邁向四十

呢期同唔同的朋友又傾計，好多70尾80頭的人，慢慢都開始邁向四十歲。之前隊長我呢個80後仲係講緊三十而立的時間，慢慢都感到自己半隻腳踩入下一個十年，而呢種漸老的感覺，亦開始去回想一路以來走過的財務自由同工作之路，以及將來的何去何從。


其實由隊長寫Blog開始，已經同大家講過人生兩有兩份工作，早期的時候係側重多點幫人地打工，而到中期的時候就應該有一個自己的工作(被動)收入，到成熟期後你就可以睇下係咪要同時做兩個工作賺取收入，或者選擇做自己喜歡做的野，呢個時段亦反映左一定的財務自由的境界。


而至於點解要咁样鋪排，好大的問題係在於你同人打工，主動權永遠唔會係你對手，即你做得再好，又或做到幾差，可能都唔一定對你的工作有正面的影響，只要你老細突然睇你唔順眼，又或者管理層突然變動，今日你以為你自己仲係高峰的時間，24小時後你可以完全upside down，呢個風險係早期你仲後生時，其實真係無乜所謂，正所謂東瓜唔打打西瓜，後生仔唔做呢份工做果份工，無拘無束，搵過份工再起步，人工又差唔多，真係難聽D講怕西咩? 但當你不知不覺行到人生中段，回頭一看自已已經不再年輕，更有可能多左負擔，而你份糧又去到一個水平時，又發現自己當初果把火已經熄熄地的時間，well，你會慢慢不自覺咁踩左入一個泥潭，如果你唔一早抆住條繩以減低下沉的情況，甚至提供向上逃生的希望，前面就只會更多向下沉，所以有一條救生繩的希望係好緊要，而呢個亦係驅使隊長行財務自由的路的主因。


時至今日，隊長都係社會打滖左十幾年，當中係職場上都叫做瘋癲過，珍惜過，更加有動地驚天愛亂過，之前都叫做托賴係高低之間過左重重難關，但當自己以為都已經打穏江山時，你又無諗過一個新的管理層上場又可以完全將你的功過漠視，然後可能更加唔太明白如何運作一間公司，到最後會唔會殺錯良民或誤中副車咁戰死雖然係未知之數，但一下念頭閃過的係面對一個突然的不穏性出現，隊長更加托賴的係，自己人生的工作，原來都已經走到一個境界係，慳慳地都可以維持一個不太丟人的生計。


當然每個人對於生活的要求好唔同，有人食麥當勞雲吞面就得，亦有人要食米芝蓮三星先夠，唔同的生活享受當然就要有唔同層次的財務自由去支持，而本身隊長其實都set左一個中上的目標去實踐，但如果目標只係唔死的話，相信早就已經財務自由一千年，但要去到有一個可享受的境界的話，認真隊長有計過係需要去到四十先有機會，而要去到呢個境界的其中一個主要條件就係本身個工作都要能支持到四十先得，不過如果風球係要殺埋身的話，退一步將物業投資再調整的話，一個普通左右的生活條件，以三張幾野的人唔駛做就可拥有黎講，其實算係好唔錯。


將來的事係點無人知，但至少計算到自己的plan A plan B，個人的內心其實亦比較踏實，當然呢個世界無話絕對肯定會點，所以如果能夠再鞏固現有的投資係更加理想，本來想簡單平靜咁做多幾年的隊長，企係邁向四十的呢個分岔路，都好感恩原來自己一直以來的想法都好岩，如果真係唔小心行錯一步或行少一步，無得揀plan B的話，人生面對逆境就更加難處理了。


所以奉勸大家真係要建立好自己的被動收入，因為你永遠唔會知道自己幾時會有plan B的需要，而plan B唔係over night會出現的選擇，當日種的恩，將來就會結成果，而有沒有果實盛開，就要睇你幾時先懂得播種。