六十彩

上星期一億元六合彩已經順利開出，當然隊長又要夢醒，繼續番工，但發呢個橫財夢的，應該有好多香港人。不過講到中六合彩，其實好多人中左頭獎都無用，過左十年八年，好多人就會重返人間而夢醒，例子見怪不怪。


之前同髮型師吹開，佢話佢識到一個朋友係九十年代中左頭獎，初時都唔知道，只係突然間呢對夫婦話要移民，咁可能果時臨近97所以無乜為意，之但係過左兩年呢對夫婦就番黎香港，原來朋友間吹番就係佢地本來中左3000萬六合彩頭獎，所以就怕親朋黎煩佢地，索性諗住避走美國，點知其實邊度都係有擦鞋仔謀住，所以散盡家財就番香港，番黎的時候其實都唔係話好差，但又唔係好好，可能3000駛淨200-300咁，但基本上就要由頭黎過。


所以其實好多人一夜富貴，本來係一件幸運的事，可惜更多人其實真係唔識理財，特別係年青的後生的，中左就只會識開Party慶祝，買下車威下咁，好似之前英國的一個後生仔，中左lottery有幾千萬又點，買下實溝下女吸下毒，一班豬朋友狗友群埋，玩到最後都係要做番個清潔工人。所以如果要中六合彩，我個髮型師就話真係一係就中十幾廿萬果D，一係就中到最大，你中幾十萬的一百萬的，樓又買唔到，唔咸唔淡，反而你中十零廿萬，可能好直接就去個旅行豪食豪洗咁，都叫賺左個開心回憶，呢個，當然就係無財商的人的諗法（唔代表錯，只係計數上有更好的選擇可能）。


老實講，如果識做財務自由的你，今時今日好多人都知只要賺息黎洗就夠用。舉個例你有3000萬，衰衰地買5層500萬左右的樓，當每層每月收15000租金，你已經穏袋75000一個月，相信好過好多人番工。但買樓有成本裝修亦有成本，如果只追球息率的，又可以買港燈，一样可以收大約6厘息，即180萬左右一年，每月15萬，去邊搵？以呢個回報你坐係度已經等於一個百萬年薪的中產啦，駛L做咩，淨係洗息都夠皮，所以如果比你中六十彩你都唔識點玩的，其實都係無智識隊冧命運。


講到呢度，其實大家都可以計下財務自由的passive income係今日的情況係點做最好，即係究竟買樓定係買股好？之前隊長一直都建議大家買樓，但呢段時間隊長就已經收晒爐（皮），唔會再買樓住，原因係呢家樓市似乎仲未玩完野，如果買左再跌其實就輸多間，但如果升的話其實我都有足夠的樓有突去面對升幅，所以隊長一方面係認為無必要係現portfolio再買樓，而二來隊長認為計埋佣金同DSD的情況下，面對住不停跌的租金，條數開始計唔岩。買入的相關成本太大，而且一般隊長都中意裝修完先比人，所以投入的首之資金太多，但租值在減少，風險大增。因此，最近隊長認為買股還是比較理想的。


股，並非隊長強項，所以唔多講。但隊長認為呢家好多股都息口高回報好，突然係本地銀行更加比起其他地區出色，所以如果要考慮真係可以諗下股市的本地地產股，可能等雨過天晴後，賺息又賺價，咁人生就完美了。