轉按的不快故事 (下) 之經絡正面回應及東亞幫手篇

其實任何大企業，做得再好都會有個別事件令某些客戶跌落不是正常服務水評的情況，特別係做按揭時因涉及太多個人財務問題，稍一不慎就好容易令一個生意變成一個不愉快經驗，而係今次事件，中銀同經絡就又有明顯的對比。


簡單黎講，中銀比隊長的感覺次次都係差的，而且更加懶得理你咩料子，一貫唔做你生意就唔做你生意的態度係充斥著每一角落。點解咁講？因為其實話說係上一次轉按時，隊長都用過中銀，而中銀的職員係話因為隊長轉走過按掲，所以銀行定左我係轉來轉去的客戶，因此唔會接受我申請，亦即講明唔做我生意。我當時都嬲嬲豬，我轉走左亦諗住轉番入來比你，你竟然同我講唔做咁得意，我當刻咪唯有連個中銀理財都closed埋，過左年幾兩年呢家諗住又試下，點知另一個按揭同事跟進，雖然已經無左所謂轉出轉入的Record，但態度完全欠積極，生意太好我相信對我地呢D細客仔都無乜興趣，因此其實我地諗乜佢地都未必會在意，所以係咁都真係say goodbye了。


反觀經絡的感覺我覺得就正面好多，因為星期一時相信經絡接到投訴後就好重視，當日我已經收到經絡的一位高層電話表示對我的不快經歷感到抱歉而且會進行跟進。值得欣賞的係呢位高層的soft skill非常好，有耐性亦肯聆聽，而且對答中亦感到佢完全明白事情的來龍去脈，係處理客戶不滿時絕對係做到恰到好處。而更加好的係經絡呢位高層亦積極尋求解決方案，一方面佢建議再看看要不要增加銀行的選擇並嚴選有經驗的Banker，二來亦看看能不能在按揭優惠上能搵到更好的Offer，明顯地佢有經驗咁捉到客戶心理亦有誠意咁企係客戶立場去諗。


跟進的事情亦一浪接一浪，J小姐都突然好積極咁蒲頭去跟進番我個Case，當然可能佢都有比人照過下肺，但有照又好無照有好，最重要係只少肯正面回應事件。到最後由於我對東亞的Y小姐特別有信心，所以我話基本就肯定可以選擇東亞，而J小姐亦應該有同東亞溝通過，係我個case應該又有小小特别照顧，所以見到Y小姐時佢亦特別好招呼，但我同Y小姐講其實都唔駛當我貴賓，實則我都係快人快語果隻，只係今次中銀條女一開始火燒連環船先唔好彩燒番去經絡先會再要各位多點照顧，但實情我同Y小姐都係有夾開的默契，唔駛有太多特別的attention的。


講開東亞其實我對東亞的感覺都又係幾曳，不過我用東亞的唯一原因真係得一個，就係Y小姐真係好鬼醒。做過按揭的人都知其實有幾麻煩，一個醒的Banker真係可以慳好多時間。So Far我遇過有料到同級數的banker，兩個係匯豐但已經收左山升晒職，一個係東亞就係Y小姐，我都希望可以再識番多D勁的同級數Banker否則下次由東亞轉走都係一件麻煩事。


點都好，呢家東亞個rate係據說可以有H+1.35%同埋1.2% rebate但可能到批時仲可以拉多小小，但暇疵位仍然係ML要做定期。聽講話出年個ML會改一改變番market的安排，到時點先再諗。而家就睇下東亞進展係點，經絡就正面完滿地告一段落，中銀就應該無下次了。

上集: http://hk80captain.blogspot.hk/2016/10/blog-post_21.html
中集: http://hk80captain.blogspot.hk/2016/10/blog-post_98.html