難得糊塗

生活係香港，可能你同我都會諗點解可以咁苦，由細讀書比人迫到癲左，到大個出黎搵野做又要捱，人工低樓價貴，做到三十出頭開始好Ｄ又可能要結婚生仔，一鋪清袋之時仲要養多件咁講，呢個似乎係香港人的社照，但同時我可以話比你聽有D人並非如此。


當然你第一個諗法估我講的，可能係條命生得好的富二代，不過實際上又唔可以套用係我上面條路，因為富二代就算本身可能想玩，但一般黎講屋企人都會對佢地有一定的期望，期待佢待接棒，所以係小時候可能一样要迫佢地讀書考試，陪育人材，所以那怕富二代係錢的層面上面有優勢，但普遍都會有一定的人生壓力來自於家庭（當然也有例外）。


因此，香港的其中一個特色就係圍村的人士，由於天生出黎男仔就有個丁，加上本身屋企相對港島九龍人未必有果種學業成就，好多時個世界係相對變得細，細到有些人一般黎講就可以話只係活躍於錦田元朗一帶等等。我識的其中一個朋友，就係元朗長大，雖然佢無丁，但中五畢業的佢，從來無考慮學業讀書問題，相信番學只係一個過程，然后畢業就做車行買賣，屋企亦有幾間屋咁，而佢身邊的朋友都係呢個層次，無乜人有讀U的經驗，一班人18歲就投身社會咩都做下咁，放假又好番工又好，得閒就一班人楂架車係元朗錦田度玩下食下野，有時得閒就叫d朋友番屋企BBQ下咁，生活非常寫意。


無壓力的其中一個原因，係因為佢住的地方係有前花園約2000-3000呎，屋就700呎 x 2層，仲有一個車房可以泊四五架車，間屋門前就係政府路，呢間屋如果唔係響元朗，我可以話比你聽間屋應該都值億元以上，不過對佢黎講，係零成本。有時所謂潛建啊咩村屋問題，講真佢一D都唔怕，住村的佢試過見到屋宇署的人黎影相，佢即刻帶住兩隻唐狗係門口，大大聲聲叫一句屌你老母係咪唔撚想出番去啊，班屋宇署已經即刻上車逃走，所以係佢的世界，香港係非常美好的，因為做元朗人，同做香港人有些微唔同，就係係一定的程度底下，佢係真真正正擁有左一部份香港，可以自己係某一個地方以佢地的方式話事，加上只要有丁有地就更加係永垂不朽，所以從來對於部份元朗人黎講，讀書叻唔叻做野得唔得根本唔駛太上心，係你地要搏命搵工搵錢上位買樓的世界下，佢地由頭到尾都唔係玩緊同一個遊戲。


所以有時做人讀咁多書識太多野關心太多時事之類，可能都只係自己攞苦黎申。好似個我朋友咁，你其實同佢講D scope global D的野，佢莫不關心，你同佢講搵錢，佢又唔係好憂，（當然隨時仲多過你），好話唔好聽你呢家比個上市公司主席佢做，佢都懶得做，懶得理，最好就係維持現狀，有得玩有得食有份hea工求求其其就得，因為有丁有地的話，香港是很美好的。


睇住同我一齊成長一齊讀書的同學仔，再對比呢一位朋友的世界，不得不承認有時糊糊塗塗可能真係做人會開開心心，比你讀得多書係公司吃得開，完全唔見得會開心。難得糊塗呢四個字，越諗真係越高深。