認清大勢


呢兩個星期股樓繼續暢旺,甚至可以話係大升黎影容,股市已經上破25000點,中原城市領先指數就連續12個星期破頂,股樓勢如破竹,有傳話習大大今年會黎香港,所以國家隊更加入市支持股市,營造國家收番香港20年的大好氣氛,係咁样一片疑似歌舞昇平下,今年似乎都係會繼續牛市。


講到習大大黎香港又要講番祖國的經濟,其實淡友成日話香港樓市會冧,之前都講過呢家一河之隔的深圳樓其實隨時同香港差唔多價或者過之而無不及,咁香港作為中國的其中一個國際級城市,唔好講短期的走勢先,長期的話應該會跟住整個中國的國勢運行。


所以,其實要預測未來樓市,短期的調整唔敢講,但長期的走勢真係好鬼簡單,你自己問下自己你認為十年廿年後的中國對比今天的中國,經濟上會更強大定係會變差,咁就知道答案了。


環觀今日全球經濟,雖然似乎已經走出海嘯後的谷底,美國已經開始好轉,但呢種好轉都只係話有谷底走出來而唔係V型反彈,而唔講美國睇下其他地區就仍然係一塌糊塗,歐洲其實仲係好差,日本都係狂印銀紙先好小小,南韓呢個新貴就因為總統同samsung問題糾纏,其他東南亞都無乜亮點,二三線國家更加唔好講,而個個都唔掂的情況下,唯獨是中國仲係好L掂,年年都仲係增長,唔講保8保7定點,就算年年只係5%,以中國個經濟規模黎講對比其他人仆緊街你發緊達,十年廿年後好難唔掂,甚至換個角度應該話好L掂,呢個大勢其實真係好鬼清晰,所以當十年廿年後的人人工都加了,財富繼續增加,樓市係香港鎖住個按揭槓桿下又唔比個泡沫擴大,咁點跌呢?


然而大勢其實仲有一個好痴線的現象就係呢家中國人真係用經濟攻陷世界,你去旅行就可以見到其實好多主要的景點同地方,都可以見到中文字甚至中文的廣播,而且你去到邊度都可以無厘頭聽到人講普通話。中國有13億人口,佔全球25%的人咁濟,如果當中有5-10%人口係流動中都係會出出入入,即係大約有一億人成日流動,呢個亦係中國人向外的大勢,所以未來將會有更多的中國人向外常駐,就算唔一定係移民,都會係一個趨勢,而香港係呢個趨勢當中又係一個主要的受惠城市,你唔好計咩單程證先,就咁講黎香港出差旅遊讀書之類的大陸人,無論數字上以及個逗留時段都會係越來越多,呢個亦係一個大勢。


呢個大勢亦即係會催化左中港融合,或者可以話溝淡,而當中就會將經濟的走勢關聯度提高,所以香港樓更加會跟住大陸國勢行,而且來得香港的有相當大的一群人係經濟條任較好的,慢慢佢地就會變成香港的中流抵柱,包括係一群同样消費模式的族群,以及會成為好多公司的中層,高層,甚至本身已經係內地黎的你老闆,接著香港就會出現換血潮,你競爭力不足就會慢慢被邊緣甚至淘汰,呢個你可以話係今日發生緊的事,但你如果跳一跳二十年後,就更加可以睇到個分別。


大勢好易睇,所以樓價好易睇,短期你估樓市要跌要調整係無問題,但一年兩年三年你唔買,咁好容易就又會跳價,到十年廿年後,邊個仲係香港生存到,邊個要被邊緣化,可能關鍵只係你有無認清大勢。



留言

  1. this situation is just like Japan in 1980s.. they go to visit everywhere, buy everywhere and having banking in everywhere. no one will guess 30+ years later they are still worse than that time....

    回覆刪除
  2. 香港出差旅遊讀書之類的大陸人,無論數字上以及個逗留時段都會係越來越多,呢個亦係一個大勢。 < 同意的!

    回覆刪除

發佈留言

此網誌的熱門文章

香港租樓故事 -- 女B版

DSE題三: 專精一事還是多元人生

俄烏戰爭的懶人包