被消失了的15%

今日嘉華開始軟銷剛攞到預售樓花同意書的朗屏8號，並公佈最快下星期可能會推出價單，係一個咁差的市況下，嘉華見到長實世宙都清唔到倉的時間，竟然都仲好似想試下水溫，似乎嘉華對自己係朗屏的呢個盤都相當有信心。在其訪問入中，嘉華的總經理提出一個觀點，就係政府唔減辣，即受BSD影響的外部需求被壓抑了，意思即係話香港今時今日的樓係抵買的，因為如果政府撤招，外部需求帶動下香港將可能追回呢被消失的15%樓價。


先莫論你認唔認同呢一點，但隊長不停呢排講的，就係國內樓市同國內經濟以及香港，絕對的係行一個背馳之勢。當你以為大陸股市好似食左瀉藥，今年又話經濟唔好，香港以至環球都好似好衰咁咩，但國內的樓市係發光發熱得好很緊要。上海一日樓價有傳升100萬，廈門日光盤又湧現，日銷12億元，而最近我地的深圳都痴左線，環比樓價最多升左超過52%，平均造價為48000元人仔一平方米，而最痴線的南山區已經有賣到120000人仔一平方米。


仲未知有幾癲的你我地又黎計一計條數，如果用120000人仔計，大陸呢家都仲係講緊建築面積，即係我當有良心D係有85%實用，即係一平方米實用面積係講緊141176元人仔，再換番今日匯率1:1.19算，即168000元港幣一平方米，亦即約16800元一平方實呎，呢個係深圳豪宅價，如果對比香港黎講，呢口價絕對大把選擇，某程度上你話超香港，都應該差唔多了。


前幾日隊長係國內就同幾位廠佬食飯，當討論到樓價時，佢地因為我地來自香港，都從口中了解香港樓價，發現原來有跌的時候，佢地都相當感興趣來香港投資，不過一講到有BSD時佢地都覺得唔抵。而我亦打聽一下佢地想了解下點解呢家經濟唔好，但國內樓市仲咁痴線，佢地的解釋係呢家就正正經濟唔好，股市又差，買機器再投資係無意思，所以d錢唯有就係用黎買樓，特别係銀行對於太多借款都唔敢亂借，但打開門口要做生意要追額，所以銀行係咁多貸款中，認為樓市係最安全的，所以亦鼓勵市民買樓。


其中一個廠佬仲舉左個例子，佢話其實成個制度就係一個龐氏騙案，特別係有d人其實根本已經無錢，所以佢地就諗左條橋出黎炒樓，亦即係佢地比如買層800萬的樓番黎，然后賣比個老友1200萬，銀行肯做按揭的話，就無厘頭借多左200-300萬的資金，咁難聽d講還唔還到根本唔係問題，最多唔掂就走數，但係如果樓市升，呢200-300萬就無啦啦賺左，而且呢筆錢仲可以解決佢地生意上的資金鏈問題，又或者可能根本無諗過還，只係不停咁借上借上借直至爆煲，所以佢話國內的銀行的不良貨款可以好恐怖，當個樓市無得再升要跌落黎時，可以好痴線，奈何地方以至國家都希望谷經濟，明知風險巨大都係一样照做。


講左咁耐，其實都無話知道d乜，因為一日有bsd的話，上面幾富貴都好，我地都唔會太受惠。但如果我地太濕濟時，放開BSD的話其實就好痴線都似，之但係我認為臨近2017年，減辣的機會應該好微，因為如果樓價突然上升，減果個689或財爺，都可能要係政治上付上代價，所以選特首的情況下，樓市可能都仲係要靠本地需求支持，希望近期股市沖番上20000左右能夠為疲弱的經濟帶黎一點抒緩的時間吧。