錢與資產的價值

今時今日，係香港想買層樓真係唔係一件容易的事，以400萬樓下黎講上車仲有9成計都要約50萬首期，及至去到500萬左右的樓已經要超過120萬左右黎借8成供，老老實實如果你問隊長我剛起步黎計，真係會覺得好灰燼。最慘係你上到車都唔係講緊搞掂晒，你係清完袋住後每個月仲要供皮幾兩皮野，一個普通後生仔真係都幾難頂。


然而，儲呢舊首期又唔係一件易事，比你儲1萬一個月，五年先儲到60萬，十年先儲到120萬，好話唔好聽上左岸的就緊係話後生仔捱下，但實際叫你死慳死抵捱五年捱十年又有幾多人肯，又或者又幾多個上左岸的人肯啊？坦白講，隊長我真係唔銀制。之但係，呢一個五年十年的旅程其實都只係為下一個地獄之旅而準備，而且每個月儲一皮的價值，除左係一皮野之外，對於好多好多的年輕人真係放棄左好多活動同回憶，老實講如果你由22歲到32歲都好慳的，到你老左開始有番錢時就發現買唔番年少輕狂的歲月，所以呢每個月1皮的價值隊長認為係高於你實際儲到1皮的價值，再者呢個世界仲有通漲，儲完其實仲係會貶值的。


而當你買到樓後其實都係好慘，每個月供皮幾兩皮供30年，呢個只係你買約莫500萬樓的結果，而如果你選擇買間九龍的正經兩房，好易就去到700-800萬，well咁你預起碼每個月供兩皮幾。講真呢家香港人的人工雖然都唔差，就當你兩口子加埋70-80K的人大有人在，之但係要攞番兩皮幾出黎供樓供幾十年，其中有一人停手唔做都真係唔得掂，呢個就係今時今日生活係香港而又未上車的人所被迫選擇的樓市生活，因此呢家林鄭話推上車盤比首置客，其實亦係好有道理的。


而作為叫做既得利益者的隊長，相信講得出上面呢堆野的我都應該唔算太離地，因為我不時都係度諗如果我都係無買過樓的話其實會係咩情況。但當然，有樓的我睇的其實又唔係覺得有乜大不了。


當然我會睇到的係，我可能任何一個物業對於未上車的任何一人黎講都已經係一個好遠的目標，然而當你拥有佢時你又會覺得其實又唔係有乜野咁特別姐，簡單講如果只係得一間屋兩間屋，係香港係咪可以唔駛做呢？當然係唔得啦，有排都未得掂。換句話說，你未有樓的，可能會要為一間屋做成世，但隊長有樓的，又唔見得可以成世唔做喎，所以呢條數學我發現都唔係咁對等，即係好似點样都仲係要「做」。


最近由於公司的變化，以及隊長其實一早已經訂下目標唔做，所以都不停係度諗究竟隊長如果無得做，又或者到隊長訂下目標唔做之時，究竟我份糧對我成個人生有乜影響。而我得出一個好奇怪的結論係，以今日份糧黎講，我份糧係一個好古怪的位，做多幾年呢，對我個盤其實又唔係話有好大分別，當然係會有影響，但如果逗埋佢呢，其實又唔係話好多，難聽D講如果未來幾年樓市升多10%，其實都已經等於我份糧的收入，所以有又好似幾好，無又唔係話好唔掂咁，古九怪。


然而其實今時今日錢的價值真係好唔同，早三五年十皮八皮都好似一個數，今時今日開始好似唔係錢咁（當然你送比隊長我我都會要），但我意思係今時今日錢已經去到一個幾特別的情況就係貶值得太快，你自己打份工搵的錢真係唔會太多，遠比起你資產價值的變化落后，而你如果唔要份糧唔得的話，你又谷住賺一個無乜意思的收入，總會被資產拋離，所以我都好慶幸係上左車的一批，而如果你仲未上車的，老實講我都真係幫你唔到，因為如果換番我去你個位，我都真係未必睇得通該點样行先岩。