香港租客質素

近期幫我老母搞D屋，花臣多多，一方面遇上一個職業租霸，由唔交租至到申請土地審裁處，上庭我都有小小參與，搞左半年呢個鬼佬職業租霸終於係執達吏上屋企前的15分鐘離開，可想而知其實佢都已經係極熟悉法律程序，知道玩到乜野位先係遊戲終點，而且係今次的法律遊走一圈的過程下，其實有心玩野的租客真係可以話無乜手尾跟，特別係擺明乜都無的，真係唔怕你告，所以做業主真係要千萬小心。

然而，我老母的另一套樓就又係時候出租，經過租霸一役，佢終於明白大部份的地產代理，就算果一刻當你幾咁老死幾咁好都好，到時尾只有一個好現實的目的就係做成生意，而做成生意的前題下，所謂乜春幫你搵個好租客呢D說話，基本上係完全逢場作戲，即基本上只要行入鋪頭搵樓租肯比佣的就係好租客，前後識左五分鐘都可以吹到同呢個人相識左九世人，而到最後住得有衰，又或者唔交租，乜乜物物，都係你業主自已受，而佢果幾千蚊佣就當然暖笠笠落袋。

當然做代理就無得包生仔，個租客係乜質素就真係管唔到，所以橫掂都係，隊長就不如自己上網幫我老母搵下客仔好過。上網客的好處就係通常上得網搵樓，都會比較後生小小，但係唔好處就係呢D人通常都係cheap cheap租客，總之就要好似格價專家咁，用一世紀去將整個網海的所有盤格晒所有價然後搵出最最最最L平或最高價值果間屋為目標。咁當然無人同錢有仇，之但係呢種心態點解隊長咁深刻呢，主要都係同佢地睇樓同埋溝通有關。

隊長成日講，見租客的確係可以擴闊眼光，睇盡人生百態。

客A: 一個女人帶個小朋友兩歲，想要最平，然後放我飛機。

客B: 一個女人，四十歲左右，上到來好似幾中意，但佢個Feel有小小跳制，唔知係咪隊左小小草咁，咀角成日有小小想笑，思路又有點怪，黎到呢就成日同我講佢等緊另一個盤，因為果度好似更適合佢，然後問我有無得傾價錢，又問我可否短租，心諗你估我好得閒同你租半年又搵下一手咩？不過呢個都算正常。

客C: 一個女人，電話溝通好斯文好有禮貌，黎到就真係唔好介意我咁講，有小小似泰迪羅賓的女版，隊長我對殘障係無任何意見，但問題係我老母岩岩先整完個租霸，真係唔好介意如果再整多次，會唔會打撚死我呢個衰仔呢？所以我都只能好有禮貌咁，提高個價錢希望大家deal唔成功。

客D: 一個女人，四十五左右吧，住元朗村屋坐大半個鐘頭車特登來睇樓，我問佢我話點解搬咁遠，轉工嗎？佢話唔係，係未諗定，但村屋住左六年，都已經裝修發毛，所以想搬就黎睇下，我心諗你真係玩野喎。入到屋，行左五秒，同我講有無得平，我話你睇岩再傾，然後佢話咁好啦唔該你先，我心諗你無野嘛你睇到D野我睇唔到撞野啊你? 但你撞野就唔好問我價啦老闆，都唔知佢玩乜。

客E: 一個女人，四十歲左右，Ivy (唔係佢個名，係佢個身型)，同個男伴來睇，正正常常，行完睇完，但似係個样暗藏挑剔，都係唔岩就走，當正常。

以上，係我總括呢排見到的租客的人的情況，但再要加多個評語係，呢班人的感覺都唔似係做D咩比較像样的工作及收入，即你以為係街撞到正正常常一個番office的人搵三兩萬斯斯文文咁果D，全部唔係。我心諗香港人到底發生乜事啊，做乜可以搵個正正經經的租客都咁難。

不過，其實唔到我唔變左膠又黎，因為再黎一個客，國內同胞，番office，正正常常，斯文有禮貌大大方方，帶齊收入證明，有誠意，即租，無計。唉，唔到我唔認命，香港租客質素真係不敢恭維。