高見


有人話隊長無乜高見,黎黎去去都係果D野,其實好多時候我不禁想問,應該有乜野高見?


不過,的而且確隊長係無乜高見,無話過有乜高見。由寫呢個Blog開始,Blog的定位都係以財務自由為題,然後以買樓為工具,而睇的讀者亦來自五湖四海,當中有投資高手,亦有職場逹人,亦有初出之虎,所以係登峰造極的事業人仕眼中,又或者一個初出茅爐的小伙子,睇呢個Blog所感受到的野係會好唔同。高見,亦只是主觀睇下你係向山之巔俯瞰我的廢話,定係由山之谷整理你的財務而已。


對於李嘉誠黎講,睇呢個Blog可以係嘥時間;對於劉嗚偉黎講,呢度亦無乜野可以幫到佢。所以如果你已經係名城利就,又或者家有父蔭的話,你可以環保小小唔好嘥電嘥時間開電腦睇一個普通打工仔的文字。老實講,之前已經講過好多次,對於一般人,根本就唔需要任何高見,因為最簡單的野,有時反而最有用。


就如李嘉誠同你講買起英國供水公司,買起間油公司等等好賺錢,基本上唔駛咩專業,你有錢就得,係咁易一年賺一百幾十億,對一般人的你黎講,有得著嗎?唔好講咁遠,如果呢家話整拉面好好賺,你又係唔係識整拉面亦老奉賺硬?有好多人自己企係一個離地位,可能係一個機緣創業的情況下,你失敗,佢成功,然後就一副點解我得你唔得的嘴臉,隊長認為是沒有意思的。並非說成功並沒有成功之道,但一方面隊長認為有好多野都係天時地利人和,並非每個人都適合創業,亦並非每個人都會成功,而且失敗到捐手爛腳的人其實更多,只係無人會有失敗論分享者。另一方面,更並非每個人都可以有父蔭,又並非每個人都可以做職場達人月入十萬廿萬三十萬等等。所以,簡單黎講,隊長的目標,係大眾都可以做到的野,唔駛你quit左份工,唔駛你學師,理論上只要有基本concept,一般大眾都可以做的野,呢個就係呢個Blog的精神。相反,如果一位高人,講的野係其實受好多條件因素限制,講完天花龍鳳之後一般人都做唔到,咁呢D高見又有乜野用?



有時我見到D人好得意,比如我有個朋友佢係保險公司高層,月入50萬,佢同我講買Reits收息用左兩年幾財務自由左好耐,咁老實講呢件事同我講你中左六合彩頭獎呢家買晒Reits收息財務自由左有乜分別?當然你可以企係高地做高人話邊隻Reits收幾多息,係邊個位入左幾多呢家un un腳,但係你問下一個打工仔邊有人可以正正常常兩三年楂住幾球野係手? 千奇唔好同我講人人都得 ,甚至唔好講大部份人都得,你如果身邊識一兩個超人,咁佢幾本上已經唔係呢個Blog會幫到的讀者。


回到理論概念面,其實好多人成日諗要點样點样識D乜做D乜投資有D咩勁回報,諗晒成個model出黎要點样點样,隊長認為又係多魚。當然,賭場都有人諗到D計算方程式可以勁賺錢,果種坐係度就賺到的感覺亦肯定係至高無上,之但係你係咪咁好彩諗到條天橋的人,又或者你條天橋又係咪咁無破碇?如果係的話,你又願唔願意分享呢一條無風險的天橋呢?如果唔係的話,其實係大眾所認知的投資世界,唔理任何所謂的高見,話之你係做乜都好,其實都係離唔開低買高賣。有人成日同我講做乜乜投資有幾好回報,如之前好多人搞咩夾錢買工廈,劏工廈,第一水的人,係應該賺得好深。但講得比你聽之時,呎價上升,價錢到頂,減番成本其實回報已經細左好多,但聽落去亦有無數人津津有味,呢個就係咸魚青菜各有所愛,而隊長認為比你簡簡單單識玩一样野,已是足夠。


舉個例,你係100蚊以上買匯豐,匯豐係一隻西股。你係38蚊買匯豐,匯豐係一隻愛股,回報唔回報係取決於你點買,幾時買。我並非話叫人買匯豐,或參與邊一種投資,因為每個人識的野明的野都唔同,因此對於承受某一種投資的風險能力都唔同,而買樓黎講,理論上衰極都可以自住同收租,呢個就係點解隊長一直講樓的原因,每個人自不然都有一定的基本概念,人人都多少都主動或被迫參與,係一個大眾無可避免要玩的投資。


如果要講高見,隊長比人話我呢一年好少動作,其實難度不是高見嗎?不過,要供認的一點,隊長的確有好多野無寫出黎分享,而好多人的意見,隊長覺得都係得啖笑。唔通,我又真係要乜都分享晒,先至係高見?老實講,是但啦,隊長都只是一個普通人而已,理鬼你 :)






留言

  1. 隊長,可唔可以分享嚟做參考?

    回覆刪除
    回覆
    1. 分享咩?哈哈, 老實講唔會.
      無人會係網上自爆所有野無底線咁ON居嘛.

      刪除
  2. 支持你,看你blog你感覺很真實。
    有好多blogger 自我吹噓同sell呢樣嗰樣。
    在追求財務自由路上,如你平實分享見聞,實在難得。

    回覆刪除
    回覆
    1. 呢個世界好多怪人,有好多人就係中意人SELL野,講到天花龍鳳然後咪又係講果D野, 或者講一大堆唔等洗野之後得啖笑.

      刪除
  3. 我好鍾意睇你個blog. support :)

    回覆刪除
  4. 近排興SELL人買直債呀嘛
    係咁L好賺就唔同你免費分享啦

    回覆刪除
  5. 話細價樓半年內爆煲的資深投資者去左邊呢?當時你寫的文章的論點高幾班。

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力