大洗的賺錢觀

其中一個隊長的問題，其實同大部份廢青一样，就係好大洗。大洗的情況，有時都自己會嚇親自己，因此其中一個早期原因去買樓，就係橫又洗掂又洗，倒不如洗係買樓上面，每個月先自閹一舊錢，供下供下都唔覺唔覺會儲起左，呢個係一個幾好的方法對待無紀律的我。


所以，有時坊間有好多理財達人會教你應該點样記帳應該點样分配洗費，識隊長的人都知我並唔認同呢一個方法。之前已經講過慳只會慳到一條數，但係如果將心思放係搵更多錢，個可能性係無限的。不過講呢样野都開始越見慚愧，特別係當洗錢洗得勁的時間，以及個市無乜主題下，人就好似會有小小恍忽。


也許你都會有類似的感覺，就係洗錢時一萬幾千其實真係唔係好大條數，好似隊長最近整一整車都唔見幾蚊。但係，要你去搵錢時，一萬幾千原來又好鬼煩，有時有D野見到係明有得賺，但諗到最后要搞好多野，就會想算鬼數寧願賺少D，當然而家個心態同岩岩做野會好唔同，呢家可以話係叫做有本錢，所以唔駛賺盡每一蚊。


又令隊長有感而發，係因為朋友A最近同我傾關於佢的一間小店經歷四年後終於要結業有關。我唔敢講話係光榮結業，但又唔太能講話係失敗，主因係呢家係香港你敢搞個生意仔出黎係一件好勇敢的事，而當中我又知佢叫做每個月都岩岩好叫做和和果果咁，其實都叫做半成功，但係如果成個project睇，佢4年前放左400K入去，呢家賣盤有人肯接收番150K左右，其實都可能係一件負回報，但至少比你捱到4年，都叫做唔錯。


而係計數當中，佢又衍生一個新的諗法，因為新的買家其實係佢的朋友，呢家賣盤佢有機會換過一批新的班底去做，而新買家又肯比佢參股玩番一部份股份，咁佢的諗法係如果收番舊錢番黎找埋D街數都係得幾皮，400K都攞左出黎呢家有個second chance，好似都可以一試喎，所以同我傾下好唔好去諗下呢個option。


其實係隊長的眼中就唔係太支持做生意，特別係做一個無乜利潤或潛在有豐厚利潤的生意，更特別係一門你已經試過同一個位去做而無乜potential的生意。過去四年其實和和果果咁，如果你覺得新一批人係有計的，就當你可以個個月都係旺季的sales，其實除番幾份人，落袋都係三五千。而相反，如果都係一如以往咁死，你除時連一個exit的機會都無埋，更慘的又要再揼水入去玩，何必明明走得甩又要中番個頭入去呢？


但更大的問題其實係對於隊長黎講，呢D數對而家的我實在太細真係唔想去用腦諗，你諗下每個月執果三幾千，但一間開會又要搵你，唔掂又要搵你，又要同partner講信字，賺又唔賺得多，煩就煩春到你，為乜？好話唔好聽有時豪起上黎食歺飯都無左的野要費盡心思去諗，值得嗎？


回想當初，其實我有同佢四年前講買樓，而大家都應該好快就諗到，四年前買樓的話，今日的回報係乜野情況，衰衰地執一球唔用腦都其實唔難。當然，呢種咁廢青的諗法我唔應該鼓吹，之不過如果純計數，就真係無得講，買層樓收下租，係會煩，但唔會煩到仆街，而回報就更加理想。


好多時我個腦真係好腦交戰，如有時見到D人接我的工程仔黎做下，有時整下呢样整下果样做到身水身汗先執兩三百，一方面我真係認真尊敬佢地對工作的認真，但同時我會反思點解佢地唔會收貴小小，因為調轉頭你比兩三百蚊我我真係唔會做同样的野。


所以，呢家隊長開始形成一副廢青的心態，就係洗錢就兇狠，但工作的賺錢就大雞唔食細米又唔捱得咁。呢個落差越來越明顯，所以我見到自己的問題時，有時都會投射向其他的人，因為我知自己好L好彩識係其他地方度搵錢填番個洞，而其他人如果只係靠份糧的話，到底佢地真正的財政狀態係掂，真係唔敢諗。