為上車捱世界

最近樓價狂升，唔同的文章以及鏗鏘集的催谷效應下，好多後生仔都會怨買唔到樓，當然去到今時今日的樓價買樓的希望的確細左好多，不過從數字上並非完全計唔到，只不過係如果話比你聽買300萬到400萬果D私樓係衰到無朋友時，好多人接受唔到然後就會怨自己無機會，呢下我覺得係要有心理的小小調整。


隊長唔想太離地，所以的確你問我，我都會覺得今日300-350萬果D樓好難買得落手，而去到400-450果D，上年年底仲係講緊350，呢家去到呢D位又好難接受，呢D心理關口唔好講上車的人，隊長我自己都頂唔緊。不過買乜係一件事，計數上就另一样野，的確350萬呢家一定仲有樓買，仲有得比你9成，而你買唔買就係自己的決定。


然而，好多出黎幾年的80尾90頭會話，嘩我死慳死抵日捱夜捱仲係買唔到樓追唔到樓價，而且仲提出咩唔去日本旅行換少兩部手機就可以上樓係呃人的野，而年青人正值壯年仲要靠屋企幫連自己都搞唔掂係一件邏輯講唔通的事.....以上等等的野，作為一個80後我想講，少年你真的太年輕了。


開講有話，牛都好勤力，咁又點？你係咪同隻牛鬥勤力？


難聽D講，係今時今日呢個智識同資產型經濟，你諗住辛苦同捱就會有正回報，呢件係一件好好笑的事。老實講如果你相信呢個邏輯的話，你應該去做D計勤力的野，比如楂的士咁講，而且唔應該讀書唔好嘥時間，總之日楂夜楂假期都楂，我相信你一定會捱得更有回報，你越捱得就賺得越多。但係好衰唔衰如果你選擇做商業社會靠智識靠能力靠表現靠職效的工作，咁請你唔好太天真咁諗捱同辛苦就有更多回報，因為係一間公司入面，最唔值錢的野就係叫做勞力。唔鋸唔信？咁你番大陸你睇下究竟係做生產線的勞力搵多Ｄ錢，定係坐係冷氣房的人搵多Ｄ？而且，你又諗下生產線的人數多Ｄ，定係Office的人多D? 你會發現，賣勞力的人的時間係最唔值錢。


咁你又可能問，咁點姐，呢家我死慳死抵係買唔到樓啊嘛，無希望啊嘛，想要個安樂窩點解咁難喎？Well，可以點答你呢，其實簡單來講呢呢個問題係你自己個思維問題，正如我文中一開始所講，數字上並非完全無可能，當然你一蚊都無仲周身債就唔好講啦，但你正正常常搵三兩皮有幾十萬，咁就唔係買唔到樓的問題，係你個思維困住自己的問題。假使間你係有能力，而你自己唔知自己有能力，又或者覺得自己無能力，咁就係思維的問題大過一切。


點先知自己有能力定無能力？好簡單，你識計計到自己買得到400萬樓下的樓，咁就已經係有能力。懶Ｄ講，你如果有40萬左右，月入大約有30K，其實你係應該買到野ga la，而如果你係少於呢條數得唔得呢？都有機ge，搵方法嘛，搵人擔保搵屋企人借搵個伴侶夾囉，大把方法。但計得掂數之後，好多時問題就又loop番去話喂，買唔落手喎，咁就無計啦，係你唔買，咁你今日買得起唔買，聽日買唔起時就無得怨。


我成日都聽人講話咩買完供30年係樓奴，有排捱。但同時，我又會聽到人話，我番工捱辛苦捱眼訓捱面包，好捱得。我覺得其實好奇怪，你咁捱得，但你唔肯捱層樓，咁你有幾捱得呢？而且，其實大部份情況都係頭三兩年就係捱，捱捱下呢就因為升職加人工變得輕鬆了。


寄語我之後的年輕人，你地真係捱得的話，或者你勇於計到數就去捱層樓，可能先係一個出路，廿一世紀，今次的捱世界，將會係一個不一样的時代，要用不一样的方法，先可以突圍。