聖誕睇樓實錄

樓市似乎係一股淡風下不停向下，報紙同討論區在一片淡文下日日爆出新低成交，係呢個時候當然有淡友話要跌個三五七成，但與此同時新聞已經不停Loop果D超低成交，如果唔小心分析，真係可能會以為世界未日。


當然，跌左價係一個不爭的事實，但我見有討論區以及電視節目都報出一間低之前高峰期20%的成交，自不然有兩個諗法，一就係個市係咪咁痴線，因為一個加息的消息，就算係無任何實際加息的情況下竟然大跌兩成？二就係呢個係單一事件定係淡勢已成，是否又係入市時機呢？要解答呢D問題最好當然就係去實地考察。


由於已經有電視的大力報導呢D超低成交，副隊長同我就同時搵左三間行去報一報D價，但係報番黎的盤呢，每間都五六個鎖匙盤比我地揀，叫價的價錢就係比起高峰期回落左5%左右，亦即可預期如果有心傾的話大約可能係比起高峯期有8-10%的Discount。數口唔精的你，我大約可舉個例係高峰期360萬左右的野，而家Agent報出黎就340左右，估計成交的話都可能係320萬左右。


但問題係，唔對路喎，電視啊報紙報出黎果D 280萬左右的野，點解我地攞住投資者的背景報幾間代理番黎一間都無ga?據知首先其中一間成交係最細的單位兼超殘裝，所以先會平得誇張。而估計另外有一兩間都係可能真係等錢洗而賣，始終個市真係好一段時間無人買野，所以必需要走的個別業主真係要平賣小小，但一平多DD就馬上有承接，感覺上大家見到15%-20%左右的平野就已經係底即刻入市。


睇樓黎講，匙盤亦多但質素好普通，呢D平5%的叫價盤算係二三線貨源，而係聖誕的下午亦見有其他人睇緊樓，感覺上個市雖然靜但沒有像報紙同新聞營造到崩地獄式的情況。同Agent 傾計的時候亦指出，呢家係可以挫價，但你還價太狠Agent一样比人小老母，所謂太狠的就係報紙電視果D成交，呢Ｄ價似乎真係可能流唔到出街，成左可能都係Agent搵自己人食，但大事渲染只係順便造淡方便挫價。


其實整體感覺業主仲係好強，但成千個單位的屋苑有一兩個人手緊平賣就變成左報紙電視的大字標體，有點兒嘩眾取寵左。當然你可能又會話隊長大好友當然唱好，不過計數上，其實跌果10個8%，投資者根本無得揀做任何野，一定會硬食，原因係樓市唔似股票，10個8個%的跌市絕對唔夠轉身，相反呢個跌市會唔會成為左一個入市良機，大家就可以不防諗下。


隊長仲有最后一注錢，如果真係有手緊的業主需要出貨，也許今年都可以執多件平貨玩下，始終呢家只係心理上大弱，如果政府趁機減辣，或者股市上升去填補心理關口，應該今日的超低價都會有一定水位，大家亦可以考慮下睇下樓，搵件超低價貨食下都可能係一件美事。


ps. 祝大家聖誕快樂!!