加息了，你們腳震嗎？

聯儲局係萬眾期待的情況下，吹足一年風，終於係香港淩晨時份加0.25厘至0.5厘，為十年內首次加息。隊長之前話唔會加息的文章下被摑一巴，不過輸就認，但打就唔企定住，因為香港係無加息，即係呢件事呢就好似足球盤咁受讓半一，呢家要輸半格盤，但又輸唔晒。


好啦，加息呢個事情已經開始，即係話我地已經進入左新的加息週期，接落黎的問題係究竟加息下香港的樓市同經濟會點先？好多淡淡已經飛出黎話港樓一定會冧會跌三五七成啦？老實講，呢家個市咁靜我真係都見到有個別成交已經跌左超過一成，不過係咪同加息有關我覺得係未必，只係呢家成個市係度傻吹淡風而形成，但個別業主係咪可以代表整個屋苑同整個市場呢？唯有時間先可以證明。


而要去９估究竟加息下的影響呢，你話加息就樓價跌呢個論調係唔一定息立的，其實有幾個大的因素要留意：


- 加息的速度及幅度
- 本港經濟情況


而家最首要去留意的就係所謂加息的速度，即究竟係由明年開加個個月都加狂加至世界未日，定係可能係每季0.25呢，係市場上面的確還有唔少聲音。而家市場就有下面預測：


聯邦基金利率目前0.5厘
2016年底將升至1.375厘
2017年預測為2.375
2018年預測為3.25厘
長遠利率預測則保持於3.5厘


亦即係話，市場推段大約每年會3-4次息，每0.25厘左右，亦即係好大機會係每季加一次息咁。而但係渣打今日亦出新聞指出美國經濟未完全復甦，預2016年只會再加一次息咁話，即係如果未來幾來個加復都唔係太急進的話，其實業主都唔駛太驚慌。


對於隊長而言，主觀願望以及個人為客觀條件黎講，明年都只係會加息一次左右，可能係年中，主要原因係加息初期都未有足夠數據去支持究竟個影響，如果突然用藥太重，又或者人仔又玩野，美國可能突然進入衰退都話唔定。講到呢度，美元兌人仔前日開出黎最高係1:6.5，今日都繼續人仔貶值，呢件事有排玩。


而另一方面，就係要講加息加到幾多厘先停呢？喂如果長遠係保持3.5厘，即比起今日高3厘的話，香港樓市會唔會頂唔住呢？呢個又可能睇下你幾時先去到呢個位，如果係3年後大家有晒準備，又唔係去到10厘8厘，相信要冧都應該係唔太容易的事，特別係香港樓市呢家相對持平，即如果樓價無再大衝上的話個泡沬比人壓細左，實際借少左，係難爆喎。


講番香港本地經濟呢，第一個要講的就係美國加息係咪等於香港要加息呢？答案可以話係但亦唔可以話係，記憶中就有美國減兩次息香港亦沒有跟，即係等如今次美國加息，香港都唔跟一样，可能亦會出現兩三次唔跟的情況。本地銀行亦普遍認為就今次加息，香港至少有九個月時間的濟後而唔會跟隨住，亦即係就算美國佬以上述情況有序加息，香港都可能係九個月後先講，仲要可能加少一兩次息，呢個緩衝期其實更加令香港的加息壓力減少。


隊長想指出的係就算加息也好，只要係一個平和同緩慢的加息期，其實都唔駛好腳震，比多5年時間大家，只要有工開有野做，正正常常的話，一方面你層樓都有供左5年之餘，又有足夠時間比你去儲子彈，只要唔係過份槓桿的話，理論上應該無需腳震，除非美國攬炒，真係一連加十二次，咁就大家等全世界仆街啦。