地有效咁將良性的競爭擠出去，而呢样野而家係隨住中國崛起而不停變強大，老實講我地呢Ｄ老香港的中坑，其實已經我認為已經係走到接近邊緣或盡頭，未來好難再係中國的教條下立足。


其實以前個世界，係以西方國家領導，而香港人有西方背景，中國內地就比較落後，所以香港人有優勢。但隨著呢個時代巨輪的轉變，中國企業做得好大好大，而歷史話比我地聽中國的漢唐宋潮的盛世係會有二三百年的國運，而如果呢個立論係合理的話，咁中國盛世應該係我地有生之年都會繼續壯大，所以從之前中國人要走出去的年代，隊長認為今日的十九大話比我聽，中國有機會大到可以令你要走入去，意思即係西方果套已經唔合時，你要做中國人生意，就要用中國人果套手法，而呢套手法我唔知會否如習大大咁講話會變文明，但如果做唔到的話，我相信個世界會變得好奇怪，你要立足就不能獨善其身。


係中國的商業圈入面，隊長認為香港人的定位真係好難，舉個例有工廠的PM係幾乎住係生產線入面，朝七晚十一，一個星期有6日都係咁，有家都真係歸不得，為的就係要用盡最快的效能接到客戶的訂單，所以成條生產線成個BU都會係瘋狂咁做，而呢個PM可能月薪只係得12000左右，不過年底有花紅約10萬，我眼見的呢D PM，講真我深信香港的年青人做唔來，唔係睇小香港人，但一來我認為好多香港人唔捱得，二來我認為就算你捱得，你都融入唔到中國好local好本地的文化商圈，打個電話講句野的感覺你唔係果種人就唔係果種人，做唔到就係做唔到。


而如果你認為做供應果個慘，做客果個應該就舒服了吧？我可以話少年你也太年輕了，實在做客果個就日日周圍飛，朝七晚可能都有五六點收得工番酒店，但又如何，你訓醒今日同聽日你唔會記得自已係上海定北京定廣洲，日日都唔同，因為做設計做工程做生產，係九十幾萬個問題，隊長見到的客都係一样痛苦，老實講做呢個行業大家都係鬥快，為的就係早推出產品到市場佔盡先機，咁先有市場的機會，呢家高速同高壓的環境，我相信並唔比起香港的速度又太大分別，而未來的中國亦會繼續係咁做，所以香港人如果進入國內的話，想從低做起一定頂唔順，但未來中高層又唔會到你，所以真係唔知點算，更莫論你習唔習慣到更多其他的中國教條。


睇番今日的香港，好多的中國企業已經開始進駐，今日你已經見到不少陳总刘总李总，無論你叫唔叫得慣，未來都只會越來越多乜总乜总，連鬼佬都無法阻擋呢個現實，而且由於中國人真係好多，國企走出去係真係會走到全世界做生意，就連月球同火星都遲早會有中國人的足跡，呢個唔會係一個九吹，而係一個幾可肯定將會發生的事實，所以要係未來的世界立足，我地呢一代人真係要有好好的change management，而又或者，唔好諗咁大，只係簡簡單單做國lo lo cal cal 的香港人就算了。


不過，有样野隊長係商業圈學番黎就係上家同下家的分別，即如果你係大陸做客人，你係上家，大撚晒的。而你如果想賣野咩，你就係下家，話之你係乜高層都好，上家的一條靚仔都可以玩死你下家的高層，所以如果想係未來立足得舒服一點，那就記得要做上家的位，而套落係今時今日的香港，面對住中國崛起的事實，經濟向好是肯定的，而係物業市場，好明顯的短缺下，上家始終係業主，所以未來的世界，有層樓真係會活得舒服一點。