下行心態

係呢段時間，隊長聽到最多人講的當然就係話樓市要冧了，要跌了，當然有好多淡友即時會買定花生令花生價格大幅上升，而隊長亦承認個市的確係回左，之不過一如前文所講，最低點似乎已經過去左，反觀呢家新年番黎香港股市勁冧但樓市的所謂劈價盤都好有限，看來樓市已搵到第一個支持點。


當然如果講係跌市時候要點做，隊長認為有兩點要考慮，一就係你認為要跌幾多，二就係因應跌幾多你會做什麼。


有好多淡友會話，大跌了，今日高價明日低價，呢件事其實係似是而非的。首先乜野叫大跌，乜野係劈價，係呢句充滿淡味的對白入面，其實係完全沒有量化的。舉個例，如果你層樓之前值400萬，而家做370萬咁講，咁所謂的大跌，係淡淡口中，係跌至咩價位先？可能佢話跌到350萬已經係大跌，而你唔知，以為佢講的大跌係200萬，大家沒有量化但就同一個意題去討論，其實有點奇怪。當然，呢個舉例其實我係故弄玄虛的，畢竟其實反而大部份淡友係會睇樓價跌至零，一日未到零，就算跌至十萬，都可能會係睇淡。


講番如果你自己睇400萬的樓，你認為回調其實可能都係350萬左右，咁你可以做的野係咩呢？首先買過樓的人都知道買樓唔同買股票，係呢個唔完美的市場，特別係淡市下，你認為400萬的樓，可能Market做緊370萬，但你如果真係要放，由於買家不足而且個個都係想買平盤，你好大機會走到的價係355-365萬左右，除非你特別好彩遇到個傻佬另計。咁好啦，當你係360呢個價位左右走到，減埋佣金律司樓，除時仲可能被罰息咁，都當你有355萬剩，其實得5萬元空間水位。當然個樓價跌幾多其實真係無人知，但就算比你跌到330萬了，你是否又能高興呢？


首先要搞清楚一件事係你會唔會買番層樓，如果你唔會，咁你老實講都真係可以開心慶祝，但如果你要補倉買番層樓，330萬的話你買入又要3.3萬的佣金，再加埋74250的稅(好好彩你無DSD計)，咁你係咁易成本都跳到上340萬左右，而仲未計單位的質素，你會唔會係賣走一層有裝而換入一層無裝的？如果係，係咁易執一執去番一個好小小的內龍，又無你幾萬，成件事400萬跌到落330萬好，70萬的空間你只係執到10萬8萬，但樓市已回調兩成，講真你坐係度收租都有啦，駛乜咁辛苦高難度搞黎搞去？


所以呢，個人認為如果你唔肯定未來有30%+的空間下行的話，最好可以做的野就係乖乖地休養生息收租，唔好搞咁多野，特別係要遠離個市，同埋唔好睇方向日報。避開報紙傳媒的一個主要原因係唔好比人瘋狂式洗腦，特別係太多不盡不實的報導，反正報紙佬都係靠誇大而出位，寫得越誇就越有收視，而且方向報有明顯的政治責任，所以睇得多都係傻。


下行的情況，不防做下其他有益身心的野，努力做好你的工作，搵多點錢，等最差的時間過去，做好個底的話下個升市就會更高更強。網上一班好友的統計，大部份人都認為上半年會見底，同隊長預期都一样，而近呢幾日股市亦好似好番小小，又即管睇下最差的時間否已過吧。