等待黎明

最近個股市終於有番D起色，不經不覺就跳番上21000以上，好多人都似乎鬆番一口氣，希望係個市咁衰的情況下都得到一些緩衝。不過，如果以大市黎講，其實都唔係話好番好多，至少條街真係仲係好少人，樓價都仲係響低位（而非底位徘徊），都叫做未能放鬆。


睇番轉頭，如果有人問話，假設隊長能夠知道呢次跌市，咁又係咪可以完全避開同食盡呢？計一計數，攞其中一層最高峰350萬的樓黎講，最低位係大約去到290萬，跌左接近兩成。帳面，就當然係有60萬左右的空間去做，但隊長唔太認為普遍的人可以做到最高點賣最低點買，所以假設你要避走，當345萬賣，295萬買番，即中間有50萬的空間可以操作，以樓價350萬黎計相當和味。


但由於買樓成本高，要賣出層樓的話要3.5萬佣金，再買番就要比多2.95萬左右，當你來回律司費係1萬，即呢度去左大約7.5萬啦。以隊長咁多層樓黎講，唔駛輸SSD計都好大機會要買番的話比DSD，即以295萬計比87000，總交易成本上升至16.2萬。好啦，再計一計大約我層樓當租10000咁講先，再舊年高位到而家約莫9個月，即如果我賣左再買番，連埋成交期林林嬸嬸當足１年，即12萬左右，總成本將變至28.2萬。如果買樓你諗住都係咁易化下妝執靚小小先比人，因為始終買人地二手樓實有D野整下，當你齊頭32萬成本，即搞一搞的話，可能會有18萬空間，而呢個空間係講緊你都相當有眼光先會執到，而且仲要煩賣樓，搵樓，睇樓，再係今時今日咁苛刻的情況下重新做按揭，對於隊長黎講我真係唔敢講話唔合理，之不過如果已經見底的話，我寧願收多陣租好過，好話唔好聽一間一沖番上去咪又係得個搞，不過總有人高手在民間，能夠高賣低楂的人一定有，但係隊長認為無足夠勁跌的大前題下，我個人就寧願繼續收下租算，一動不如一靜。


咁有朋友話，隊長係呢段時間有咩做啊？其實隊長真係做緊一彈好傷腦筋但又迫自己做的野，就係隊長早前借左100萬P-Loan番黎然後放晒落高息股。有可能你會話隊長痴線，又或者可能話係小兒科，但隊長見股價咁殘的情況下，的確認為可以一戰，雖則到呢家都係負數(少5%，好閒)，但隊長為自己設下一個一年期目標，就係要瘋狂供甩呢100萬的錢，令自己拥有實在的一百萬倉股票。


有可能你會有好多問號，包括隊長買邊隻股。但我唔打算推任何股票，因為老實講我真係唔太識股票，我唯一知的就係好多好多股票已經有6%+的股息收緊，簡單計一計數如果你用100萬借多100萬買層200萬收4厘息野，減管理費同差餉（雖然今年好爽減左好多)，但數字上其實落袋的真係差唔多，以隊長咁多層樓黎講，買股票今次就變得吸引，一來無乜交易成本（唔駛厘印同裝修），而現價又低殘即上望空間比較多，再者流通量比樓係呢一刻高好多，所以目前樓同股，我揀股。再計一計數，100萬派6%即每60000蚊，每個月平均就5000蚊，只要供得甩呢100萬就又可以創造租定被動收入，呢條數就係目前咁計。


好啦，但迎接呢100萬背後的還款先至係過癮之處，因為過去呢幾個月每個月定時定候要還85000左右一個月，嘩你都唔好話講笑。隊長自己就設定左一個目標係盡可能都唔可以賣任何股去支持還款，即呢85000係來自於工作啦，租金收入啦，股息等等。你可能又會即諗，嘩隊長你都搵唔少喎，但我即刻要閘住你先因為你幻想的隊長收入可能真係諗多左，其實隊長的收入都只係一個中層打工仔左右，但面對85000呢隻還款怪獸都真係有d吃力。之不過呢，隊長有計落去的係一d現金流的野，即有d地方我可以預先收錢番黎隊左去還款先，然後再之後又用後面的現金流支持番預收左的資金，看似好複雜，但如果你有一張EXCEL又有好多唔同的租金啊，訂金啊，工作啊，Bonus啊，股息啊，等等等等的野，前後左右又同D租客傾下叫佢地交左租先，好多野就會唧下唧下唧到出黎。就目前黎講要還清呢100萬，計數上好似計埋預收的租金係頂得住，不過2017年就真係要希望公司出舊大bonus比我先可以鬆綁。


點都好，曾經我寫過1年半計劃，今日呢100萬股其實將會係一個幾平衡番我整個portfolio的投資，始終持樓太重，持流通性的野太少，但我預期只要捱得到一年，咁就會好好多，而我更希望樓市係下半年會同股市一齊復甦，只要今次築底成功，樓市就會變得更健康，到最後呢個投資組合就會變得更爽，而呢家就當自己強迫自己儲下錢，等待黎明。