土地陷阱

有玩過地或村屋的人，其實大家都知道車到唔車到，以及係咪政府路入村，都會係一個影響價錢的因素。因為本身村地的問題，其實好多所謂入村的路都係阿公的，因此可以理解成為私家路，連警察都理唔到，所以點解圍村人咁惡亦係有原因，入去收數的，真係比人溶左都唔知咩事。


故此，如果你想投資村屋土地相關的產品，識玩的人一定會攞晒個lot number去睇下同最近的政府路的情況，以及實際去觀察下實地又係咪同個plan一样，而如果你買的地或屋係無政府路的話，一般你都要識定村長交低過路錢，如果唔係你想入去，又或想安住都幾難。呢個亦係隊長一直都好小心的地方，三不管就係呢個狀態。


不過今時今日玩村屋地呢D野其實一早比人玩晒，你想買政府路邊的野唔係唔得，不過價錢一定會有所反映。而如果你想買D以為車到就入到去的野，睇完都好似無問題，一路上暢通無阻，咁你就真係要求上天保佑唔係有人撘棚整鬼你。


隊長係幾年前睇過一D所謂的豬棚屋，首先係開價的時間棚連地係6球，老實講個豬棚真係好大，要改做樓應該十個八個櫃走唔甩。不過問題係個plot，要入呢條村，你老味係個入口果塊大約100呎的地，零零舍舍係比人keep起左，即係話如果果個位的人係咁易拉起個欄，成條村的人都唔駛出入。當然，個代理話無問題啦，有D人好癲仔如果預著咁情況，咪搵部工程車鏟冧呢塊地側邊的樹同埋係個坑度倒番石屎咪又係一個新入口囉，屌，呢D真係無枉管的野，我一個外來人你估我夠唔夠膽玩到咁大，開到條路但比人打到打橫出番黎，甚至出唔到，你估我報唔報得切警啊嗱？呢D野人地日日住係度同你玩，邊報到咁多警，所以一定唔會咁諗，即係唯有就唔買，以免誤中陷井啦。


住係市區的你，可能未必太知村屋有幾黑暗有幾難玩，有時唔係話法律大晒，好似我有個朋友一家人搬入左村屋，隔黎條友起下又過Ｄ起下又過Ｄ，之后起到連佢番屋企條路都比人封左一半。佢投訴無門因為村長幫住另一邊，於是佢咪搵地政署做測量度番地界囉，係就係度到人地偕健越界，咁又點？誰來執法？佢玩到咁串之後，換黎的結果係日日都有一堆垃圾係佢屋企門口，吹咩？報警搵垃圾凶手咩？咪玩啦。


其實呢野都未算癲仔，更大的撘棚我都聽講過，有d村民賣間屋比你，賣左幾百萬之後，你開開心心入去的時間，點知發現係入屋的必經之路多左面水泥牆，人地擺度明比個屋你踩，之後當然比條路你黎，同你用賤價買番間屋，你可以渣都無得剩，或者攞番幾十萬走，講真呢d局黑暗到你唔信。


同一道理，其實而家有好多劏場都係同一概念，老實講買就買個劏的單位，但走廊就係公家，所謂的公家咪即係個劏主，講明幾多%都無用，如果賤係上黎，賣晒之後突然起幅水泥牆同你講回收你個單位，你報警都無用，係擺明呃狗你。所以，隊長一般都唔建議人買咩劏工廈玩，寧願幾份人買個細單位，都好過一個人買個一百幾十萬的劏位，一間幾年后業主見好價想錶你一個尾會，你的投資就化為烏有。