超級通漲二期


相信如果你追得我個Blog夠耐,應該都睇過一連七集的超級通漲,而隊長亦應該就算唔係第一個提出超級通漲的Blogger,都肯肯定係頭批睇到咁遠的人,而且唔到你唔服,呢家睇番最近一篇的超級通漲(7) - 驚世預言,無論時間上同埋細節上,即係當時2012年話5-10年後開始黎料,以及當亞洲資金走番去經濟好的美國時,超級通漲就會進入第二期,而當下呢幾個月的香港樓市,似乎就係話比你聽呢一浪向上的勢頭已經湧現。


近期隊長又再出去搵盤,一方面之前賣左一間樓的資金坐係度真係無乜用,試下睇下有無荀盤可以再吸多間細DD的,但係呢個時間出去搵盤真係嚇親自己,盤少都算,叫價進取到你唔信,基本上唔好話市價係荀,就算市價叫貴多3-5%,肯收票都難,個個都勁積極,問你點頂。而呢個進取的程度,隊長要帶出係急到傻左,上個月我出文時3.6-3.7M的野,一個月下來應該去到3.9-4.0M了,一個月升10%的呢種速度,比起之前任何一段時期都要急。


從經濟面去尚試探討的話,其實環球經濟之前隊長都講過已經回復左好多,然而每個人受惠的情況都唔一样,即係你做老闆的可能第一水已經膁左,但佢賺完先加人工派Bonus比你,你已經係一個滯後的因素,所以呢排新樓盤咁Q貴一样入飛入到傻,主要就係春江水暖有班人已經賺番到錢唔怕洗,亦即係話之後經濟應該會再好DD,再過小小時間到番中等收入的人加人工重番市場似乎係可預期的事情。


係呢個速度下賣樓其實好唔著數,因為無論係二手市場的賣家,抑或係一手市場的發展商,其實都好怕開錯價,今個月賣比你400,下個月可能已經賣到430-450,不過一手市場的叫價可以tricky D進取D去開,始終明碼實價總有人計岩數就衝入去,好過係二手市場要估估下出價,所以你見到新地開個一手樓屯門珀御都地獄式極度進取,咁有幾進取呢?睇下下面呢段蘋果的介紹:


珀御昨公佈首批68伙價單,實用面積310至497方呎,定價平均呎價15,935元,折實即供平均呎價12,748元,即供買家最多享有20%樓價折扣,即供價由395.76萬至622.08萬元;4個開放式戶分佈27至30樓J室,310方呎,入場費逾「四球」,折實421.52萬元至425.99萬元。低於400萬元以下單位僅1伙一房單位,復活節後開售。」節錄自蘋果日報


呢口價黎講,如果你係買九龍區都算,買元朗近地鉄,我都無可厚非,但呢個珀御係響屯門邊垂位,去番市中心要撘番小巴,都可以講話係屯門的二三線位置,但出奇地呢度哄成13000一呎咁癲,主要都係因為細細粒容易食得黎,個市又夠癲夠旺,難聽D講我相信又係會有班傻仔狗衝去買,一Q清袋都唔會係問題。當然你可能又會話隊長你唔係話超級通漲咩,點解又話人傻仔呢?問題係同一時間你如果用450-500粒買番間沙田的二手樓,個人相信嬴面會大好多,但呢個世界一样米養百样人,呢個盤細細,加上Agent會落足咀頭,我估亦係會一Q清。


好啦,當連屯門細價新樓都賣400,下一個細盤據Agent軟銷中的就係沙田大圍段宏安的薈蕎,而如果薈蕎見新地咁的location都賣到4球,發展商仲唔可能谷到4.5-5M或以上入場嗎?點講都好夾住沙中線的概念以及沙田大圍不嬲少新盤供應,賣到17000-19000呢口價應該問題不大,到時全成見呢D本來貼住400萬的樓三兩下就跳到480-500萬,你有貨的仲會平賣嗎?


呢家個市好似癲左咁狂升,好多人話已經同香港人的收入脫節,個人認為呢個又係一個謬誤,一來好多人唔係打工仔,係老闆,佢地的收入唔會排入去入息中位數。而且,呢家只係將樓市夾小個成交,並且針對向金字塔的尖頂向上移,不過呢個尖頂原來唔細,有錢的人仍然好多,超級通漲下如果當你明年見到加人工時5-10%咁加再大派bonus的時候,今日的樓價又可能會變得便宜了。





留言

  1. 薈蕎雖然位處大圍,但地址係大埔道7838號,豪宅地方,百無,對普通人來講極不方便,唯一好處係多的士出入,屯門珀御方便好多

    回覆刪除
  2. 按照屯門珀御$13000價,個人估計SHK天水圍3個盤更加唔會平賣,雖然有6000個細單位供應,但可以慢慢賣。

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力