豪宅唔冧但細價樓冧

如果有專家同你講，因為segment唔同，客路唔同，購買力唔同，因此豪宅唔會冧但細價樓會冧的話，我可以話比你聽佢一定呃狗你。


當然係邏輯上或學術上係有可能，即係話呢家有錢佬就個個好發，發到豬西咁，所以豪宅唔止有支持，而且仲可能會有升幅，之不過細價樓係因為對大眾market，你唔好問點解總之呢家有錢佬普遍都好L掂，但平民百性就仆晒街個個都食二手飯，係一個咁極端的環境下大家都要放樓求售，但求一死，而有錢佬好勁，有錢係手係要等到淘大跌番到幾十萬一間咁，然后就成幢買落黎，中間就算跌到百幾萬二百萬，有錢，係都唔會執平貨的，所以係一個咁極端的情況下，係無錯的，豪宅係唔會冧但細價樓會冧。


不過我認為市場係某程度上係理性的，即係話假設你係銀行，呢家你見到細價樓仆晒街，一方面我諗都會收遮，所有按揭業務都會變得好保守，而我指"所有"的意思，其實係包括左豪宅以及細價樓？喂講真，你話無跌姐，點知下一步跌唔跌啊，睇住細價樓估價已經回落，公司炒緊人，有乜理由反而豪宅生意會大膽進取，咪玩啦？再者，我有好難諗到一個現像係，香港失業率大幅上升，好多老細走路，好似沙屎咁，日日都話炒人的時間，然後咁样的情況下，普遍老細會特別好景得黎，仲會係大市咁仆街的環境下好多人仲大舊大舊錢去買豪宅？唔通有錢果Ｄ人真係傻撚左？傻撚到有跳樓貨唔要，有子彈楂手又唔要 ，死都要谷番落去幾千幻幾億的樓咁样？咪玩啦兄弟。


又有人話加息個市會冧，先唔討論呢一點係咪成立先，但點解加息又會只係隊死細價樓而唔係豪宅呢？當然合理的解釋一定係話細價樓對於平民的負擔能力有好大影響，而對有錢佬就無所謂，話之呢家我借幾千幻幾億，加1厘一年都係講緊幾廿幻息口有限數，沒問題，咁對細價樓又係咪咁仆街絕殺先？


之前都計過類似的野，不過我都唔厭煩再計多次，當一個普通市民欠銀行300幻，30年還的話下表係佢要面對的每月供款:


@2.15 = 11314
@3.15 = 12892
@4.15 = 14583
@5.15 = 16380


一早講過你老美能夠加一厘息的話我諗佢死都未到你死，係少於一厘的情況下，每月都係供多1578元，而對於一個有錢佬睇的細價樓的業主，就算有壓力測試的情況下，佢係認為一個細價樓的業主可能因為比多1578元就會仆街。也許我誤會左，又或者佢認為係會加兩厘息，即係比多3269元的話，細價樓業主就會係咁先，那怕你過左壓力測試搵緊4皮野一個月，你老婆又搵緊3幾皮，你手頭仲有幾十幻應急錢呢D，通通唔撚計，離地咪就係呢隻。


再睇番今時今日的政策，所有野都傾斜去幫助買細價樓的情況下，就算最近市淡左都好，只係其實D人等待所謂的冧市而無再講，但其實冧市並沒有來，要冧的話豪宅更無可能獨善其身，能夠有咁样定論的人，應該都係果D係扒房鋸住扒食住龍蝦的人，去討論呢家面包鋪的包食唔食得飽人的行為。


個人認為細價樓所吹的淡風將會係明年小陽春前完結，想上車的人請記得盡力搵平盤，否則下一個升浪又係會令你追唔切。